Jɔ-cua 6 - RUAC KUƆTH IN RƐL RƆ

Käni Jɛ-ri-ko

¹ Täämɛ cua Jɛ-ri-ko thuk pa̱nynikɛ diaal lɛk kä thi̱n ni bum kɛ kui̱ gan I-thɛ-rɛl, kä thilɛ ram mi nhökɛ coth rɛc kiɛ kac raar.

² Ɛ jɛn, cu Kuoth Nhial Jɔ-cua lɛni jiök i̱, “Ɣän täämɛ ka̱mä Jɛ-ri-ko ji̱ kɛɛl nikɛ rue̱e̱cdɛ amäni lathkeerikɛ tin buɔ̱m buɔ̱ɔ̱m.

³ Kɛ pëk ni̱ni da̱ŋ bäkɛl yɛn bia jɔk rɛ̈ɛ̈k dhil gul kɛ luɔc kɛl kɛ cäŋ, yɛnɛ rɛm kööru.

⁴ Kä bi bööth palä da̱ŋ bärɔw rɔ̱ moc tuɔ̱ŋ ruaath rɔmä da̱ŋ bärɔw kä bikɛ kɛ kuoth nhiam thanduɔ̱k matdä, kä kɛ cäŋ in bärɔwdiɛn bia rɛk gul ni kä bärɔw, kuɔthkɛ kaaŋni ɛ bööth palä.

⁵ Kä mi wiaa kɛ wä liŋ kuɔthkɛ tuɔ̱ŋ ɛ tɔ̱ kɛ jɔw kɛl mi bäär, ɛn wa̱nɔ a nɛy diaal wak kɛɛl kɛ jɔw mi di̱i̱t, kä bi pa̱nyni rɛ̈ɛ̈k tɛɛth, kä bi rɛm kɛɛliw cu coth rɛy wec, wir ram ɔ ni nhiamdɛ.”

⁶ Cu gat Nun ni Jɔ-cua bööth palä cɔl kä cuɛ kɛ jiök i̱, “Kapɛ thanduk matdä kä a nɛy da̱ŋ bärɔw rɛydun böthkɛ yɛ kɛ kaaŋni tuɔ̱ŋni rɔɔmni.”

⁷ Kä cuɛ naath cu jiök i̱, “Wiaa ja̱lɛ kɛ jɔk wec kä a nɛy diaal tin ji̱ ko̱o̱r böthkɛ thanduk matdä Kuɔth Nhial.”

⁸ Ce̱tkɛ mëë ci Muthɛ ruac kɛ naath, cu bööth palä da̱ŋ bärɔw tin rɔamkɛ kaaŋni tuɔ̱ŋni deet nhiam Kuɔth Nhial wä nhiam, ɛ kuɔthkɛ kaaŋni, kä guɔ̱ɔ̱rkɛ kɛ ɛ thanduk matdä ruac Kuɔth Nhial.

⁹ Kä cu wutni köör bööth palä tin kuɔthkɛ kaaŋ guɔ̱ɔ̱r. Kä cu ga̱a̱ŋ jɔak thanduk matdä ruac guɔ̱ɔ̱r, kä kuɔthkɛ kaaŋ a thil cuɔ̱ŋ.

¹⁰ Kä ci Jɔ-cua nɛy diaal gök ɛn ɣöö /cikɛ bi rɔal, kä bikɛ biɛt ɛtil amäni cäŋ in wëë kɛ wä la̱r lär.

¹¹ Ɛ jɛn cuɛ bua̱n nɛɛni tɔ̱tɔ̱ ku jak kä guɔ̱lkɛ jɔk wec kä kɛɛl kɛ thanduk matdä Kuɔth Nhial. Kɛ kɔrɛ cukɛ luny niɛɛn gɔalikiɛn.

¹² Ɛ jɛn cu Jɔ-cua rɔ jiɛc kɛ runwaŋ, kä cu bööth palä thanduk matdä ruac Kuɔth Nhial ka̱n.

¹³ Kä cu bööth palä da̱ŋ bärɔw tin rɔamkɛ kaaŋni tuɔ̱ŋni deet nhiam Kuɔth Nhial wä nhiam, kuɔthkɛ kaaŋni a thil cuɔ̱ŋ. Kä cu wutni köör wä nhiamdiɛn, kä cu ga̱a̱ŋ jɔak thanduk matdä ruac Kuɔth Nhial guɔ̱ɔ̱r, kä kuɔthkɛ kaaŋ a thil cuɔ̱ŋ.

¹⁴ Kɛ jɛn cäŋ in rɛwdɛ cukɛ rɛk gul kä kɛɛl kä cukɛ luny niɛɛn gɔalikiɛn. Cukɛ nɛmɛ la̱t kɛ ni̱n da̱ŋ bäkɛl.

¹⁵ Kä kɛ ni̱en in bärɔwdiɛn, cukɛ ke̱e̱r ni pöt, cukɛ rɛk gul ni kä loc bärɔw ni kɛn jɛn ta̱a̱diɛn in wen. Nɛmɛ kärɔa ɛ jɛn ni̱en in kɛl in cikɛ rɛk gul ni kä loc bärɔw thi̱n.

¹⁶ Kɛ luɔc in bärɔwdiɛn guäth in kuɔthkɛ kaaŋni ɛ bööth palä kɛ jɔw mi bäär, cu Jɔ-cua nɛɛkɛ jiök i̱, “Kua kac nhial kɛ jɔw mi di̱i̱t kɛ ɣöö ci Kuoth Nhial rɛk ɛmɛ ka̱m yɛ.

¹⁷ Jɛn rɛk puɔ̱nydɛ ba dhil nor ɛwic amäni ŋɔak diaal tin te rɛydɛ ala luuri ti muc kɛ kui̱ Kuɔth Nhial, ba päl ni ciɛk in riär in cɔal i̱ Ra-ɣab kɛnɛ nɛy diaal tëë te cieŋdɛ kɛ ɣöö cikɛ lieem tëë canɛ ja̱k kur.

¹⁸ Kä /cuɔrɛ duɔ̱ɔ̱r gue̱e̱r kä ŋɔak diaal tin ca la̱th däkä. Kä mi /cɛ bia̱ jɛn inɔ, bia rɛy wec gan I-thɛ-rɛl nöŋ riɛk kɛnɛ da̱k.

¹⁹ Kä duundɛ ɣöö a ŋɔak diaal tin ca täth kɛ yieeth in bo̱r kɛnɛ da̱a̱p, kɛ dha̱a̱ri la̱ŋni kɛnɛ yieeth, a ti ca ley Kuoth Nhial, kä ba kɛ mat kuakni Kuɔth Nhial.”

²⁰ Ɛ jɛn, cu bööth palä kaaŋni kuoth, kä ɛ niɛ min ci naath ɛ liŋ, cukɛ wak kɛ jɔw mi di̱i̱t, kä cu pa̱ny rɛ̈ɛ̈k tɛɛth, kä cu ji̱ ko̱o̱r lɛny rɛy wec lot ram ɔ ni nhiamdɛ, kä cukɛ wec ka̱n.

²¹ Cukɛ nɛy diaal näk rɛy rɛ̈ɛ̈k, wutni kɛnɛ män, gaat amäni dɔŋ, cukɛ kɛ näk bä amäni ɣɔ̱k kɛnɛ det kɛ muɔ̱li.

Ka̱n Ra-ɣab

²² Ɛn wa̱nɛ mɛ, cu Jɔ-cua wutni da̱ŋ rɛw tëë ci kɔŋ ben ala lieem jiök i̱, “Wiaa kä riär indaan cieŋdɛ, kä nööŋɛ jɛ raar amäni ji̱ cieeŋdiɛn diaal nikɛ mat ruacdun in cia yaac rɔ̱.”

²³ Ɛ jɛn, cukɛ wä kä cukɛ Ra-ɣab nööŋ kɛɛl kɛnɛ gua̱n kɛ man kɛ dämani kɛnɛ duɔth ji̱ cieeŋdɛ diaal, kä cukɛ ben pua̱t guäth mi thie̱e̱k kɛ gua̱a̱th in ci ji̱ I-thɛ-rɛl pua̱t thi̱n.

²⁴ Kä cukɛ rɛk döp mac, amäni ŋɔak diaal tin te rɛydɛ, cu thil ni yieeth in bo̱r kɛ da̱a̱p kɛnɛ dha̱a̱ri la̱ŋni kɛnɛ yieeth, kä cukɛ kɛ la̱th rɛy luaak yio̱o̱ni Kuɔth Nhial.

²⁵ Ɛ ni Ra-ɣab in la riär ɛn ëë cu Jɔ-cua ɛ päl kɛɛl kɛnɛ ji̱ cieeŋdɛ kɛ cieeŋ gua̱ni diaal, kɛ ɣöö ci ciɛk ɛmɔ ji̱ luɔm kur kä Jɛ-ri-ko, kä jɛn akɛ kuay kä I-thɛ-rɛl ɛn täämɛ.

Bi̱et raam mi tääth Jɛ-ri-ko

²⁶ Ɛn ni̱ni tɔ̱tɔ̱ cu Jɔ-cua ruac mi bum ɛ tet la̱th piny kɛ gaat I-thɛ-rɛl kä cuɛ wee i̱, “Ni ram mi wä jɛ wä di̱l i̱ bɛ rɛk Jɛ-ri-ko ɛmɛ nyɔk kɛ ta̱th, ca kuɛth nhiam Kuɔth Nhial. Bɛ jɛ cuŋ kɛ kɛ̱̈ɛ̱̈dɛ, kä bɛ thi̱eknikɛ pua̱t kɛ pëëkdɛ.”

²⁷ Inɔ, cu Kuoth Nhial te kɛɛl kɛ Jɔ-cua, kä cu kɛ̈kdɛ ro̱l röm.