Jɔ-cua 24 - RUAC KUƆTH IN RƐL RƆ

Ruac Jɔ-cua kɛ naath kä Cɛ-kɛm

¹ Ɛ jɛn täämɛ, cu Jɔ-cua döör ji̱ I-thɛ-rɛl duɔl kä Cɛ-kɛm, kä cuɛ bööthkiɛn, kɛ kua̱r ciëëŋnikiɛn, kɛnɛ ruëëckiɛn amäni kua̱r rɛmnikiɛn cɔl, kä cukɛ ben nhiam Kuɔth.

² Kä cu Jɔ-cua nɛy diaal jiök i̱, “Ci Kuoth Nhial ni Kuoth ji̱ I-thɛ-rɛl ɛ lar inɛ, ‘Mëëdan gua̱ndɔɔŋnikun ce̱tkɛ Tɛra gua̱n A-bɛ-ram kɛnɛ Na-ɣor ciaŋkɛ ni kui̱c yiëër Yu-pɛ-ree-tidh, kä cukɛ kuth kɔ̱kiɛn lätikä.

³ Ɛ jɛn, ɣän cua guurun ni A-bɛ-ram nööŋ kui̱cdɛ yiëër kä cua jɛ luk ni rɛy rööl Kɛ-naan ni kɛɛliw, kä cua kuaykɛ jak kä ŋuan. Cua jɛ ka̱m gatdɛ ni Ay-dhɛk,

⁴ kä cua Ay-dhɛk ka̱m Je-kɔb kɛn E-thɔ. Kä cua E-thɔ ka̱m ro̱l päämni in cɔal i̱ rööl Ɛ-dɔm ala duundɛ, kä duundɛ ɣöö cu Je-kɔb kɛnɛ gaatkɛ wä ro̱o̱l I-jëp.

⁵ Kä cua Muthɛ kɛnɛ Ä-ron ja̱k kä cua I-jëp nöŋ rik kɛ tëë cä la̱t rɛydɛ. Kä kɛ kɔrɛ cua yɛ nööŋ raar.

⁶ Ɛ jɛn cua guurikun ku nööŋ raar kä I-jëp, kä cuarɛ be̱n Bar, kä cu ji̱ rööl I-jëp kɛ gur kä lɛɛr kɛ thurbiɛɛli kɛnɛ ji̱ jio̱o̱kni tuɔ̱ruɔ̱k amäni rɛy Bar Gutdä.

⁷ Kä mëë cikɛ Kuoth Nhial loŋ, cuɛ ti̱k la̱th kamädun kɛ ji̱ rööl I-jëp, kä cuɛ bar jak kä muɔɔy kɛ. Kä cia jɛ nɛn kɛ nyinkun ɛn ëë cä lät kä I-jëp. Kä cia ciɛŋ däär dɔaar kɛ gua̱a̱th mi bäär.

⁸ Kɛ kɔrɛ cua yɛ nööŋ muun ji̱ Ɛ-mor tëë ciaŋkɛ ni kui̱c yiëër Jɔr-dɛn. Cikɛ nyiëëny kɛ yɛ, kä cua kɛ ka̱m yɛ, kä cuarɛ mundiɛn ka̱n ala duundun, kä cua kɛ nor nhiamdun.

⁹ Rɛwdɛ, cu Ba-lak gat Dhi-por, kuäär in di̱i̱t kä Mo-ab rɔ jiɛc kä cuɛ yɛ ka̱p ko̱r. Cuɛ naath jäk kä Bil-am gat Bɛ-or kɛ ɣöö derɛ yɛ ben lam,

¹⁰ kä ɣän /ka̱n ruac Bil-am liŋ. Kä cuɛ ben poth ni yɛ. Inɔ cua yɛ cu kän te̱tädɛ.

¹¹ Kä mëë cia kac kui̱c Jɔr-dɛn kä /cuarɛ ben kä Jɛ-ri-ko, cu ji̱ Jɛ-ri-ko yɛ lep ko̱r, cu amäni ji̱ Ɛ-mor, kɛ ji̱ Pɛ-rii-dhi, kɛ ji̱ Kɛ-naan, kɛ ji̱ Ɣɛ̈th, kɛ ji̱ Gir-gac, kɛnɛ ji̱ Iwi amäni ji̱ Yɛ-buth, kä cua yɛ ka̱m ti̱emdiɛn.

¹² Kä ɣän cua piɛɛn luɔny nhiamdun, kä cuɛ kɛn kua̱r tin di̱t da̱ŋ rɛw kä ji̱ Ɛ-mor wä thia̱y dɔɔr. Kä /ciɛ lua̱ŋ yio̱o̱nikun kɛnɛ kui̱n kui̱i̱nikun ɛn ëë joc kɛ.

¹³ Ɣän cä yɛ ka̱m mun mi /ken yɛn mi bɛc je̱k kɛ kui̱dɛ, kɛnɛ rɛ̈k ti /ken yɛn kɛ täth, kä cieŋɛ rɛydiɛn. Yɛn camɛ rɛɛm jiɛn ka̱a̱kni wal kɛ kui̱ kɔaŋ kɛnɛ ka̱a̱k jiɛn Ɔ-lip ti /ken yɛn kɛ pith.’

¹⁴ “Kɛ kui̱ ɛmɔ, täämɛ, yɛn kuɛ̈ɛ̈ Kuoth Nhial luɔ̱th, kä la̱tdɛ jɛ ikä kɛ thuɔ̱k lɔaay kɛnɛ ŋa̱th mi ro̱ŋ. Ya̱kɛ kuth tëë ci guurikun kɛ pal mëëdan ëë tekɛ kä Bɛ̈-bi-lɔn kɛnɛ ro̱l I-jëp, kä palɛ ni Kuoth Nhial.

¹⁵ Kä yɛn, mi /cia Kuoth Nhial bi lätikä, kuɛ̈ɛ̈ kuoth in bia lätkɛ käp mɛk ɛn wa̱lɛ, mi kɛ kɛn kuth tëë ci guurikun kɛ guɔ̱ɔ̱r mëë cieŋkɛ dhɔɔr in te kä Bɛ̈-bi-lɔn kiɛ kɛ kɛn kuth ji̱ Ɛ-mor ti ciaŋɛ ni mundiɛn ti. Kä lamä ɛ ɣän kɔnɛ thok duëëlä, kɔn bakɔ la̱t ni lät Kuɔth Nhial.”

¹⁶ Ɛn wa̱nɔ, cu naath ɛ loc i̱, “A gɔɔbɛ ɛn ɣöö dëëkɔ Kuoth Nhial päl a dëëkɔ wä la̱t ni lät kuthni kɔ̱kiɛn.

¹⁷ Kɛ ɣöö ɛ jɛn Kuothda ni Kuoth Nhial ɛn ëë nooŋ kɔ kɛ gua̱nikɔ kɛɛl ni ro̱o̱l I-jëp, ni duëël yie̱e̱nä, kä ɛ jɛn ɛn ëë lät lät diaal ti buɔ̱m buɔ̱ɔ̱m nhiamda, kä cuɛ kɔ gaŋ rɛy ja̱la kɛɛliw, kä rɛy nɛɛni diaal tëë cakɔ ret kɛ rɛydiɛn.

¹⁸ Kä cuɛ döör diaal joc a nɛ̈nkɔ, niɛ kɛn ji̱ Ɛ-mor tëë ciaŋkɛ ni wec. Kɛ kui̱ ɛmɔ, kɔn bä, bakɔ la̱t ni lät Kuɔth Nhial, kɛ ɣöö ɛ Kuothda jɛn.”

¹⁹ Min te ni jɛn thi̱n, cu Jɔ-cua kɛ jiök i̱, “Yɛn /cia Kuoth Nhial dëë luäŋ kɛ lät kä lät kɛ min ɛ Kuoth mi buɔy, kä gua̱n tiilä. /Cɛ ciɛŋkun tin jiäk bi pa̱l yɛ, kɛn diaal amäni dueerkun.

²⁰ Mi wiaa Kuoth Nhial wä päl kä bia pal ni kuth juuri, bɛ rɔ cu luɔ̱c yɛ kä bɛ yɛ moc gua̱r, kä bɛ yɛ cu nor, a cɛ yɛ ku thuŋ lät kä gɔɔy kɛ nhiam.”

²¹ Kä cukɛ Jɔ-cua jiök i̱, “Eey. Kɔn bakɔ dhil pal ni Kuoth Nhial.”

²² Ɛ jɛn cu Jɔ-cua kɛ ku jiök i̱, “Yɛn lapɛ neen kɛ rɔ̱ɔ̱dun ɛn ɣöö cia Kuoth Nhial mɛk kä bia jɛ lätikä.” Kä cukɛ wee i̱, “Ɣɔ̱ɔ̱n, kɔn lapkɔ neen.”

²³ Cuɛ ku wee i̱, “Kua kuth juuri tin te yɛ yäk, kä rietdɛ lɔcdun Kuoth Nhial ni Kuoth ji̱ I-thɛ-rɛl.”

²⁴ Kä cukɛ Jɔ-cua jiök i̱, “Kuothdan ni Kuoth Nhial ɛ jɛn bakɔ pal ɔ, kä ɛ jɛn kärɔa bakɔ ruacdɛ liŋ ɔ.”

²⁵ Ɛ jɛn cu Jɔ-cua guk ruac ku la̱th piny kɛ ji̱ I-thɛ-rɛl ɛn cäŋ ɛmɔ kä Cɛ-kɛm, kä cuɛ kɛ moc lueek kɛnɛ ŋuɔ̱t ti bi kɛn kɛ guɔ̱ɔ̱r.

²⁶ Kä cu Jɔ-cua ruaacni ti̱ti̱ gɔ̱a̱r rɛy buɔk lueekni Kuɔth. Kä cuɛ päm mi dho̱k ka̱n kä cuɛ jɛ cuŋ thaar jiaath in la gua̱a̱th ri̱kä Kuɔth Nhial.

²⁷ Cuɛ naath diaal jiök i̱, “Jɛn päm ɛmɛ bɛ la ne̱e̱n kamädan kɛ Kuoth, kɛ ɣöö cɛ rieet diaal tin ci Kuoth Nhial kɛ kuen kɔn liŋ, kɛ kui̱ ɛmɔ jɛn bɛ la ne̱e̱n mi bi yɛ gaŋ kä lucdun kɛ rɔ̱ Kuoth.”

²⁸ Ɛ jɛn cuɛ naath diaal ku jak kä wä, kä cu ram ɔ loc kui̱cdɛ rɛy rööl in ca däk kä kɛ.

Lia̱a̱ Jɔ-cua

²⁹ Kɛ kɔr kä ti̱ti̱ diaal cu Jɔ-cua gat Nun mëë mɔ ja̱ŋ Kuɔth Nhial li̱w, guäth ëë ci run diëëthdɛ a run ti kuɔ̱r kɛl wi̱cdɛ jiath kɛl.

³⁰ Cukɛ jɛ kony muun ëë ca tem jɛ, dhɔɔr mi cɔal i̱ Tim-na-thɛ-ra in te ro̱o̱l päämni Ɛ-pa-rim, kui̱c in lot ni cam pa̱a̱m in cɔal i̱ Gac.

³¹ Ɛn wa̱nɔ, cu ji̱ I-thɛ-rɛl lät Kuɔth Nhial ku la̱t rɛy runi te̱e̱kä Jɔ-cua diaal, kä run te̱e̱kä bööthni tëë ca run Jɔ-cua bäl kä ca lät tëë ci Kuoth Nhial kɛ la̱t kɛ kui̱ ji̱ I-thɛ-rɛl ŋa̱c.

Cɔ̱w Jo-thɛp kɛnɛ lia̱a̱ Ɛl-a-dhar

³² Täämɛ kɛn cɔ̱w pua̱a̱ny Jo-thɛp tëë ci ji̱ I-thɛ-rɛl kɛ nööŋ kä I-jëp, cua kɛ ben kony kä Cɛ-kɛm rɛy kakä muɔ̱ɔ̱n ëë ci Je-kɔb ɛ kɔk kä gaat Ɣä-mor, in la gua̱n Cɛ-kɛm, kɛ yio̱w ti kuɔ̱r, jɛn mun ɛmɛ cuɛ pɛn kä kuay Jo-thɛp.

³³ Ɛn wa̱nɔ, cu Ɛl-a-dhar gat Ä-ron li̱w, kä cua kony kä Giba, jɛn rɛk in te ro̱o̱l päämni Ɛ-pa-rim mëë ca ka̱m gatdɛ ni Pi-nɛ-ɣath.