Jɔ-cua 21 - RUAC KUƆTH IN RƐL RƆ

Rɛ̈k ciɛŋä ji̱ Lii-bay

¹ Ɛn wa̱nɔ mëë ci kua̱r gua̱ni thukni duëli ji̱ Lii-bay ben kä Ɛl-a-dhar in la bo̱o̱th palä kɛnɛ Jɔ-cua gat Nun kɛ kua̱r gua̱ni dööri gan I-thɛ-rɛl,

² kä cukɛ ben ruac kɛ kɛ dhɔɔr in cɔal i̱ Cilo kä Kɛ-naan larkɛ jɛ i̱, “Ci Kuoth Nhial ɛ lar kɛ thok Muthɛ ɛn ɣöö ba kɔ moc rɛ̈k ti bakɔ cieŋ thi̱n, kɛnɛ gua̱th walkiɛn kɛ kui̱ ɣɔ̱ɔ̱kɔ.”

³ Kɛ kui̱ ɛmɔ cu gaat I-thɛ-rɛl ji̱ Lii-bay moc kä cukɛ rɛ̈k tɔ̱tɔ̱ ka̱m kɛ ni rɛ̈kni tin ca ŋuk kä kɛ pa̱ny kɛɛl nikɛ jio̱k rɛ̈kni tɔ̱tɔ̱.

⁴ Ɛ jɛ inɔ, cu gaak ku pɛ̈ɛ̈n kɛ kui̱ thukni duëli ji̱ Kɛ-ɣath kä cu ji̱ Lii-bay diaal tëë tɔ̱ kuay Ä-ron in la bo̱o̱th palä rɛ̈kiɛn da̱ŋ wäl diɔ̱k ka̱n kɛ gaak kä do̱r Juda kɛnɛ do̱r Cim-on kɛ do̱r Ben-ya-min.

⁵ Täämɛ cu tha̱a̱ŋ ji̱ Kɛ-ɣath tin ci duɔth kui̱cdiɛn lɛni je̱k bäkɛ gaak kä thuk duëli döör Ɛ-pa-rim kɛnɛ do̱r Daan kɛ tha̱a̱ŋ döör Ma-na-thɛ, cukɛ rɛ̈k wäl ka̱n kä kɛ.

⁶ Cu ji̱ Ger-con kui̱cdiɛn je̱k bäkɛ gaak kä thuk duëli dööri Yi-tha-kar kɛ A-cɛr kɛ Nap-ta-li kɛnɛ tha̱a̱ŋ döör Ma-na-thɛ tin te kä Ba-can, cukɛ rɛ̈k wäl diɔ̱k je̱k kä kɛ.

⁷ Cu ji̱ Mɛ-ra-ri nikɛ pëk gɔalikiɛn rɛ̈k da̱ŋ wäl rɛw je̱k kä döör Rɛ-u-ben kɛ Gad kɛnɛ Dhɛ-bu-lun.

⁸ Ɛ jɛn cu gaat I-thɛ-rɛl rɛ̈k ti̱ti̱ nikɛ tɔ̱a̱rikiɛn kɛɛl thöp ji̱ Lii-bay kɛ gaak nikɛ ruac ëë ci Kuoth Nhial ɛ lat kɛ thok Muthɛ.

⁹ Kä cukɛ rɛ̈k ti̱ti̱ ni ciöötnikiɛn thöp kɛ rɛy döör Juda kɛnɛ do̱r Cim-on,

¹⁰ kɛn rɛ̈k tëë ci pɛn kä kuay Ä-ron, kä cieeŋ Kɛ-ɣath tëë tɔ̱ ji̱ Lii-bay. Kɛ kɛn nɛy tëë kɔaŋ moc kɛ nhiam.

¹¹ Kä cukɛ kɛ moc Kir-yath-ar-bä min mɔ Ɣɛb-ron täämɛ kä tëë rɛy rööl päämni Juda, kɛɛl amäni pan wal diaal tin thie̱e̱k kɛ jɛ. Kä Ar-bä ɛmɔ ɛ jɛn gua̱n Ä-nak.

¹² Min te ni jɛn thi̱n ca ciëëŋkɛ rɛ̈ɛ̈k ɛmɔ amäni ciëëŋkɛ diaal ka̱m Ka-leb gat Yɛ-pö-nɛ ala bo̱thdɛ.

¹³ Täämɛ cukɛ kuay Ä-ron in la bo̱o̱th palä ku ka̱m Ɣɛb-ron min la rɛk in bar gua̱n tho̱ŋä rɔ thi̱n, cuɛ kɛ mat amäni tɔ̱a̱rikɛ diaal, cua Lib-na ka̱m kɛ bä

¹⁴ kɛ Ya-tir kɛnɛ Ɛc-tɛ-mo-ä

¹⁵ kɛ O-lon kɛnɛ Dɛ-bir

¹⁶ kɛ A-yin kɛnɛ Yuta kɛ Beth-cɛ-mɛc kɛnɛ tɔ̱a̱rikiɛn diaal, kɛn rɛ̈k da̱ŋ bäŋuan ti̱ti̱ rɛy dööri da̱ŋ rɛw tɔ̱tɔ̱.

¹⁷ Ɛ jɛn rɛy döör Ben-ya-min cua kɛ ka̱m Gib-yon kɛ Gabä

¹⁸ kɛ Ä-na-thoth kɛ Al-mon, rɛ̈k da̱ŋ ŋuaan kɛɛl amäni tɔ̱a̱rikiɛn diaal.

¹⁹ Mat rɛ̈kni tëë ca ka̱m kuay Ä-ron in la bo̱o̱th palä kɛ rɛ̈k da̱ŋ wäl diɔ̱k kɛɛl amäni tɔ̱a̱rikiɛn.

²⁰ Täämɛ cua duɔth thukni duëli gɔaal Kɛ-ɣath kä ji̱ Lii-bay tin kɔ̱ŋ yuɔ̱p rɛ̈k kä ro̱l ji̱ Ɛ-pa-rim.

²¹ Tëë cua thöp kɛ kɛ rɛ̈k ŋuaan, Cɛ-kɛm in la rɛk kɛl kä rɛ̈k tin bar ji̱ tho̱ŋni rɔ̱ thi̱n kɛɛl amäni tɔ̱a̱rikɛ rɛy rööl päämni Ɛ-pa-rim, kɛ Gɛ-dhɛr

²² kɛ Kib-dha-yim kɛ Beth-o-ron, nikɛ tɔ̱a̱rikiɛn kɛɛl.

²³ Kä rɛy döör Dan, cua Ɛl-tɛ-ke kɛnɛ tɔ̱a̱rikɛ, kɛ Gi-bɛ-thon kɛnɛ tɔ̱a̱rikɛ,

²⁴ kɛ A-ya-lon kɛnɛ tɔ̱a̱rikɛ, kɛ Gɛ̈th-ri-mon kɛnɛ tɔ̱a̱rikɛ. Tɔ̱tɔ̱ kɛ rɛ̈k da̱ŋ ŋuaan.

²⁵ Kä rɛy yupä döör Ma-na-thɛ cukɛ Ta-nak thöp kɛnɛ tɔ̱a̱rikɛ, kɛ Gɛ̈th-ri-mon kɛnɛ tɔ̱a̱rikɛ, rɛ̈k da̱ŋ rɛw.

²⁶ Kɛn rɛ̈k diaal tëë ci wä kä duɔth thukni duëli gan Kɛ-ɣath kɛ rɛ̈k wäl, kɛɛl amäni gua̱th la̱k ɣɔ̱ɔ̱kiɛn.

²⁷ Kä kɛ kui̱ ji̱ Ger-con min la thok duëël kɛl kä ji̱ Lii-bay, cukɛ kɛ thöp rɛ̈k rɛw kä tha̱a̱ŋ döör Ma-na-thɛ, ɛ Go-lan in la rɛk barä gua̱n tho̱ŋä kä Ba-can kɛɛl nikɛ tɔ̱a̱rikɛ.

²⁸ Kä do̱o̱r Yi-tha-kar cukɛ kɛ thöp Kic-yon kɛnɛ Da-bɛ-rath nikɛ tɔ̱a̱rikiɛn kɛɛl,

²⁹ kɛ Yar-muth kɛnɛ tɔ̱a̱rikɛ, kɛ Een-ga-nim kɛnɛ tɔ̱a̱rikɛ. Matdiɛn kɛ rɛ̈k da̱ŋ ŋuaan.

³⁰ Täämɛ rɛy döör A-cɛr cukɛ kɛ thöp Mi-cal nikɛ tɔ̱a̱rikɛ kɛ Ab-don kɛnɛ tɔ̱a̱rikɛ,

³¹ kɛ Ɛl-kath kɛnɛ tɔ̱a̱rikɛ, kɛ Rɛ-ɣob kɛnɛ tɔ̱a̱rikɛ. Matdiɛn kɛ rɛ̈k ŋuaan.

³² Kä do̱o̱r Nap-ta-li cukɛ rɛk gua̱n tho̱ŋä ni Kɛ-dɛc kä Gɛ̈-lɛ-li thöp nikɛ tɔ̱a̱rikɛ, kɛ A-moth-dɔr nikɛ tɔ̱a̱rikɛ, kɛ Kar-tan kɛnɛ tɔ̱a̱rikɛ, rɛ̈k diɔ̱k.

³³ Kɛn rɛ̈k ji̱ Ger-con diaal nikɛ pëk gɔalikiɛn kɛ rɛ̈k da̱ŋ wäl diɔ̱k amäni tɔ̱a̱rikiɛn kɛɛl.

³⁴ Täämɛ cua thuk duëli ji̱ Mɛ-ra-ri kä duɔth ji̱ Lii-bay moc rɛ̈k rɛy döör Dhɛ-bu-lun kä cua Yɔk-naam ka̱m kɛ amäni tɔ̱a̱rikɛ, kɛ Kar-ta kɛnɛ tɔ̱a̱rikɛ,

³⁵ kɛ Dim-na kɛnɛ tɔ̱a̱rikɛ, rɛ̈k ŋuaan.

³⁶ Kä do̱o̱r Rɛ-u-ben, cukɛ Bɛ-dhɛr ka̱m kɛ, kɛ Yaadhaa,

³⁷ kɛ Kɛ-dhe-moth, kɛ Me-paath, rɛ̈k da̱ŋ ŋuaan nikɛ tɔ̱a̱rikiɛn kɛɛl.

³⁸ Kä rɛy döör Gad cukɛ Ra-moth in la rɛk barä gua̱n tho̱ŋä kä Gil-yad nikɛ tɔ̱a̱rikɛ thöp kɛ, kɛ Ma-na-yim nikɛ tɔ̱a̱rikɛ,

³⁹ kɛ Ɛc-bon nikɛ tɔ̱a̱rikɛ, kɛ Ya-dhɛr kɛnɛ tɔ̱a̱rikɛ. Mat rɛ̈kni da̱ŋ ŋuaan.

⁴⁰ Inɔ pëk rɛ̈kni tëë yiathkɛ rɔ̱ kɛ gaat Mɛ-ra-ri ni pëk gɔalikiɛn tëë ci duɔth kä thuk duëli ji̱ Lii-bay, kɛ rɛ̈k da̱ŋ wäl rɛw nikɛ pëk ëë ci thok duëël ɔ ɛ jëk rɔ.

⁴¹ Täämɛ mat rɛ̈kni ji̱ Lii-bay diaal tëë te rɛy nyinä ji̱ I-thɛ-rɛl kɛ rɛ̈k ti jiɛn ŋuaan wi̱cdiɛn rɛ̈k bädäk kɛɛl kɛ tɔ̱a̱rikiɛn.

⁴² Kɛn rɛ̈k ti̱ti̱ diaal te rɛk ɔ kɛ gua̱a̱th la̱k ɣɔ̱ɔ̱kɛ mi guul ni jɔkdɛ kɛɛliw. Inɔ ɛ jɛn min te kɛn rɛ̈k diaal ɛn ro̱o̱l.

⁴³ Ɛ jɛ inɔ. Cu Kuoth Nhial ro̱l ku ka̱m ji̱ I-thɛ-rɛl ni kɛɛliw nikɛ ruac ëë cɛ guɔ̱k gua̱ni i̱ bɛ jɛ ka̱m kɛ. Kä cu ji̱ I-thɛ-rɛl ɛ ka̱n kä cukɛ ciɛŋ thi̱n.

⁴⁴ Kä cu Kuoth Nhial kɛ jak kä nyuur malä nikɛ pëk ëë cɛ mua̱th gua̱ndɔɔŋnikiɛn. Kä cuɛ thil ram kɛl kä ji̱ tɛ̈riɛn diaal mi cu kɛ tiam kɛ ɣöö ci Kuoth Nhial ji̱ I-thɛ-rɛl ka̱m puɔ̱t ji̱ tɛ̈riɛn.

⁴⁵ Thilɛ ruac kɛl kä ruaacni tëë ci Kuoth Nhial kɛ mat kɛ thok duëël I-thɛ-rɛl mi cu ŋuy piny baaŋ, kɛn diaal cukɛ wä ni gua̱thnikiɛn.