Jɔ-cua 4 - RUAC KUƆTH IN RƐL RƆ

Riäkni päämni

¹ Täämɛ mëë ci do̱r ɛmɛ ku thuɔ̱k kɛ kac kui̱c kɛɛliw, cu Kuoth Nhial Jɔ-cua jiök i̱,

² “Muɔcɛ rɔ̱ nɛy da̱ŋ wäl rɛw, ram kɛl do̱o̱r ɔ,

³ kä jakni kɛ kä kuënykɛ rɔ̱ rɛɛm päämni da̱ŋ wäl wi̱cdiɛn rɛw däär yiëër Jɔr-dɛn niɛ guäth in ci bööth palä cuɔ̱ŋ thi̱n, kä naŋɛ kɛ kä bia kɛ wä di̱r guäth in bia wä pua̱t thi̱n ɛn thiaaŋni.”

⁴ Ɛ jɛn, cu Jɔ-cua nɛy da̱ŋ wäl rɛw tin cɛ kuany ram ɔ do̱o̱r ɔ ku ciöl rɔ,

⁵ kä cuɛ kɛ jiök i̱, “Wiaa kä luɔcɛ yie̱e̱r dhɔ̱a̱ŋɛ thanduk matdä Kuɔthdun ni Kuoth Nhial cɔ̱ɔ̱r, kä wiaa ni däär yiëër kä a ram ɔ kä yɛ wä jiarɛ moc kɛ päm mi bɛ kap, pääm ti päär pëkdiɛn nikɛ kɛn döör ji̱ I-thɛ-rɛl.

⁶ Kɛn bikɛ la nyuth ti̱mä rɛydun, kɛ ɣöö cäŋ kɛl in wä gaatkun yɛ thi̱ec kɛ min luɔtkɛ,

⁷ bia jɛ la̱r kɛ i̱ nɛɛnɛ, mëë jiɛ̈thkɛ thanduk matdä Kuɔth Nhial ni yi̱er Jɔr-dɛn, cu löny yiëër ɛmɔ cuɔ̱ŋ kä cu pi̱kɛ rɔ̱ gɛy. Kɛ kui̱ ɛmɔ bi gaat I-thɛ-rɛl diaal lua̱ŋ Kuɔth Nhial a tiim ni ciaŋ kɛ kɛn pääm ti̱ti̱.”

⁸ Kä cu ji̱ I-thɛ-rɛl la̱t niɛ min ci Jɔ-cua ɛ la̱r kɛ. Cukɛ pääm tɔ̱tɔ̱ nööŋ wi̱c kä cukɛ kɛ ben la̱th piny thi̱n.

⁹ Ɛn wa̱nɔ, ci Jɔ-cua pääm da̱ŋ wäl rɛw ka̱n bä, kä cuɛ kɛ la̱th guäth ciökni kua̱ri palä min cikɛ cuɔ̱ŋ thi̱n kä ka̱pkɛ thanduk matdä däär yiëër Jɔr-dɛn. Kɛn pääm ɛ tɔ̱ kɛn a guäthdiɛn amäni wa̱lɛ.

¹⁰ Ɛn wa̱nɔ, ŋot bööth palä tin kapkɛ thanduk matdä cuŋä däär yiëër Jɔr-dɛn, amäni mëë wa tëë ca la̱t Jɔ-cua ɛ Kuoth Nhial kɛ thok Muthɛ thuk kɛ läth gua̱thnikiɛn. Cu naath rɔ̱ ku thuɔl kui̱c kɛ pɛ̈th.

¹¹ Min cikɛ rɔ̱ kuɛr kui̱c yiëër ɛwic, cu bööth palä ben räth nhiam kɛ thanduk matdä Kuɔth Nhial.

¹² Kä cu gaat Rɛ-u-ben kɛ gaat Gad kɛ tha̱a̱ŋ gan Ma-na-thɛ jiɛth kui̱c kɛ yio̱w kööriɛn nhiam ji̱ I-thɛ-rɛl ce̱tkɛ mëë ca larkɛ ɛ Muthɛ.

¹³ Cu nɛy ti bathdɔɔri ŋuaan ti ji̱ köör jiɛth kui̱c nhiam Kuɔth Nhial wäkɛ dɛɛkä Jɛ-ri-ko kɛ ko̱r.

¹⁴ Ɛn cäŋ ɛmɔ pa̱ny, cu Kuoth Nhial di̱t Jɔ-cua re̱p rɛy ji̱ I-thɛ-rɛl diaal, kä cukɛ jɛ luɔ̱th ni thiɛkä kɛ pëk te̱e̱kädɛ kɛɛliw ce̱tnikɛ mëë cikɛ Muthɛ luɔ̱th inɔ.

¹⁵ Mëë cikɛ te kui̱c ni kɛn diaal, cu Kuoth Nhial Jɔ-cua lɛni jiök i̱,

¹⁶ “Jakni bööth palä tin kapkɛ thanduk matdä kä bëë raar yie̱e̱r Jɔr-dɛn.”

¹⁷ Cu Jɔ-cua kɛ ku ciööl raar.

¹⁸ Cu bööth palä tin kapkɛ thanduk matdä ben raar ni däär yiëër Jɔr-dɛn kä ɛ niɛ min cup ciökiɛn köötdä, cu pi̱ yiëër Jɔr-dɛn loc guäthdiɛn kä cuɛ thia̱a̱ŋ nyɔk nikɛ ta̱a̱ in wänkä.

Copdiɛn kä Gil-gal

¹⁹ Ɛ jɛn mëë jiɛ̈thkɛ yi̱er Jɔr-dɛn ɛ naath kɛ cäŋ kä wäl paay in cɔal i̱ duɔ̱ɔ̱ŋ, cukɛ ben pua̱t kä Gil-gal kui̱c känyä ca̱ŋ Jɛ-ri-ko.

²⁰ Kä cu Jɔ-cua pääm tëë ca ka̱m raar däär yiëër Jɔr-dɛn ben di̱er piny kä Gil-gal.

²¹ Cuɛ gaat I-thɛ-rɛl lɛ jiök i̱, “Mi wa yɛ thiëc ɛ gaatkun cäŋ kɛl kɛ min ŋa̱cɛ kɛ kui̱ päämni ti̱ti̱,

²² a jɛ ŋa̱ckɛ ɛ gaatkun i̱ ci ji̱ I-thɛ-rɛl ben kui̱c Jɔr-dɛn ɛmɛ kɛ duɔ̱ɔ̱p mi kööt.

²³ La̱rɛ jɛ kɛ i̱ ci Kuothdun ni Kuoth Nhial yi̱er Jɔr-dɛn jak kä kööt kɛ kui̱dun amäni mëë cia ben kui̱c, ce̱tnikɛ mëë cɛ lät kä kɔ Bar Gutdä mëë cu kööt amäni benda raar.

²⁴ Ci Kuoth Nhial nɛmɛ cäp inɔ kɛ ɣöö dëë buɔ̱mdɛ min di̱i̱t ŋa̱c wi̱i̱ muɔ̱ɔ̱n kɛɛliw kɛnɛ ɣöö dëë yɛn Kuothdun cu luɔ̱th amäni ciaŋ.”