Jɔ-cua 7 - RUAC KUƆTH IN RƐL RƆ

Duer A-ka̱n

¹ Cu Kuoth Nhial lɔcdɛ pua̱a̱r ɛlɔ̱ŋ kɛ gaat I-thɛ-rɛl kɛ ɣöö cikɛ ruacdɛ to̱l, kɛ ɣöö tëë kɛ wut mi cɔal i̱ A-ka̱n gat Kar-mi gat Dhab-di gat Dhɛra rɛy döör Juda mi ci rɔ moc kuakni tëë ca la̱th däkä.

² Täämɛ cu Jɔ-cua naath ja̱k ni kä Jɛ-ri-ko kɛ ɣöö bikɛ wä rɛɛk mi cɔal i̱ Aay mi thie̱e̱k kɛ dhɔr mi cɔal i̱ Beth-a-wɛn mi te kui̱c käny cäŋ rɛ̈ɛ̈k in cɔal i̱ Beth-ɛl, kä cuɛ kɛ jiök i̱, “Wiaa liɛmɛ pëk wec ɛmɔ.” Cukɛ wä kä cukɛ rɛydɛ wä lim.

³ Mëë cikɛ wä luny jɔk, cukɛ Jɔ-cua ben jiök i̱, “Thilɛ luɔt mi dëë wä ni nɛy diaal kɛ jɛ. Aay go̱o̱rɛ ni nɛy ti bathdɔɔri rɛw kiɛ diɔ̱k ti dëë jɛ wä mak piny. A nɛy diaal /ci cuc kɛɛl, kɛ ɣöö ɛ rɛk mi tɔt.”

⁴ Ɛ inɔ, cu bua̱n nath ti bathdɔɔri da̱ŋ diɔ̱k ko̱r kap Aay, duundɛ ɣöö cu ji̱ Aay kɛ rieet jɔk.

⁵ Cukɛ kɛ joc ni thok rɛ̈ɛ̈k kä Aay, cua kɛ ben päl ni guäth mi cɔal i̱ Cɛ-ba-rim a cukɛ ji̱ I-thɛ-rɛl ti jiɛn da̱ŋ diɔ̱k wi̱cdɛ bäkɛl näk benädiɛn piny wi̱i̱ bi̱lä. Kä cu nɛy diaal lo̱ckiɛn jiɛ̈th ɛlɔ̱ŋ a cukɛ lua̱a̱ny kɛ mer.

⁶ Ɛ jɛn, cu Jɔ-cua kɛnɛ di̱t I-thɛ-rɛl bieynikiɛn rɛ̈t kɛ jiɛ̈th lɔaay, kä cukɛ rɔ̱ yuɔr piny buupä nhiam thandukä matdä Kuɔth Nhial. Cukɛ te thi̱n amäni kony ca̱ŋ a cikɛ wuɔ̱thkiɛn buk kɛ ŋɛ̈th.

⁷ Kä cu Jɔ-cua la̱ŋ, cuɛ wee i̱, “Aɣ, Kuäärä ni Kuoth Nhial. Ɛŋu mëë curi kɔ nyäk kɛ nooŋ kui̱c Jɔr-dɛn ɛmɛ kä bi kɔ cu ben thöp ji̱ Ɛ-mor, kɛ ɣöö ba kɔ cu nor? /Ci dëë gɔaa ni mi cakɔ cu te kui̱c in dɔ̱ŋ kä Jɔr-dɛn?

⁸ Aɣ, Kuäär, bä jɛ lɛl i̱ di, mi ci ji̱ I-thɛ-rɛl jɔkdiɛn riet ji̱ tɛ̈riɛn ɛ!

⁹ Täämɛ bi ji̱ rööl Kɛ-naan amäni pëk rööl in dɔ̱ŋ kɛɛliw ɛ liŋ, kä bikɛ kɔ go̱l kä ba kɔ cu näk kɔn diaal. Ɛn guäth ɛmɔ, ji̱n bi kɛ̈kdu kulɛ yiath kä ŋu?”

Luɔc Kuɔth Nhial

¹⁰ Cu Kuoth Nhial Jɔ-cua loc i̱, “Ɛŋu mi lätdi tɔ̱ɔ̱cä? Jiɛc rɔ.

¹¹ I-thɛ-rɛl cɛ duer la̱th. Kɛn cikɛ ruac ëë cä guɔ̱k kɛ ya̱r. Cikɛ rɔ̱ moc kä ŋɔaani tin thɛ̈kɛ. Ca kɛ kual kä cikɛ kɛ kur, cikɛ tɔ̱tɔ̱ cu mat kuaknikiɛn.

¹² Kɛ kui̱ ɛmɔ, /ci gaat I-thɛ-rɛl ko̱r ji̱ tɛ̈riɛn dëë me̱t luäŋ. Täämɛ cikɛ jio̱kiɛn riet gua̱n tɛ̈riɛn kɛ ɣöö kɛn ji̱ I-thɛ-rɛl pua̱nykiɛn ca kɛ kuɛ̈th nuɔɔr. Ɣän /cä bi lɛ ŋot kɛ ta̱a̱ kɛɛl kɛ yɛ, ɛ ni mi wiaa ŋɔak diaal tin thɛ̈kɛ woc rɛydun kä bia kɛ nor.

¹³ Jiɛcni täämɛ kä wër jakni naath kä gɔw pua̱nykiɛn kä jio̱kni kɛ rialɛ rɔ̱ ikä kɛ bendun kä ɣä iruun, jio̱kni kɛ i̱, ‘Lö I-thɛ-rɛl, yɛn a ŋɔak tia̱ rɛydun kä tëë cä yɛ jiök i̱ bia nor. Kɛ kui̱ ɛmɔ, yɛn cia thil lua̱ŋ kɛ ji̱ tɛ̈run amäni mi wiaa kɛ nor.

¹⁴ Ku jɛ la̱r kɛ i̱ iruun waaŋ bikɛ ben nhiamdä kɛn diaal dööri, kä do̱r in wä Kuoth Nhial ɛ kuɛth, bɛ rɔ luay thukni duëli, kä thok duëël in wä Kuoth Nhial ɛ lɛni nyoth bä, bɛ rɔ luay gɔali, amäni gɔl in wä Kuoth Nhial ɛ nyoth, bi ji̱ cieeŋdɛ rɔ̱ luay kɛli.

¹⁵ Kä ram in ba ŋɔak tin ca ley Kuoth je̱k kä jɛ, jɛn ba waŋ, puɔ̱nydɛ kɛɛl amäni ji̱ cieeŋdɛ pa̱ny kɛnɛ ŋɔak diaal tin tekɛ jɛ, kɛ ɣöö cɛ gukdä ya̱r, kä cɛ I-thɛ-rɛl moc buar.’ ”

Näk gua̱n dui̱rä

¹⁶ Ɛ jɛn cu Jɔ-cua ke̱e̱r nikɛ run waŋ, kä cuɛ ji̱ I-thɛ-rɛl jak kä luaykɛ rɔ̱ dööri kɛl kɛ̈ɛ̈li. Kä cu do̱r Juda jɔɔc.

¹⁷ Cuɛ do̱r Juda jak kä luaykɛ rɔ̱ thukni duëli, kä cu thok duëël Dhɛra jɔɔy. Cuɛ thok duëël Dhɛra jak kä luaykɛ rɔ̱ kɛli, kä cu cieeŋ Dhab-di jɔɔy.

¹⁸ Kä cuɛ cieeŋ Dhab-di jak kä luaykɛ rɔ̱ kɛli, kä cu gat wutdä mi cɔal i̱ Kar-mi ni A-ka̱n jɔɔy, gua̱ndɔɔŋ A-ka̱n ɛ Dhab-di min mɔ gat Dhɛra raan döör Juda.

¹⁹ Cu Jɔ-cua A-ka̱n ku jiök i̱, “Gatdä, luthni Kuoth Nhial ni Kuoth ji̱ I-thɛ-rɛl, kä lat thuɔ̱k lɔaacdu, kä moc Kuoth liak. Lar min ci lɛl täämɛ. /Cu jɛ bi tɛ̱̈ɛ̱̈ kɛ ɣä.”

²⁰ Cu A-ka̱n ɛ loc i̱, “Ɛpuc, ɣän cä Kuoth Nhial in la Kuoth ji̱ I-thɛ-rɛl jio̱l ikä, kä duerä mɛn.

²¹ Rɛy kuakni tëë canɛ pɛc cä bi̱i̱ mi bëë kä Bɛ̈-bi-lɔn bɛc kɛnɛ ti ce̱tkɛ rɛɛm yie̱e̱thä ti tɔt kɛnɛ ciɛk dääpä mi tɔt. Täämɛ, cä kɛ muɔl piny rɛy kɛmɛkädä, kä te yieeth piny i̱.”

²² Inɔ, cu Jɔ-cua naath ku ja̱k, kä cukɛ riŋ rɛy kɛmɛkä, kä cua kɛ wä je̱k piny rɛy kɛmɛkädɛ kä te yieeth pinydiɛn.

²³ Cukɛ kɛ ka̱n kä cukɛ kɛ nöŋ Jɔ-cua kɛnɛ ji̱ I-thɛ-rɛl diaal. Kä cukɛ kɛ ben la̱th piny nhiam Kuɔth Nhial.

²⁴ Ɛ jɛn, cu Jɔ-cua kɛɛl kɛ ji̱ I-thɛ-rɛl diaal A-ka̱n käp kɛnɛ läŋ yie̱e̱thä kɛ bi̱i̱ in bäär kɛ jɛn ciɛk dääpä, matdiɛn diaal amäni gaat A-ka̱n, ɣɔ̱ɔ̱kɛ kɛ muɔ̱likɛ kɛnɛ detkɛ, kɛmɛdɛ kɛnɛ ŋɔakɛ tin kɔ̱kiɛn diaal, kä cukɛ kɛ naŋ guäth mi cɔal i̱ Ta̱p A-kor.

²⁵ Ɛn wani, cu Jɔ-cua jɛ jiök i̱, “Min mooci ni kɔ riɛk ɛmɛ biɛ dhil lar. Kä ɛn wa̱lɛ bi Kuoth Nhial ji̱ lɛ moc riɛk.” Cukɛ A-ka̱n bök kɛ pääm ɛ kɛn diaal, kä cukɛ ji̱ cieeŋdɛ näk kɛ bo̱kni, kä cukɛ kɛ cua̱th kɛn diaal amäni nyinkɛ diaal.

²⁶ Cukɛ A-ka̱n di̱er piny kɛ buɔ̱n päämni ti te thi̱n amäni wa̱lɛ. Ɛ jɛn luɔt kä min cɔaalkɛ gua̱a̱th ɛmɔ i̱ Ta̱p A-kor amäni wa̱lɛ. Ɛ jɛn, cu Kuoth Nhial ŋɛ̈ɛ̈nydɛ cu luäär.