Jɔ-cua 5 - RUAC KUƆTH IN RƐL RƆ

Riɛk ji̱ kui̱c yiëër

¹ Täämɛ mëë ci kua̱r tin di̱t ro̱o̱l ji̱ Ɛ-mor kä kony cäŋ Jɔr-dɛn, kɛnɛ kua̱r tin di̱t ro̱o̱l ji̱ Kɛ-naan jɔk Bar in Bo̱r in te kam wi̱i̱ni, ji̱th ji̱ I-thɛ-rɛl liŋ, kɛnɛ ɣöö ci Kuoth Nhial yi̱er Jɔr-dɛn jak kä kööt amäni gua̱a̱th ëë ci ji̱ I-thɛ-rɛl käny kui̱c ni kɛn diaal, cukɛ dual ɛlɔ̱ŋ, kä cukɛ ŋɛ̈ɛ̈r kɛ kui̱ ji̱ I-thɛ-rɛl.

Cuël gan I-thɛ-rɛl kä Gil-gal

² Kɛn ni̱ni tɔ̱tɔ̱ cu Kuoth Nhial Jɔ-cua jiök i̱, “Moc rɔ ciɛ̈ɛ̈l pa̱a̱m ti moth kä nyɔk cuël gan I-thɛ-rɛl kɛ yiɛth piny.”

³ Cu Jɔ-cua rɔ cu moc ciɛ̈ɛ̈l pa̱a̱m kä cuɛ gaat I-thɛ-rɛl cuɛl kä Gib-ɛ̈th-ara-loth.

⁴ Mi go̱rɛ thar kä mëë lät Jɔ-cua ɛ ni nɔmɔ, jɛ mɛn. Kɛn nɛy diaal tëë la wutni, ni ɛ kɛn nɛy tëë tɔ̱ ji̱ wäth ko̱o̱r, cikɛ li̱w dup däär dɔaar guäth ëë cikɛ jiɛn kä I-jëp.

⁵ Cäŋɛ mëë ca ri̱c diaal tëë bëë raar kä I-jëp cuɛ̈l ni kɛn diaal bä, ɛ ni ɣöö ni mëë cikɛ jiɛn kä I-jëp, kɛn gaat tëë dhɔɔl tëë ca di̱eth lɛɛr jäl, /ka̱n kɛ cuɛ̈l,

⁶ kɛ ɣöö ci gaat I-thɛ-rɛl däär dɔaar luk kɛ run ti jiɛn ŋuaan, cu pëk nɛɛni diaal tëë bëë raar kä I-jëp kä ji̱ wäth ko̱o̱r thuɔ̱k kɛ lia̱a̱, kɛ ɣöö cikɛ ruac Kuɔth Nhial dhɔt. Kɛn nɛy tɔ̱tɔ̱ ci Kuoth Nhial ɛ dhil lar i̱ /cikɛ mun in cɛ la̱r gua̱ndɔɔŋnikiɛn i̱ ba dhil ka̱m gaatkiɛn bi nɛn, jɛn mun in la mun caak kɛnɛ lith tuar.

⁷ Kä kɛn gaatkiɛn tëë cɛ jak kä ŋua̱lkɛ gua̱th gua̱ni, kɛ kɛn tëë cu Jɔ-cua kɛ cuɛ̈l, kɛ ɣöö ŋot kɛ /ka̱n kɛ cuɛ̈l, thilɛ ram mi cikɛ cuɛl mëë tekɛ dup.

⁸ Mëë ci nɛy diaal ku thuɔ̱k kɛ cuël, cu naath te ni gua̱thnikiɛn rɛy wec amäni mëë cu buɔ̱ɔ̱tkiɛn luël.

⁹ Ɛ jɛn, cu Kuoth Nhial Jɔ-cua ku jiök i̱, “A tɛɛmɛ niɛ wa̱lɛ, cä kuëth in dëë kuëth ni yɛ ɛ ji̱ rööl I-jëp puɔth pua̱nynikun.” Kɛ kui̱ ɛmɔ, ci gua̱a̱th ɛmɔ ciötdɛ min ci duth jɛ raar amäni wa̱lɛ cua Gil-gal. Gil-gal kɛ thok ji̱ Ɣi-bɛ-ru lotdɛ ni mi ca puɔth.

Mi̱eth bälä kä Gil-gal

¹⁰ Mëë te ji̱ I-thɛ-rɛl kä Gil-gal cukɛ miɛth bälä nyɔk kɛ ti̱et, kä cukɛ jɛ rialikä kɛ cäŋ kä wäl ŋuaan kä pay, kɛ thiaŋdɛ, kä rɛmni Jɛ-ri-ko.

¹¹ Kɛ bakdɛ mëë ruɔ̱n niɛ cäŋ ɛmɔ pa̱ny cukɛ mi̱th rööl ɛmɔ me̱t, cukɛ pampam mi thil thuɔp cam kɛnɛ manytapni ti ca tuɔ̱ɔ̱p.

¹² Niɛ guäth ɛmɔ pa̱ny mëë cikɛ mi̱th rööl ɛmɔ me̱t, cu nup mi cɔal i̱ mana pɛ̈ɛ̈n päl. Kä /ken gaat I-thɛ-rɛl mana lɛ nyɔk nën. Kä mëë thilɛ mana mi lɛ te thi̱n, nikɛ jɛn ruɔ̱n ɛmɔ a wä nhiam, cu gaat I-thɛ-rɛl cam ni mi̱th diaal tin ciɛk ro̱o̱l Kɛ-naan.

Kuäär rɛ̈m Kuɔth Nhial

¹³ Täämɛ mëë te Jɔ-cua kä Jɛ-ri-ko, cuɛ let kä cuɛ wut mi te cuŋä nhiamdɛ nɛn, te tetdɛ kɛ thɛp mi ca guath go̱kädɛ. Cu Jɔ-cua wä kä jɛ kä cuɛ jɛ thi̱ec i̱, “Ɛ ji̱n raanda, kiɛ raan ji̱ tɛ̈ra?”

¹⁴ Cuɛ Jɔ-cua loc i̱, “Ëëy. Ɣän ta̱a̱ wan ɛmɛ ala kuäär rɛ̈m Kuɔth Nhial.” Ɛn wa̱nɛ mɔ, cu Jɔ-cua rɔ ka̱m mua̱a̱l, kä cuɛ jɛ läŋ, kä cuɛ jɛ jiök, “Kuäärä, ɛ ɣän kuanydu. Lar min dëë la̱t.”

¹⁵ Kä cuɛ jɛ jiök i̱, “Lony wa̱a̱riku, kɛ ɣöö ɛn gua̱a̱th ɛ cuŋi thi̱n ɛ thɛ̈kɛ jɛ.” Kä cu Jɔ-cua ɛ liŋ.