Jɔ-cua 8 - RUAC KUƆTH IN RƐL RƆ

Däk Aay

¹ Ɛ jɛ inɔ, cu Kuoth Nhial Jɔ-cua ku jiök i̱, “/Cu lɛ dual täämɛ, ɛ ŋa̱a̱th ni ji̱n kä naŋni ji̱ ko̱o̱r diaal Aay wër käpni jɛ ko̱r. Ɣän cä ji̱ jak kä bi kuäär in di̱i̱t kä Aay tiam, bi nɛɛkɛ diaal amäni wecdɛ kɛnɛ pëk wecdɛ kɛɛliw a nyinku pa̱ny.

² Yɛn latdɛ Aay kɛnɛ kuäärɛ mëë cia la̱t Jɛ-ri-ko kɛnɛ kuäärɛ, duundɛ ɣöö ɛn kɛɛl ɛ bia kuak kɛnɛ ɣɔ̱k ka̱n ala nyinkun. Rialɛ rɔ̱ ikä kä makɛ rɛk piny kä dhɔaamɛ jɛ kɛ jɔkdɛ.”

³ Ɛ jɛn inɔ, cu Jɔ-cua rɔ rial ikä kɛ ɣöö bɛ wä Aay kɛnɛ rɛm köörɛ diaal. Cuɛ nɛy ti bathdɔɔri ti jiɛn diɔ̱k kuany kä lathkeerikɛ tin buɔ̱m buɔ̱ɔ̱m, kä cuɛ kɛ däk kä piny kɛ wäär.

⁴ Cuɛ kɛ jiök i̱, “Nɛ̈nɛ jɛ, yɛn bia wä kɛ jɔk rɛ̈ɛ̈k, kä bia jɛ wä tɔ̱c ikä. /Cuɔrɛ nɔ̱a̱n ɛlɔ̱ŋ kɛ jɛ, kä yɛn diaal ɛ wuɔ̱thkun te nhial kɛ rɛmdɛ ikä.

⁵ Ɣän kɔnɛ gatdɛ diaal bakɔ jɛ wiɛr rɛɛk. Mi wä ji̱ Aay kɔ lor kɛ ko̱r ce̱tkɛ mëëdan, bakɔ rɔ̱ cu bar kɛ kɛ.

⁶ Kɛn ba kɔ joc amäni mi cakɔ kɛ naŋ dɔɔr ɛ lɛm lɛm. Bikɛ cu dhɔŋ ni ɣöö barkɔ ni rɔ̱ kɛ kɛ ce̱tkɛ mëëdan ëë juɔckɛ kɔn.

⁷ Kɔɔrɛ, bia cu ri̱i̱ŋ guäth in cia rɔ̱ tɛ̱̈ɛ̱̈ thi̱n kä bia rɛk cu mac. Bi Kuoth Nhial in la Kuothdun ɛ ka̱m yɛ.

⁸ Mi wiaa rɛk ku ka̱n, kuɛ̈ɛ̈ jɛ cua̱th nikɛ ruac ëë ci Kuoth Nhial ɛ lat. Yɛn liɛŋɛ laat ɛ tɔ̱ agɔaa.”

⁹ Ɛ jɛn, cu Jɔ-cua kɛ ja̱k, kä cukɛ wä guäth in wa rɔ̱ tɛ̱̈ɛ̱̈ thi̱n, kä cukɛ liɛp thi̱n tɔ̱ɔ̱cä kamä Beth-ɛl kɛnɛ Aay kui̱c konyä ca̱ŋ Aay. Kä ɛn Jɔ-cua cuɛ niɛɛn wi̱c ɛn wäär ɔ.

¹⁰ Kä mëë ruɔ̱ndɛ cuɛ ke̱e̱r ni bakä kä cukɛ kɛ böth Aay, jɛn kɛnɛ di̱t I-thɛ-rɛl.

¹¹ Cukɛ wä, jɛn kɛnɛ bua̱n lathkeerikɛ kä cukɛ lot ni nhiam rɛ̈ɛ̈k kä cukɛ wä yiëth caam rɛ̈ɛ̈k, tekɛ kui̱c täpä mi te kamädiɛn kɛ Aay.

¹² Cuɛ nɛy ti bathdɔɔri da̱ŋ dhieec ka̱n, kä cuɛ kɛ jak kä wa ji̱ rɛ̈ɛ̈k tɔ̱c ikä kui̱c rɛ̈ɛ̈k kä kony cäŋ, kamä rɛ̈ɛ̈k ɛmɔ kɛnɛ rɛk in cɔal i̱ Beth-ɛl.

¹³ Inɔ, cua ji̱ ko̱o̱r däk kä gua̱thnikiɛn kä te luɔ̱th in di̱i̱t kui̱c caam rɛ̈ɛ̈k, kä te thariɛn kä kony cäŋ. Ɛ ni Jɔ-cua kärɔa, cu niɛɛn rɛy täpä mɔ.

¹⁴ Mëë ci kuäär in di̱i̱t kä Aay nën, cuɛ jiɛn kɛɛl kɛ nɛɛkɛ diaal, kä cukɛ riŋ kɛ pɛ̈th kɛ ɣöö bikɛ ko̱r wä röm kɛ ji̱ I-thɛ-rɛl guäth ëë kɔn kɛ ko̱r röm thi̱n rɛy täpä min lot rɔ kɛ pan Ä-ra-ba, kueckɛ ɣöö ca kɛ tɔ̱c ikä jɔk rɛ̈ɛ̈k.

¹⁵ Kä cu Jɔ-cua kɛnɛ ji̱ I-thɛ-rɛl diaal rɔ̱ bar kɛ ca̱p ala nɛy ti ca buɔ̱k, kä cukɛ rɔ̱ bar kɛ duɔ̱ɔ̱p in wä däär paan.

¹⁶ Ɛ jɛn inɔ, cu ji̱ rɛ̈ɛ̈k diaal rɔ̱ ko̱k kɛ ɣöö bikɛ naath joc, kä mëë juɔckɛ Jɔ-cua ɛ kɛn, cua kɛ buath dɔɔr kä cu rɛk duɔth.

¹⁷ Thilɛ ram kɛl mi cu duɔth kä Aay kiɛ Beth-ɛl mi dëë a ram mi ci lɔ̱ɔ̱ŋ jucä ji̱ I-thɛ-rɛl. Kɛn diaal cukɛ rɛk ba̱ny piny baaŋ, kä cukɛ ji̱ I-thɛ-rɛl gur kä lɛɛr.

¹⁸ Ɛ jɛn, cu Kuoth Nhial Jɔ-cua lɛ jiök i̱, “Nyoth Aay kɛ jɛn kɛɛt ɔ te te̱tädu mɔ, ɣän ka̱mä rɛk ɛmɔ ji̱ täämɛ.” Cu Jɔ-cua ɛ liŋ ni kä kɛɛl.

¹⁹ Kä ɛ niɛ min kapɛ tetdɛ nhial, cu nɛy tin ca wec tɔ̱c ikä rɔ̱ jiɛc kä riŋkɛ rɛɛk kɛ pɛ̈th kä cukɛ jɛ ka̱n kä cukɛ jɛ pɛ̈th kɛ cuäth.

²⁰ Kä guäth ëë ku ji̱ Aay tëë juɔckɛ gaat I-thɛ-rɛl lɛ liɛɛc, cukɛ nɛn ni rɛk mi ci tolɛ räth ni pua̱a̱r, kä kɛ ɣöö ci ji̱ I-thɛ-rɛl tëë barkɛ rɔ̱ däär dɔaar rɔ̱ riet kɛ, ɛ wa̱nɔ, cikɛ cu thil gua̱a̱th mi dëë rɔ̱ bar kɛ jɛ.

²¹ Kä mëë ci Jɔ-cua kɛnɛ ji̱ I-thɛ-rɛl diaal ɛ nɛn i̱ ci bi̱eem rɛk ka̱n kä cikɛ tol rɛ̈ɛ̈k nɛ̈n ni pua̱a̱r, cukɛ luɔc kä cukɛ ji̱ Aay cɔ̱k.

²² Kä cu tin te rɛɛk kɛ ŋak. Ɛ jɛn cu ji̱ I-thɛ-rɛl ji̱ Aay cu göl däär kä cukɛ kɛ näk a thil duɔth. Thilɛ ram mi cu kään kiɛ cu kaac,

²³ ɛ ni kuäär in di̱i̱t kä Aay ɛn in cua käp kɛ tëkdɛ, kä cua jɛ nöŋ ni Jɔ-cua.

²⁴ Cu ji̱ I-thɛ-rɛl ji̱ tɛ̈r diaal näk däär dɔaar guäth ëë ca kɛ juɔ̱ɔ̱c thi̱n ɛ ji̱ tɛ̈riɛn. Kɛ kɔrɛ cukɛ ben Aay kä cukɛ nɛy diaal tin ŋot thi̱n ben ŋɛ̈r piny kɛ thɛp.

²⁵ Kä ɛn cäŋ ɛmɔ pa̱ny cua nɛy ti bathdɔɔri wäl wi̱cdiɛn rɛw lap piny,

²⁶ kɛ ɣöö /ken Jɔ-cua tetdɛ luɔ̱ɔ̱c piny amäni mëë ci nɛy diaal thuuk kɛ lia̱a̱ kä Aay.

²⁷ Ɛ ni ɣɔ̱k kärɔ̱ kɛnɛ kuak wec ɛmɔ tëë cua ka̱n ala nyinkiɛn tin pɛ̈ɛ̈c nikɛ mëë ci Kuoth Nhial ɛ la̱r Jɔ-cua.

²⁸ Ɛ jɛn inɔ, cu Jɔ-cua Aay cua̱th, kä cuɛ jɛ jak kä di̱r dhiac. Ɛ jɛn ta̱a̱dɛ min ŋot thi̱n amäni täämɛ.

²⁹ Cuɛ kuäär Aay in di̱i̱t ŋap jiaath kä cuɛ ri̱i̱ŋdɛ jak kä but thi̱n amäni thiaŋ. Kä guäth in kony kɛ cäŋ, cuɛ naath jiök ba jɛ woc, kä cua jɛ yuɔr piny thok rɛ̈ɛ̈k wec kä cukɛ jɛ buɔ̱th piny kɛ buɔ̱n päämni mi di̱i̱t mi ŋot thi̱n amäni täämɛ.

Kuën buɔk ŋuɔ̱tni wi̱i̱ Pa̱a̱m Ee-bal

³⁰ Täämɛ cu Jɔ-cua Kuoth Nhial ni Kuoth ji̱ I-thɛ-rɛl ku ta̱th yi̱k wi̱i̱ pa̱a̱m Ee-bal

³¹ ce̱tnikɛ mëë ci Muthɛ in la kuany Kuɔth Nhial ɛ la̱r gaat I-thɛ-rɛl i̱ ba la̱t, ce̱tnikɛ min ca gɔ̱r rɛy Buɔk Ŋuɔ̱tni Muthɛ i̱, “Yi̱k mi ca täth kɛ pääm ti /ka̱n kuac kä /ka̱n jɔp kɛ yieeth.” Kä cukɛ muc ti waaŋ thöp Kuoth Nhial wi̱i̱dɛ, kä cukɛ jɛ nääk kä ɣɔ̱k ti muc kɛ kui̱ miɛth nyuaakädiɛn.

³² Kä ɛn wani nhiam ji̱ I-thɛ-rɛl, cu Jɔ-cua ruac mi te rɛy buɔk ŋuɔ̱tni Muthɛ gɔ̱a̱r puɔ̱ɔ̱ny päämni tɔ̱tɔ̱, jɛn ruac ëë ci Muthɛ ɛ lat kɛ kui̱ ji̱ I-thɛ-rɛl.

³³ Kɛn ji̱ I-thɛ-rɛl diaal kɛɛl kɛ gaat tutnikiɛn, kɛ kua̱r lätnikiɛn, kɛ ruëëckiɛn amäni jur tëë te rɛydiɛn, cukɛ cuɔ̱ŋ kui̱cni thanduɔ̱k matdä Kuɔth da̱ŋ rɛw, te bööth palä kä ji̱ Lii-bay tëë kapkɛ jɛ dääriɛn. Ci tha̱a̱ŋkiɛn jɔkdiɛn riet pa̱a̱m Gɛ-ri-dhim kɛnɛ tha̱a̱ŋkiɛn pa̱a̱m Ee-bal. Nɛmɛ ɛ mëë ci Muthɛ in la kuany Kuɔth Nhial ɛ lar i̱ ba la̱t mi wä gua̱a̱th in ba poth nikɛ cop.

³⁴ Ɛ jɛn, cu Jɔ-cua ŋuɔ̱t diaal ku kuen kɛ, ruaacni puthä kɛnɛ bit diaal, nikɛ ta̱a̱ in ca gɔ̱ɔ̱r nikɛ rɛy buɔk ŋuɔ̱tni.

³⁵ Kɛn ŋuɔ̱t diaal tëë ci Muthɛ kɛ gɔ̱r, cu Jɔ-cua kɛ kuen ji̱ I-thɛ-rɛl diaal tëë ci duɔl, kɛ män kɛ gaat amäni jur tëë te rɛydiɛn. Thilɛ riet kɛl mi cuɛ ba̱ny jɔ̱ɔ̱r.