Jɔ-cua 14 - RUAC KUƆTH IN RƐL RƆ

Däkni rööl kä kony cäŋ Jɔr-dɛn

¹ Täämɛ ti̱ti̱ kɛ kɛn dho̱r tëë ci gaat I-thɛ-rɛl kɛ guäl rɛy rööl Kɛ-naan, kɛ mëë ci Ɛl-a-dhar in la bo̱o̱th palä kɛnɛ Jɔ-cua gat Nun, kɛ bööth thukni duëli dööri gan I-thɛ-rɛl kɛ däk kä kɛ.

² Cua ram ɔ ka̱m gua̱a̱thdɛ kɛ kɔr ma̱r ma̱a̱ri, nikɛ ruac ëë ci Kuoth Nhial ɛ lat kɛ thok Muthɛ kɛ kui̱diɛn, kɛn döör bäŋuan wi̱cdiɛn tha̱a̱ŋ döör kɛl,

³ kɛ ɣöö ci Muthɛ döör rɛw wi̱cdiɛn tha̱a̱ŋ döör kɛl ku thuŋ tëm gua̱thkiɛn kui̱c kiɛɛr Jɔr-dɛn. Kä thilɛ guɔ̱k mi cua thöp ji̱ Lii-bay rɛydiɛn.

⁴ Kä min gaat Jo-thɛp kɛ döör rɛw, Ma-na-thɛ kɛnɛ Ɛ-pa-rim. Ɛn wa̱nɔ thilɛ mun mi cua tem ji̱ Lii-bay rɛy rööl ɛmɔ kä cukɛ je̱k ni rɛ̈k ciɛŋä amäni gua̱th kɛ kui̱ la̱k ɣɔ̱ɔ̱kiɛn.

⁵ Inɔ, cu gaat I-thɛ-rɛl mun da̱k nikɛ jɛn duɔ̱ɔ̱p ëë ci Kuoth Nhial ɛ la̱t Muthɛ.

Ɣɛb-ron ɛ duŋ Ka-leb

⁶ Kä ɛn ni̱ni tɔ̱tɔ̱, cu gaat Juda ben kä Jɔ-cua kä Gil-gal, kä cu Ka-leb gat wutdä mi cɔal i̱ Yɛ-pö-nɛ raan ji̱ Kɛ-nadh jɛ ben jiök i̱, “Ŋäci mëë ci Kuoth Nhial ɛ la̱t raandɛ ni Muthɛ kɛ kui̱dan da̱ŋ rɛw kä Ka-dɛc-bar-ni-ya.

⁷ Ɛn guäth ëëdan ci runkä a run ti jiɛn ŋuaan mëë jäk Muthɛ in la kuany Kuɔth Nhial ɣä ni kä Ka-dɛc-bar-ni-ya ɛn ɣöö bä rɛy rööl ben lim. Kä cua jɛ luɔ̱c thok nikɛ thuɔ̱k lɔaaydä kɛɛliw.

⁸ Kä dämaari tëë wakɔ kɛɛl cukɛ loc nath ben jak kä bath. Kä ɣän cua dhil käp ni thok Kuɔthdan ni Kuoth Nhial.

⁹ Kä ɛ niɛ cäŋ ɛmɔ pa̱ny, cu Muthɛ ɛ yac i̱, ‘Ɛpuc, mun in ci cop thi̱n ni kɛɛliwdɛ bɛ la duundu amäni ciaŋ yɛnɛ gaatku, kɛ ɣöö ci käp ni thok Kuɔthdä ni Kuoth Nhial.’

¹⁰ Kä täämɛ, guic ɛ, tokɛ ni guäth ëë ruac Kuoth Nhial kɛ Muthɛ guäth ëë luk gaat I-thɛ-rɛl däär dɔaar kɛ jɛ amäni täämɛ kɛ run ti jiɛn ŋuaan wi̱cdiɛn dhieec kä nikɛ ruacdɛ Kuɔth Nhial cä ŋot te̱e̱kä. Kä ɛn täämɛ mi runkä jiɛn bädäk wi̱cdiɛn dhieec,

¹¹ kä ŋuɔtdä nikɛ buɔ̱m ce̱tnikɛ buɔ̱m ëë tekɛ ɣä ni̱ni tëë jäk Muthɛ ɣä. Kä lua̱ŋdä ëë wal kɛ ko̱r ɛ niɛ jɛn ŋot thi̱n ɔ täämɛ amäni lua̱ŋ kɛ ti kɔ̱kiɛn.

¹² Kɛ kui̱ ɛmɔ täämɛ, ku ro̱l päämni ɛmɛ mal ni ka̱m ɣä kɛ ɣöö ɛ jɛn mëë lat Kuoth Nhial ɛ ɛn cäŋ ëëdan. Kɛ ɣöö ci jɛ liŋ ɛn cäŋ ëë ɛn ɣöö cieŋ nɛy tin cɔal i̱ ji̱ Ä-nak thi̱n kɛ rɛ̈kiɛn tin di̱t ti ca kal ni bum. Kä mi wä Kuoth Nhial ɣä luäk, dëë kɛ joc ce̱tnikɛ mëë cɛ lar.”

¹³ Ɛ jɛn, cu Jɔ-cua Ka-leb gat Yɛ-pö-nɛ poth kä cuɛ Ɣɛb-ron ka̱m jɛ ala duundɛ.

¹⁴ Kɛ kui̱ ɛmɔ ci Ɣɛb-ron cua duŋ Ka-leb gat Yɛ-pö-nɛ ran ji̱ Kɛ-nadh amäni cäŋ ɛn wa̱lɛ mi nikɛ thar kä ɣöö cɛ lot ni kɔr kä min go̱r Kuoth Nhial ni Kuoth I-thɛ-rɛl ɛ.

¹⁵ Kä Ɣɛb-ron kɛ ciötdɛ min wen ɛ Kir-yath-ar-bä. Kä jɛn Ar-bä ɛmɛ ɛ jɛn ram ëë di̱t ni jɛn rɛy ji̱ Ä-nak. Kɛ kɔrɛ cu wec cu lɔ̱ɔ̱ŋ kä ko̱o̱ri.