Jɔ-cua 9 - RUAC KUƆTH IN RƐL RƆ

Ji̱ I-thɛ-rɛl kɛnɛ ji̱ Gib-yon

¹ Täämɛ mëë ci kua̱r tin di̱t kui̱c yiëër Jɔr-dɛn nɛmɛ liŋ, kua̱r diaal tëë te röli päämni kɛnɛ tëë te täpni amäni tëë te jɔk Bar in Bo̱r in te kam wi̱i̱ni kui̱c in jay Lɛ-ba-nɔn. Tɔ̱tɔ̱ kɛ kɛn ji̱ rööl Ɣɛ̈th kɛ ji̱ rööl Ɛ-mor kɛ ji̱ rööl Kɛ-naan kɛ ji̱ rööl Pɛ-rii-dhi kɛ ji̱ rööl Iwi kɛnɛ ji̱ rööl Yɛ-buth.

² Kɛn cukɛ rɔ̱ mat kɛ ɣöö bikɛ Jɔ-cua kɛnɛ ji̱ I-thɛ-rɛl ka̱p ko̱r kɛ lɔc kɛl.

³ Ɛn guäth ɛmɔ, mëë ci ji̱ rööl Gib-yon tëë ci Jɔ-cua kɛ lät kä Jɛ-ri-ko kɛnɛ Aay liŋ,

⁴ cukɛ ca̱p mi wän wän la̱th, cukɛ rɔ̱ duɔ̱l mi̱th kɛ kui̱ ja̱l, kä cukɛ muɔ̱likiɛn cɔ̱n kɛ cuali ti ci dhiap kä ci rɛ̈t kä ca̱kɛ botni,

⁵ kä jälkɛ kɛ wa̱a̱ri ti dɔŋ ti ca̱kɛ do̱o̱pni kɛnɛ bieyni ti ci thuɔ̱k kɛ da̱k, mi̱th ja̱liɛn diaal kɛ jurayni ti kööt kä tɔɔr.

⁶ Ɛ jɛn cukɛ ku ben wi̱c kä Gil-gal kä cukɛ Jɔ-cua kɛnɛ ji̱ I-thɛ-rɛl ben jiök i̱, “Kɔn lapkɔ nɛy ti bä ni ro̱o̱l mi nɔ̱a̱n. Görkɔ jɛ ɛn ɣöö bia kɔ guɔ̱k maar.”

⁷ Duundɛ ɣöö cu gaat I-thɛ-rɛl ji̱ Iwi jiök i̱, “Ɛŋu mi dëëkɔ je̱k ni guɔ̱k kɛ yɛ, kä di̱tdiɛn dɔ̱ŋ kɛ yɛn ji̱ thie̱e̱käda?”

⁸ Cukɛ Jɔ-cua jiök i̱, “Kɔn lapkɔ kuaanyku.” Kä cu Jɔ-cua kɛ thi̱ec i̱, “Lapɛ ŋaani, kä biaa ni nikä?”

⁹ Cukɛ jɛ loc i̱, “Kɔn ja̱a̱ŋku, bakɔ ni ro̱o̱l mi nɔ̱a̱n kɛ ɣöö cakɔ kɛ̈k kuɔthdu ni Kuoth Nhial liŋ, kɛ ɣöö cakɔ kɛ̈kdɛ liŋ, kɛnɛ tëë diaal tëë cɛ la̱t kä I-jëp,

¹⁰ amäni duŋ di̱i̱t ëë cɛ lät kä kua̱r da̱ŋ rɛw tin di̱t ro̱o̱l ji̱ Ɛ-mor tëë ciaŋkɛ ni kui̱c yiëër Jɔr-dɛn, kuäär Ɛc-bon ni Thi-yon kɛnɛ kuäär Ba-can ni Ög mëë te kä Ac-ta-roth.

¹¹ Täämɛ ci di̱tkɔ kɛnɛ ji̱ rööla diaal kɔ jiök i̱, ‘Bakɔ rɔ̱ go̱r mi̱th ti bakɔ cam lɛɛr, kä bakɔ ben kä yɛ kä bakɔ yɛ ben jiök i̱, “Kɔn lapkɔ kuaanykun, kuanɛ maar gök kamädan täämɛ.” ’

¹² Nɛmɛ ɛ jɛn miɛth ja̱la mëë ka̱nkɔ cieŋnikɔ kɛ le̱thdɛ guäth ëë tɛ̈thkɔ piny benäda kä yɛ, kä täämɛ, nɛn ɛ, cɛ kööt kä ca tɔɔr tɔɔr.

¹³ Kɛn go̱o̱k kɔaaŋni ɛ ti kɛ bo̱o̱r mëë thia̱ŋkɔ kɛ, kä nɛn kɛ, cikɛ pa̱t, kä kɛn bieyniku ti̱ti̱ kɛnɛ wa̱a̱rikiɛn cikɛ da̱k kɛ jɛn ja̱l in bäär in bakɔ thi̱n.”

¹⁴ Ɛ jɛ inɔ, cu gaat I-thɛ-rɛl mi̱thkiɛn nhɔk ɛ ni ɣöö /kenkɛ Kuoth Nhial thi̱ec kɛ kui̱diɛn.

¹⁵ Kä cu Jɔ-cua maar lat kɛ kɛ, kä cuɛ guɔ̱k kɛ kɛ i̱ bikɛ cieŋ kɛ kɛ kɛɛl kä cu di̱t matdä ji̱ I-thɛ-rɛl diaal rɔ̱ yac ɛn ɣöö bikɛ gukdiɛn ɛmɔ rɔam thi̱n.

¹⁶ Kɛ kɔr ni̱ni da̱ŋ diɔ̱k mëë cikɛ ruacdiɛn ku thuŋ gök, cuɛ jɔɔy ɛn ɣöö kɛ ji̱ thie̱e̱kädiɛn kä ciaŋkɛ ni rɛydiɛn.

¹⁷ Ɛ jɛn, cu ji̱ I-thɛ-rɛl tɛth piny kä cukɛ rɛ̈k nɛɛni tɔ̱tɔ̱ cop kɛ kɔr ni̱ni da̱ŋ diɔ̱k. Kä rɛ̈kiɛn kɛn tin, Gib-yon, Kɛ-pi-ra, Bɛ-roth kɛ Kir-yath-ya-rim.

¹⁸ Kä min te ni jɛn thi̱n, /ken ji̱ I-thɛ-rɛl kɛ näk kɛ ɣöö ci di̱t matdä I-thɛ-rɛl rɔ̱ yac kɛ Kuoth ji̱ I-thɛ-rɛl ni Kuoth Nhial. Ɛn wa̱nɔ cu ji̱ matdä guɔɔr kɛ kui̱ di̱tkiɛn.

¹⁹ Kä cu di̱t diaal kɛ jiök i̱, “Kɔn cakɔ rɔ̱ yac kɛ ciöt Kuɔth ji̱ I-thɛ-rɛl ni Kuoth Nhial. Kɛ kui̱ ɛmɔ thilɛ mi dëë lät kä kɛ.

²⁰ Banɛ kɛ dhil jak kä cieŋ rɛydan kɛ ɣöö ɛ mi canɛ guɔ̱k kɛ, mi /cɛ bi a jɛn inɔ, bi Kuoth kɔn moc riɛk.

²¹ Pa̱lɛ kɛ, duundiɛn ɣöö bikɛ la jiööp jiɛn matdä ji̱ I-thɛ-rɛl diaal kä bikɛ naath deth pi̱ bä.” Nɔmɔ ɛ jɛn min ci di̱t ɛ ca̱r naath.

²² Cu Jɔ-cua ɛ lar i̱ a ji̱ Gib-yon nööŋkɛ nhiamdɛ kä cuɛ kɛ ben thi̱ec i̱, “Ɛŋu mëë mɛ̈tdɛ kɔ i̱ biaa ni nɔ̱nä kä tia̱ niɛ wanɛ?

²³ Ca yɛ bit kɛ ɣöö cia nɛmɛ la̱th, kä bi nɛɛkun a kuaany ni ciaŋ, bikɛ a jiööp jiɛn kɛnɛ deth pi̱i̱ni kɛ kui̱ luaak Kuɔthdä.”

²⁴ Cukɛ jɛ loc i̱, “Cakɔ nɛmɛ cäp, kuäär, kɛ ɣöö cakɔ liŋ kɛ thuɔ̱k ɛn ɣöö ci Kuothdun ni Kuoth Nhial kuanydɛ ni Muthɛ la̱t laat kɛ ɣöö bɛ yɛ ka̱m ro̱l ɛmɛ ni kɛɛliwdɛ, kä bia ji̱kɛ diaal näk cothädun thi̱n. Kɛ kui̱ ɛmɔ cakɔ cu dual kɛ rɔ̱ kɛ kui̱dun, kä cakɔ jɛ cu la̱t.

²⁵ Täämɛ, kɔn ta̱kɔ te̱tniku, lätni kɔ kä min go̱o̱ri.”

²⁶ Ɛ jɛn cu Jɔ-cua kɛ lät kä nɛmɛ, cuɛ kɛ gaŋ kä ji̱ I-thɛ-rɛl kä cuɛ kɛ kän te̱tädiɛn.

²⁷ Kä niɛ guäth ɛmɔ bä, cuɛ kɛ jak kä kuaany ti ba jiɛn jɔp kä bikɛ ji̱ I-thɛ-rɛl diaal kɛnɛ yi̱k Kuɔth Nhial la dethkɛ pi̱. Ɛ la̱tdiɛn mi ci duth thi̱n amäni wa̱lɛ guäth palä in ci Kuoth Nhial ɛ mɛk.