Jɔ-cua 17 - RUAC KUƆTH IN RƐL RƆ

Do̱r Ma-na-thɛ kä kony cäŋ

¹ Nɛmɛ ɛ jɛn pëk ëë yiɛɛth rɔ kɛ do̱r Ma-na-thɛ in la kɛ̈ɛ̈ Jo-thɛp. Täämɛ cu Gil-yad kɛnɛ Ba-can wä kä ma-kir in la kɛ̈ɛ̈ Ma-na-thɛ kä gua̱n Gil-yad kɛ ɣöö ɛ wääth mi lia̱a̱.

² Kä duɔth gan Ma-na-thɛ tin kɔ̱ŋ tëë ca tëm gua̱a̱th kɛ kui̱ thukni duëlikiɛn kɛn tin, gaat Ä-bi-ɛ-dhɛr, kɛnɛ gaat Ɣe-lɛk, kɛ gaat A-thi-rel, kɛ gaat Cɛ-kɛm, kɛnɛ gaat Ɣe-pɛr, kɛ gaat Cɛ-mi-dhä. Tɔ̱tɔ̱ kɛ kɛn kuay gan gatdä Jo-thɛp ni Ma-na-thɛ tin la tut gɔalikiɛn.

³ Kä Dhɛ-lɔ-pɛ-ɣadh in la gat Ɣe-pɛr in la gat Gil-yad in la gat Ma-kir in la gat Ma-na-thɛ, thilɛ dhɔɔl ti cɛ di̱eth ɛ ni nyi̱er kärɔ̱, kä nyieekɛ ciöötkiɛn tin, Maɣ-la kɛnɛ Nowa, kɛ Ɔg-la kɛnɛ Mil-ka kɛ Ti̱r-dha.

⁴ Kä cukɛ ben nhiam Ɛl-a-dhar in la bo̱o̱th palä, kɛnɛ Jɔ-cua gat Nun amäni kua̱rkiɛn kä cukɛ wee i̱, “Ci Kuoth Nhial Muthɛ la̱r lär ɛn ɣöö bɛ kɔ tëm gua̱a̱th kɛɛl kɛ dämanikɔ.” Nikɛ ruac Kuɔth Nhial cu Jɔ-cua kɛ tëm gua̱a̱th kɛɛl kɛ gua̱nlenikiɛn.

⁵ Kɛ kui̱ ɛmɔ cu guɔ̱ɔ̱k da̱ŋ wäl pɛn kä Ma-na-thɛ, ti̱ti̱ kɛ gööl kɛ ro̱l Gil-yad kɛnɛ Ba-can tëë te kui̱c yiëër Jɔr-dɛn.

⁶ Nɔmɔ ɛ ɣöö ci nyiee Ma-na-thɛ gua̱a̱th ka̱n kɛɛl kɛ gaatkɛ. Kä cu ro̱l Gil-yad wä kä gaat Ma-na-thɛ tëë ci duɔth.

⁷ Kä key rööl Ma-na-thɛ cuɛ jɛ ka̱n ni kä A-cɛr wëë yɔ̱a̱t ni Mik-mɛ-thath in lot ni käny cäŋ Cɛ-kɛm, kä cuɛ jɛ nyɔk kɛ ri̱t cueec amäni rɛy ciëëŋni Een-ta-pu-a.

⁸ Ɛn mun rööl Ta-pu-a ɛ duŋ Ma-na-thɛ kä rɛk Ta-pu-a min te ke̱th Ma-na-thɛ ɛ duŋ Ɛ-pa-rim.

⁹ Ɛ jɛn, cu key rɔ wä pi̱em ni waaŋ Kana peek in lot ni kui̱c targɛ̈w waŋ ɛmɛ, rɛ̈kɛ diaal tekɛ rɛy rɛ̈kni Ma-na-thɛ, kä kɛ nyin Ɛ-pa-rim. Kä key Ma-na-thɛ in lot ni kui̱c kayŋua̱a̱k waŋ ɛmɛ te ke̱k këthdɛ ni Bar in Bo̱r in te kam wi̱i̱ni.

¹⁰ Kä cuecdɛ rööl ɛ duŋ Ɛ-pa-rim, kä cu camdɛ a duŋ Ma-na-thɛ kä pëkdɛ ɛ Bar in Bo̱r in te kam wi̱i̱ni. Kä kui̱c kayŋua̱a̱k ro̱mkɛ kä A-cɛr, kä römdiɛn kä käny cäŋ ɛ Yi-tha-kar.

¹¹ Kä rɛ̈k Ma-na-thɛ tin te kä Yi-tha-kar kɛnɛ A-cɛr kɛn tin, Beth-can kɛɛl kɛ wi̱i̱kɛ, kɛnɛ Yib-lɛ-am kɛɛl kɛ wi̱i̱kɛ, kɛ cieeŋ Dor amäni wi̱i̱kɛ, kɛ cieeŋ Een-dor amäni wi̱i̱kɛ, kɛ cieeŋ Ta-nak kɛɛl kɛ wi̱i̱kɛ, kɛ cieeŋ Mɛ-gi-do amäni wi̱i̱kɛ. Diɔ̱ɔ̱kdiɛn ɛmɔ ɛ Na-pɛth.

¹² Ɛn wa̱nɔ /ken gaat Ma-na-thɛ rɛ̈k tɔ̱tɔ̱ lɛni luäŋ kɛ käni bäkɛ ɣöö ci ji̱ Kɛ-naan ɛ ŋok i̱ bikɛ cieŋ rɛy rööl.

¹³ Kä mëë ci gaat I-thɛ-rɛl buɔ̱mdiɛn re̱p cukɛ ji̱ Kɛ-naan moc lät ti bɛc, kä /ke̱nkɛ kɛ luäŋ kɛ juɔ̱c ɛ wi̱w.

Thiec gan Ɛ-pa-rim kɛnɛ duɔth Ma-na-thɛ kɛ pëk mi rep

¹⁴ Täämɛ cu do̱r kuayni Jo-thɛp Jɔ-cua jiök i̱, “Ɛ luɔt ŋukä min jak ji̱ kä bi ɣä ka̱m ni guɔk kɛl kä ci ɣä ŋuɔ̱k ni jɔw muɔ̱ɔ̱n kɛl, kä nɛɛni jɛ ɛn ɣöö ci Kuoth Nhial kɔ puɔ̱ŋ ɛlɔ̱ŋ.”

¹⁵ Cu Jɔ-cua kɛ loc i̱, “Mi ɛ yɛn do̱r mi ŋuan nɛy kɛ, kä /ci rɛy rööl pa̱a̱m Ɛ-pa-rim ro̱ŋ kɛ yɛ, wiaa rɛy ruɔ̱ɔ̱p kä ɛn thɔ̱ŋi wiaa kuecɛ rɔ̱ gua̱a̱th rɛy rööl ji̱ Pɛ-rii-dhi kɛnɛ ji̱ Rɛpa.”

¹⁶ Cukɛ jɛ loc i̱, “Ɛn päm kuiyɛ ɛlɔ̱ŋ kɛ kɔ, kä kɛn ji̱ Kɛ-naan diaal tin ciaŋkɛ ni rɛy paan täpä tekɛ kɛ thurbiɛɛli yie̱e̱thä, matdiɛn kɛɛl amäni nɛy tin cieŋ kä Beth-can kɛnɛ dho̱rkɛ, kɛ tin te paan Täpä kä Yidh-rɛɛl.”

¹⁷ Kɛ kui̱ ɛmɔ cu Jɔ-cua ruac kɛ thok duëël Jo-thɛp, cuɛ Ɛ-pa-rim kɛnɛ Ma-na-thɛ jiök i̱, “Ɛ yɛn do̱r mi di̱i̱t, kä lua̱ŋdun ro̱ŋ ɛlɔ̱ŋ, /ci gua̱a̱thdun bi a kɛl kärɔa,

¹⁸ kä min ro̱l pa̱a̱m ɛ duundun cäŋɛ min ɛ rup bä, bia jɛ jɔap piny, kä pëkkɛ diaal tin wee ni raar kɛ nyinkun, kɛ ɣöö yɛn bia ji̱ Kɛ-naan joc, cäŋ tekɛ kɛ thurbiɛɛli yie̱e̱thä kä bumkɛ bä.”