Jɔ-cua 16 - RUAC KUƆTH IN RƐL RƆ

Ɛ-pa-rim kɛnɛ Ma-na-thɛ in te kui̱c konyä ca̱ŋ

¹ Täämɛ cu guɔk muɔ̱ɔ̱n rööl in yiɛɛth rɔ kɛ gaat Jo-thɛp jiɛn ni kä Jɔr-dɛn, gekä Jɛ-ri-ko wä amäni gua̱a̱th mi cɔal i̱ löli Jɛ-ri-ko kä käny cäŋ kä cuɛ jɛ lɔath ni kui̱c in wee ni däär dɔaar in jiɛɛy rɔ ni kä Jɛ-ri-ko wëë yiath ni rɛɛk päämni in cɔal i̱ Beth-ɛl.

² Kä cuɛ jɛ nyɔk kɛ käni ni kä Beth-ɛl cuɛ wä ni Luudh, kä cuɛ räth amäni ke̱y rööl ji̱ A-rɛk kä Ä-ta-roth,

³ kä cuɛ luɔ̱ŋ piny wäkädɛ konyä ca̱ŋ wä amäni rɛy rööl ji̱ Yap-let, wëë yiath ni Beth-o-ron in te piny, kä cuɛ wä ni Gɛ-dhɛr kä cu ke̱k këthdɛ rɔ wä pi̱em ni Bar in Bo̱r in te kam wi̱i̱ni.

⁴ Kä cu nɛmɛ a jɛn pëk ëë cu rɔ yiɛth kɛ gaat Jo-thɛp ni Ɛ-pa-rim kɛnɛ kui̱c Ma-na-thɛ in te kä kony cäŋ.

Key rööl gan Ɛ-pa-rim

⁵ Nɛmɛ cua jɛn key rööl in yiɛɛth rɔ kɛ thuk duëli gan Ɛ-pa-rim kä cuɛ rɔ lɔth ni kä A-tɛ-roth-a-dar kä käny cäŋ wä ni Beth-o-ron in te nhial.

⁶ Kä cuɛ rɔ nyɔk kɛ jiɛn ni Bar in Bo̱r in te kam wi̱i̱ni, cuɛ wä ni Mik-mɛ-thath kui̱c in lot ni kayŋuääk kä cuɛ rɔ nyɔk kɛ tot lotdä känyä ca̱ŋ kä cuɛ jac ni Tää-nath-ci-lo kä cuɛ räth nhiam kä Ya-no-a.

⁷ Kä cuɛ jiɛn kä Ya-no-a cuɛ jɛ yiath kä Ä-ta-roth, kɛnɛ Naara, kä cuɛ rɔ ben thi̱ŋ nikɛ Jɛ-ri-ko, kä palɛ ni Jɔr-dɛn.

⁸ Kui̱c in lot ni kony cäŋ cu key jiɛn ni kä Ta-pu-a cuɛ rɔ wä yal ni waaŋ mi cɔal i̱ Kana kä cu kethnikɛ rɔ̱ wä pi̱em ni Bar in Bo̱r in te kam wi̱i̱ni. Nɛmɛ ɛ jɛn pëk ëë yiɛɛth rɔ kɛ gaat Ɛ-pa-rim nikɛ pëk gɔalikiɛn.

⁹ Matdiɛn diaal kɛɛl amäni rɛ̈k kɛ dho̱rkiɛn kɛɛl tëë ca kuany göl kɛ kui̱ gan Ɛ-pa-rim, kɛn rɛ̈k tɔ̱tɔ̱ tekɛ rɛy rööl ëë yiɛɛth rɔ kɛ gaat Ma-na-thɛ.

¹⁰ Duundɛ ɣöö /kenkɛ ji̱ Kɛ-naan tëë ciaŋkɛ ni Gɛ-dhɛr tuk kä cu ji̱ Kɛ-naan cu cieŋ rɛy ji̱ Ɛ-pa-rim amäni cäŋ ɛ wa̱lɛ mi, kä cukɛ ciɛŋ ala kuaanykiɛn.