Jɔ-cua 3 - RUAC KUƆTH IN RƐL RƆ

Jiëth kiɛɛr Jɔr-dɛn

¹ Kä mëë ruɔ̱ndɛ cu Jɔ-cua loth piny kä cuɛ wecdɛ ɣo̱th kɛɛl kɛnɛ ji̱ I-thɛ-rɛl diaal, cukɛ jiɛn ni kä Ci-tim, kä cukɛ ben ni thok yiëër Jɔr-dɛn, kä cukɛ ben pua̱t thi̱n lɛɛr.

² Kä kɛ kɔr ni̱ni da̱ŋ diɔ̱k, cu kua̱r lätni ji̱ wec diaal wä la̱r lär i̱,

³ “Yɛn, mi wiaa bööth palä kä ji̱ Lii-bay nɛn kapkɛ thanduk matdä Kuɔthdun ni Kuoth Nhial, ɛn wa̱nɔ kuɛ̈ɛ̈ nyuɔŋ kä ɣöthɛ kɔɔriɛn.

⁴ Kɛ ɣöö yɛn pua̱nykun thilɛ ram mi ci me̱t ret kɛ jɛn duɔ̱ɔ̱p ɛ wiaa thi̱n ɛ, ɛ jɛn bikɛ yɛ ku nyuɔ̱th duɔ̱ɔ̱p. Kä yɛn bia dhil tekɛ kam mi nɔ̱a̱n kä mi tɔt kɛ thanduk matdä Kuɔth.”

⁵ Ɛ jɛn, cu Jɔ-cua naath ku jiök i̱, “Jakɛ rɔ̱ kä lɛ̈y lɛ̈ɛ̈y nhiam Kuɔth, kɛ ɣöö iruun waaŋ bi Kuoth Nhial buɔ̱mdɛ nyoth nhiamdun kɛ lät ti ga̱ykɛ naath.”

⁶ Kä cuɛ bööth palä ku jiök i̱, “Ka̱nɛ thanduk matdä Kuɔth kä böthɛ naath kɛ jɛ.” Kä cukɛ wä thi̱n.

⁷ Kä cu Kuoth Nhial Jɔ-cua ku jiök i̱, “Ni ɛn wa̱lɛ mi, ɣän bä di̱tdu re̱p nhiam ji̱ I-thɛ-rɛl diaal. Ɛ jɛn bikɛ jɛ cu ŋa̱c ɔ ɛn ɣöö ta̱a̱ kɛɛl kɛ ji̱ ce̱tnikɛ mëë ta̱a̱ kɔnɛ Muthɛ.

⁸ Täämɛ wër ruacni kɛ bööth palä tin kapkɛ thanduk matdä kä jio̱kni kɛ i̱ mi wäkɛ wä cop wi̱i̱ yiëër kä Jɔr-dɛn, akɛ cuŋ yie̱e̱r.”

⁹ Kɛ kui̱ ɛmɔ, cu Jɔ-cua ji̱ I-thɛ-rɛl ben jiök i̱, “Ta̱yɛ rɔ̱ kä biaa liɛŋɛ laat Kuɔthdun in la Kuoth Nhial.

¹⁰ Ɛ jɛn bia jɛ cu ŋa̱c nikɛ nɛmɛ ɛn ɣöö Kuoth mi tëk a rɛydun, kɛnɛ ɣöö mi wiaa ko̱r kap, jɛn bɛ ji̱ Kɛ-naan kɛ ji̱ Ɣɛ̈th kɛ ji̱ Iwi kɛ ji̱ Pɛ-rii-dhi kɛ ji̱ Gir-gac kɛ ji̱ Ɛ-mor amäni ji̱ Yɛ-buth jak kä bath ni ca̱r nhiamdun.

¹¹ Bia jɛ ŋa̱c kɛ ɣöö mi wä thanduk matdä Kua̱r ni gua̱n wec muɔ̱ɔ̱n kɛɛliw yɛ böth Jɔr-dɛn.

¹² Kɛ kui̱ ɛmɔ yɛn täämɛ kuɛ̈ɛ̈ nɛy da̱ŋ wäl rɛw ka̱n kä döör I-thɛ-rɛl, ram kɛl do̱o̱r ɔ.”

¹³ Kä mi wä bööth palä tin kapkɛ thanduk matdä Kuɔth Nhial in la Kuäär wec muɔ̱ɔ̱n kɛɛliw pa̱a̱t ciöknikiɛn cua̱th yie̱e̱r kä Jɔr-dɛn, bi löny yiëër ɛmɔ cuɔ̱ŋ kä bi pi̱ tin lony ni kui̱c i̱ wee nhial i̱ rɔ̱ rol guäth kɛl.

¹⁴ Ɛ jɛn, mëë ci naath ɣöth ni gua̱thni gɔalikiɛn kä wäkɛ yi̱er jiɛ̈th kui̱c, cua kɛ bo̱th ɛ bööth palä tin kapkɛ thanduk matdä.

¹⁵ Kä täämɛ ci kir Jɔr-dɛn muak ci wäŋkɛ diaal wä raar amäni gua̱a̱th ŋër bɛɛl. Kä mëë ci nɛy tëë kapkɛ thanduk matdä ruac cop kä Jɔr-dɛn, mëë ci ciök bööthni palä tëë kapkɛ thanduk cop rɛy pi̱i̱ni,

¹⁶ cu pi̱w tin lo̱ny nhial rɔ̱ ka̱p cuɔ̱ŋ, cukɛ rɔ̱ luth guäth kɛl ni nɔ̱nä kä A-dam, wec in te gekä Dha-rɛ-than. Kä cu tha̱a̱ŋ pi̱i̱ni lo̱ny baar Ä-ra-ba min la Bar in Wac guäth in cu pi̱ diaal ŋuɔɔk. Kä cu naath jiɛth kui̱c lotdä Jɛ-ri-ko.

¹⁷ Kä guäth in jiɛ̈thkɛ yi̱er ɛ ji̱ I-thɛ-rɛl diaal kɛ duɔ̱ɔ̱p mi kööt, kɛn bööth palä tin kapkɛ thanduk matdä tekɛ cuŋä guäth mi kööt däär yiëër Jɔr-dɛn, amäni mëë cu do̱r ji̱ I-thɛ-rɛl thuɔ̱k kɛ jiëth kɛɛliw.