Jɔ-cua 2 - RUAC KUƆTH IN RƐL RƆ

Li̱eem kä Jɛ-ri-ko

¹ Ɛ jɛn, cu Jɔ-cua gat Nun nɛy da̱ŋ rɛw ti lieem ku ja̱k kɛ tɛ̱̈ɛ̱̈ ni kä Ci-tim kä cuɛ kɛ jiök i̱, “Wiaa kä carɛ rɛy rööl kɛɛliw, kä a di̱t ni rɛk Jɛ-ri-ko.” Cukɛ ku wä, kä mëë cikɛ cop rɛɛk, cua wä jac ni dhɔr ciek mi riär mi cɔal i̱ Ra-ɣab.

² Kä cua jɛ ben la̱t kuäär in di̱i̱t kä Jɛ-ri-ko i̱, “Ɛn thiaaŋni tëë kɛ nɛy ti ci ben kä ji̱ I-thɛ-rɛl kɛ ɣöö bikɛ wecdan ben lim.”

³ Ɛ kui̱ ruac ɛmɔ cu kuäär naath jäk kä Ra-ɣab, kä cuɛ wee i̱, “Kɛn nɛy tɔ̱ ca jac ni dhɔru tɔ̱ kɛ lieem. Akɛ bëë raar.”

⁴ Kä nɛ̈nɛ jɛ, cu ciɛk ɛmɔ jɛ loc i̱, “Ɛpuc, ci wutni tɔ̱tɔ̱ dhil ben dhɔɔrä, kä /ka̱n gua̱a̱th in bäkɛ thi̱n kulɛ ŋa̱c.

⁵ Kä ɛn thiaaŋni min ci thia̱k ni ɣöö ba thi̱i̱k rɛ̈ɛ̈k wec lɛ̈k thi̱n, cukɛ wä. Gua̱a̱th ɔ cikɛ rɔ̱ ri̱t kɛ jɛ mɔ, /ka̱n lɛ ŋa̱c. Kua kɛ cuap lɛɛr kɛ pɛ̈th, kä bia kɛ wä käp.”

⁶ Kä thuɔ̱kdɛ ni ɣöö jɛn ciɛk ɛmɔ cɛ wutni da̱ŋ rɛw ɛ tɔ̱ naŋ ni wi̱i̱ duëël guäth in ŋot /ken ja̱a̱k kua̱r ni cop cieŋdɛ, kä cuɛ kɛ wä kua̱th piny kɛ to̱ŋ lath ti cɛ ɣa̱r wi̱i̱ duëëlɛ.

⁷ Kä cu ja̱a̱k rɔ̱ ku riet kɔɔriɛn, kä ɛ niɛ min kackɛ raar, cua thi̱i̱k pa̱a̱ny wec pi̱em thi̱n, cukɛ cu wä guɔ̱rkɛ kɛ kä lɛɛr dup in wee Jɔr-dɛn amäni mëë cikɛ wä cop ni wäthni yiëër diaal.

Mat ruac kamä Ra-ɣab kɛnɛ lieem

⁸ Kä ɛn guäth ɛmɔ min /ken ja̱a̱l ɛ tɔ̱ ni niɛɛn, cu Ra-ɣab ben kä kɛ wi̱i̱ duëël,

⁹ kä cuɛ kɛ jiök i̱, “Ŋa̱cä jɛ ɛn ɣöö ci Kuoth Nhial ro̱l ɛmɛ ka̱m yɛ, kä ɛn ro̱l ɛmɛ ni kɛɛliw dualɛ kɛ kui̱dun diaal,

¹⁰ kɛ ɣöö cakɔ liŋ ɛn ɣöö mëë ka̱nyɛ raar kä I-jëp, cu Kuoth Nhial yi̱er Bar Gutdä jak kä kööt nhiamdun, kɛnɛ ɣöö cia Thi-yon kɛnɛ Ög tin la kua̱r tin di̱t rɛy rööl ji̱ Ɛ-mor kui̱c Jɔr-dɛn dup.

¹¹ Kä ɛ niɛ mëë cakɔ ti̱ti̱ liŋ, ci lo̱ckɔ cu jiɛ̈th, kä cakɔ cu baath ɛlɔ̱ŋ kɛ kui̱dun, kɛ ɣöö Kuothdun ni Kuoth Nhial jɛn ɛ Kuoth in waŋ cieŋ nhial kɛnɛ piny.

¹² Ɛ jɛn, täämɛ kuɛ̈ɛ̈ rɔ̱ yac kɛ ciötdɛ nhiamdä ɛn ɣöö bia ɣä lät kä gɔɔy ce̱tkɛ min cä lät agɔaa kɛ yɛ, kä bia ɣä moc kɛ nyuth mi thuɔ̱k

¹³ ɛn ɣöö ɛpuc bia lät gɔaa kɛ thok duëël gua̱a̱r kä bia kɔ kän li̱th kɔnɛ cieeŋ maari kɛ nyinkiɛn diaal.”

¹⁴ Kä cukɛ jɛ loc i̱, “Ɛpuc, tëkda ɛ jɛn tëkdun. Kɔn bakɔ yɛ dhil lät kä gɔɔy, mi /cia ca̱p lɔaayda ɛmɛ bi jak kä räth raar. Bakɔ yɛ dhil ciɛŋ ni ŋäcä cäŋ in bi Kuothda kɔ ka̱m mun rööl ɛmɛ.”

¹⁵ Kä ɛn Ra-ɣab, duelɛ ca ta̱th puɔ̱ɔ̱ny pa̱a̱ny wec, kä cuɛ ca̱p ku cäp ɛn ɣöö bɛ nɛy ɛ tɔ̱ lua̱y piny kɛ dep kɛ wernyin mi te kui̱c in wee raar.

¹⁶ Cuɛ kɛ ku jiök i̱, “Yɛn bia wä, kä bia rɔ̱ bar ni rɛy päämni kɛ ɣöö /cia bi lɛ wä röm dup kɛ göörkun, kä bia rɔ̱ wä tɛ̱̈ɛ̱̈ ɛn thɔ̱ŋi kɛ ni̱n da̱ŋ diɔ̱k amäni mi ci göörkun luny jɔk. Dërɛ cu ja̱l kɛ ja̱lun.”

¹⁷ Kä cu wutni ɛ tɔ̱ ɛ jiök i̱, “Kɔn bakɔ mat ruacdan ɛmɛ cakɔ yaac ni rɔ̱ nhiamdu mi käp, duundɛ ɣöö bakɔ te raar thi̱n mi /ci̱ nɛmɛ bi la̱t.

¹⁸ Nɛnɛ, ɛn cäŋ in bakɔ ro̱l ɛmɛ ka̱p mut, ji̱n bi dep ɛ do̱l ɛmɛ ruɔ̱k wernyinä ɛ ci kɔ luëëy piny kɛ jɛ mi. Kä bi ji̱ thuɔk duëël guur diaal rol dhɔɔru.

¹⁹ Cakɔ bi tekɛ thi̱ec kɛ lia̱a̱ raam in bi kac raar dhɔɔru kä bi wä ja̱l wi̱i̱ duɔ̱pni, bi thöŋ raamɔ a duŋ wecdɛ kärɔa. Kä nɛnɛ, mi wa raan gueer kä nɛy diaal tin te cieŋdu, bi thöŋ raamɔ a duŋ wecda.

²⁰ Kä mi wiaa ca̱p lɔaayda ɛmɛ jak kä pal raar, bakɔ te raar rɛy matdä ruacdan in cakɔ yaac ni rɔ̱ nhiamdu.”

²¹ Kä cu Ra-ɣab kɛ loc i̱, “Ɛ jɛ inɔ, a jɛ kua jɛn.” Ɛ jɛn cuɛ kɛ ku lua̱y piny, kä cukɛ cu jiɛn. Kä min cikɛ rɔ̱ ku ri̱t, cu Ra-ɣab dep in do̱l cu ruɔ̱k puɔ̱ɔ̱ny wernyiɛɛn.

²² Ɛn wan ɔ, cu wutni tin kɔn ku jiɛn kä cukɛ rɔ̱ wä tɛ̱̈ɛ̱̈ ni rɛy päämni a cukɛ wä te thi̱n kɛ ni̱n diɔ̱k. Ɛn ni̱ni diɔ̱k ɛ tɔ̱ cu göörkiɛn dup diaal luk, kä thilɛ mi ci kɛn ɛ je̱k, kä cukɛ luny Jɛ-ri-ko.

²³ Ɛ jɛn, mëë ci go̱o̱r ɛ tɔ̱ luny jɔk, cu wutni tin kɔn ku luny piny wi̱i̱ pa̱a̱m, kä cukɛ yi̱er ŋok kä cukɛ luny kä Jɔ-cua gat Nun, kä cukɛ tëë diaal tëë ci tuɔɔk ben la̱t jɛ.

²⁴ Kɛ jɔak cukɛ jɛ ku jiök i̱, “Ɛpuc, ci Kuoth Nhial ro̱l ɛmɔ dhil ka̱m kɔn. Kä min te wi̱i̱ kä nɛmɛ kɛɛliw ɛ ɣöö niɛ kɛn ji̱ wec pua̱nykiɛn laathɛ kɛ ni kɛn diaal kɛ kui̱dan.”