Jɔ-cua 22 - RUAC KUƆTH IN RƐL RƆ

Loc dööri känyä ca̱ŋ cieŋ

¹ Täämɛ cu Jɔ-cua ji̱ Rɛ-u-ben kɛ Gad kɛ ji̱ käny cäŋ tha̱a̱ŋ Ma-na-thɛ cɔl,

² kä cuɛ kɛ jiök i̱, “Yɛn cia tëë diaal tëë ci Muthɛ in la kuany Kuɔth Nhial kɛ la̱t yɛ ka̱m tiit ni kɛn diaal, kä cia thokdä liŋ rɛy kä tin diaal tin cä guk kä yɛ.

³ Yɛn /ka̱nɛ dämuɔɔri ba̱ny piny kɛn ni̱ni ti̱ti̱ diaal amäni wa̱lɛ, kä cia käp ni lätni kä mëë ci Kuoth Nhial ni Kuothdun ɛ la̱t yɛ.

⁴ Kä täämɛ min ci Kuoth Nhial ni Kuothdun dämuɔɔri ku moc gua̱a̱th nyuurä, nikɛ jɛn pëk ëë cɛ la̱t kɛ, täämɛ kuɛ̈ɛ̈ loc jɔk kä luɔcɛ kɛmɛnikun, wiaa ro̱o̱l nyuurädun ëë ci Muthɛ in la kuany Kuɔth Nhial ɛ ka̱m yɛ kui̱c yiëër Jɔr-dɛn kä käny cäŋ.

⁵ Kɛl in te ni jɛn thi̱n, tiɛtdɛ jɛ agɔaa ɛn ɣöö bia la̱t ni guɔ̱k kɛnɛ ŋuɔ̱t tëë ci Muthɛ in la kuany Kuɔth Nhial kɛ guk kä yɛ, ɛ bia Kuoth Nhial ni Kuothdun ka̱m nhök, kä bia guɔ̱ɔ̱r ni dupkɛ diaal, kä bia ruaacnikɛ käp, kä bia rɔ̱ ka̱p jɛ kä bia jɛ lätikä kɛ lɔcdun kɛɛliw, kɛ tieeydun kɛɛliw.”

⁶ Inɔ cu Jɔ-cua kɛ poth, kä cuɛ kɛ jak kä wä, kä cukɛ wä kɛmɛnikiɛn.

⁷ Täämɛ kɛ kui̱ tha̱a̱ŋ gan Ma-na-thɛ cu Muthɛ kɛ moc kɛ gua̱a̱th kä Ba-can. Duundɛ ɣöö kɛ tha̱a̱ŋ gan tin kɔ̱ŋ cuɛ kɛ moc gua̱a̱th gekä gan manikiɛn ni ji̱ I-thɛ-rɛl muun in te kui̱ konyä ca̱ŋ kiɛɛr Jɔr-dɛn. Kä min ci Jɔ-cua kɛ jak kä wä kɛmɛnikiɛn kä cɛ kɛ poth,

⁸ cuɛ kɛ jiök i̱, “Luɔcɛ kä kɛmɛnikun kɛ kuak ti ŋuan kɛ ɣɔ̱k ti ŋuan kɛ ciɛk in bo̱r kɛnɛ da̱a̱p kɛ ciɛk in yian kɛ ladiit, kɛ bieyni ti ŋuan ɛlɔ̱ŋ, kä wiaa da̱a̱kɛ tin cia pɛc kä ji̱ tɛ̈run kɛ gaatmanikun.”

⁹ Ɛ jɛ inɔ, cu ji̱ dööri Rɛ-u-ben, kɛ Gad, kɛ tha̱a̱ŋ döör Ma-na-thɛ in te kä käny cäŋ ku loc cieŋ. Cukɛ duɔth ji̱ I-thɛ-rɛl ba̱ny piny kä Cilo in te ro̱o̱l Kɛ-naan kä cukɛ wä ro̱o̱liɛn rɛy rööl Gil-yad, jɛn kui̱cdiɛn ëë ci Kuoth Nhial ɛ tëm kɛ kɛ thok Muthɛ.

Yi̱k wi̱i̱ yiëër Jɔr-dɛn

¹⁰ Täämɛ mëë ci döör Rɛ-u-ben, kɛ Gad, kɛ kui̱c käny cäŋ Ma-na-thɛ cop kä Gɛ-li-loth in te gekä yiëër Jɔr-dɛn rɛy rööl Kɛ-naan, cukɛ yi̱k mi duŋ di̱i̱t täth.

¹¹ Kä mëë wä ji̱ I-thɛ-rɛl ɛ theeŋ i̱ cikɛ yi̱k täth ke̱th rööl Kɛ-naan kä Gɛ-li-loth in te gekä yiëër Jɔr-dɛn peek ji̱ I-thɛ-rɛl,

¹² kɛ kui̱ ɛmɔ min cikɛ kɛn thuk tɔ̱tɔ̱ ku liŋ, cukɛ wi̱cdiɛn mat kɛn diaal kä Cilo kɛ ɣöö bikɛ döör käny cäŋ ka̱p ko̱r.

¹³ Ɛn wa̱nɔ, cu ji̱ I-thɛ-rɛl Pi-nɛ-ɣath gat bööth palä ni Ɛl-a-dhar jäk kä ji̱ Rɛ-u-ben, kɛ Gad, kɛ tha̱a̱ŋ döör Ma-na-thɛ,

¹⁴ kä cukɛ kua̱r ciëŋ da̱ŋ wäl ja̱k kɛ jɛ kɛɛl, ram ɔ thok duëël ɔ kä thuk duëli gan I-thɛ-rɛl diaal, ram ɔ kä kɛ ɛ jɛn bo̱o̱th thuɔk duëël ɔ kä thuk duëlikiɛn.

¹⁵ Kä mëë cikɛ ben Gil-yad kä gaat Rɛ-u-ben kɛnɛ Gad, kɛ tha̱a̱ŋ döör gan Ma-na-thɛ,

¹⁶ cukɛ kɛ ben jiök i̱, “Ci duɔl ji̱ Kuɔth Nhial diaal ɛ lar inɛ, ‘Ɛŋu mi cia Kuoth ji̱ I-thɛ-rɛl lɛ ca̱p ca̱p mi go̱k ɛ? Mi cia Kuoth Nhial lɛ riet jɔk ɛ kɛ täthdun kɛ rɔ̱ yi̱k! /Cia lɛ ŋot kɛ nhök kɛ jɛ.

¹⁷ /Ken duer ëë canɛ kuëŋ kä Pɛ-or ro̱ŋ jɔk? Jɛn duer in /ka̱nɛ pua̱nykɔn ni jak kä lɛ̈y lɛ̈ɛ̈y kɛ kui̱dɛ cäŋɛ mëë ci riɛk mi di̱i̱t pɛn rɛy dolä ji̱ Kuɔth Nhial bä,

¹⁸ min cia nhökdun kɛ Kuoth päl ni ɛn wa̱lɛ kä cia jɔkdun riet jɛ kɛ täthdun kɛ rɔ̱ yi̱k, ni ruun ɛ bëë ɔ bi waaŋ lɔaacdɛ rɔ re̱p kɛ duɔl ji̱ I-thɛ-rɛl diaal.

¹⁹ Duundɛ ɣöö mi ci mundun gɔaa, jiathɛ kui̱c muun Kuɔth Nhial guäth in te kɛmɛ ro̱mä Kuɔth Nhial cuŋä thi̱n ɛn täämɛ. Kä muɔcɛ rɔ̱ kɛ gua̱th rɛyda. Kuɛ la ɣöö /cuarɛ rɔ̱ luc Kuoth Nhial kiɛ bia rɔ̱ luɔ̱ckɔ kɛ lätnidun kɛ rɔ̱ yi̱k mi dɔ̱ŋ mi /ci mua yi̱k Kuɔth Nhial ni Kuothda.

²⁰ Kä mëë ci A-ka̱n gat Dhɛra ŋut to̱l kɛ kui̱ kä tin ca lɛy, /ken ŋɛ̈ɛ̈ny Kuɔth ben kä ji̱ I-thɛ-rɛl diaal? /Ken li̱w ni jɛn kärɔa kɛ duerɛ.’ ”

²¹ Kä cu ji̱ Rɛ-u-ben kɛnɛ ji̱ Gad kɛ tha̱a̱ŋ ji̱ Ma-na-thɛ bööth thuk duëli I-thɛ-rɛl loc i̱,

²² “Kuoth in le̱ny buɔ̱mdɛ ti diaal ɛ jɛn Kuoth Nhial! Kuoth in le̱ny buɔ̱mdɛ ti diaal ɛ jɛn Kuoth Nhial! Ŋäcɛ thar kä mɛmɛ! Kä görkɔ jɛ i̱ bia ŋa̱c bä! Mi ca̱pkɔ mɛmɛ kɛ ri̱t Kuoth Nhial jɔkda kiɛ lo̱k ruaacnikɛ, a kɔ /cakɔ päk li̱th ɛ tɛk kä yɛ ɛn wa̱lɛ mi.

²³ Mi duunda lo̱k ruaacni Kuɔth Nhial kɛ täthda rɔ̱ yi̱k go̱läda mi bakɔ muc ti waaŋ cu thöp wi̱i̱dɛ, kiɛ muc bɛɛl, kiɛ ɣöö bakɔ muc gɔyni näk thi̱n, dëë Kuoth Nhial kɔ riw.

²⁴ /Ci ɛ jɛn a, duunda luth kä ɣöö cäŋ kɛl dëë gaatkun gaatkɔ jiök i̱, ‘Yɛn ta̱yɛ kɛ ŋu kɛ Kuoth Nhial in la Kuoth ji̱ I-thɛ-rɛl?

²⁵ Jɛn puɔ̱nydɛ cɛ yi̱er Jɔr-dɛn jak kä key kamädan, yɛn ji̱ Rɛ-u-ben kɛnɛ yɛn ji̱ Gad. Thilɛ yɛ bo̱th kä Kuoth Nhial.’ Ɛ jɛn inɔ, dëë gaatkun gaatkɔ cu jak kä thil luth kɛ Kuoth Nhial.

²⁶ Kɛ kui̱ ɛmɔ, cakɔ ku wee i̱, ‘Kuanɛ rɔ̱ ta̱th yi̱k, mi /ci mɔ duŋ mucni ti waaŋ, kiɛ ti na̱kɛ,

²⁷ kä ɛ mi bi a nyuuth kamädan, kɛnɛ kam ri̱cni tɔ̱ bi ben kɔɔran tɔ̱, mi nyoth jɛ ɛn ɣöö ɛpuc dhiɛlnɛ pal nhiam Kuɔth Nhial kɛɛl kɛ muckɔn tin waaŋ kɛnɛ tin na̱a̱k kɛ tin böth. Kɛ ɣöö cäŋ kɛl /ci gaatkun gaatkɔ dëë lɛ jiök i̱, “Thilɛ yɛ bo̱th kä Kuoth Nhial.” ’

²⁸ Cakɔ jɛ cu car inɛ, mi wa ruac ɛmɛ wä la̱t kɔ kiɛ gaatkɔ cäŋ kɛl, dëëkɔ cu lar i̱, ‘Guɛcɛ nyuth yi̱kä Kuɔth Nhial in ci gua̱nikɔ ɛ täth, /ci mɔ kɛ kui̱ mucni ti waaŋ kiɛ ti na̱a̱k, kä ɛ ni ɣöö ba nyuuth kamädan.’

²⁹ Ɛ gɔɔbɛ ɛn ɣöö dëëkɔ jɔkda riet Kuoth Nhial kä dëëkɔ rɔ̱ riet jɔk kɔɔrɛ ɛn wa̱lɛ kɛ ta̱th yi̱kä mucni ti waaŋ, kɛnɛ muc bɛɛl, kiɛ muc ti na̱a̱k, mi dëë a mi göl kä yi̱k Kuɔthdan ni Kuoth Nhial in cuŋ nhiam luaakdɛ!”

³⁰ Täämɛ mëë ci Pi-nɛ-ɣath in la bo̱o̱th palä kɛnɛ kua̱r ciëŋ kä ji̱ dolä kä tɔ̱ kɛn di̱t thukni duëli ji̱ I-thɛ-rɛl tëë te jɛ kɛɛl rieet ji̱ Rɛ-u-ben kɛnɛ ji̱ Gad kɛ ji̱ Ma-na-thɛ liŋ, cu lo̱ckiɛn tɛɛth ɛlɔ̱ŋ.

³¹ Kä cu Pi-nɛ-ɣath gat Ɛl-a-dhar in la bo̱o̱th palä ji̱ Rɛ-u-ben kɛnɛ Gad kɛ Ma-na-thɛ jiök i̱, “Kɔn cakɔ ku ŋa̱c ni ɛn wa̱lɛ ɛn ɣöö te Kuoth Nhial kɛ kɔn kɛɛl, nikɛ ɣöö /ka̱nɛ jɔkdun riet jɛ kä inɔ cia ji̱ I-thɛ-rɛl cu kän kä riɛk waaŋä lɔaacdɛ.”

³² Ɛ jɛ inɔ, cu Pi-nɛ-ɣath gat Ɛl-a-dhar in la bo̱o̱th palä kɛnɛ kua̱r ciëŋ ku luny ro̱o̱l Kɛ-naan benädiɛn kä ji̱ Rɛ-u-ben kɛnɛ ji̱ Gad ro̱o̱l Gil-yad, kä cukɛ ben kä ji̱ I-thɛ-rɛl, kä cukɛ kɛ ben luɔ̱c thok.

³³ Kä cu thok in ci kɛn ɛ nööŋ loc ji̱ I-thɛ-rɛl jak kä tɛth, kä cukɛ Kuoth ka̱m liak, kä /ka̱n jɛ lɛ nyɔk kɛ pääl ɛ kɛn i̱ bikɛ kɛ käp, kä bikɛ ro̱l ëë ciɛŋ ji̱ Rɛ-u-ben ɛ, kɛnɛ ji̱ Gad wä däk.

³⁴ Cu ji̱ Rɛ-u-ben kɛnɛ ji̱ Gad yi̱k ɛmɔ cɔl i̱ Nyuth Nenä, kɛ ɣöö ɛ kɛn i̱, “Ɛ nyuth kamädan ɛn ɣöö Kuoth Nhial ɛ Kuoth.”