Jɔ-cua 13 - RUAC KUƆTH IN RƐL RƆ

Pëk rööl in ŋot ka̱pdɛ

¹ Täämɛ guäth ëë ci Jɔ-cua kua wut mi di̱i̱t, cu Kuoth Nhial ɛ jiök i̱, “Ji̱n ɛn täämɛ ci la wut mi di̱i̱t, kä ci dɔŋ ɛyum, kä pëk rööl mi di̱i̱t ŋotdɛ piny /ka̱n jɛ ni thuk kɛ ka̱p.

² Kä nɛmɛ ɛ jɛn pëk rööl in ŋot piny kɛ mi ba ka̱n, jɛn ro̱l ji̱ Pi-li-thɛt kɛɛliw, kɛ ro̱l ji̱ Gɛ-cur kɛɛliw,

³ amäni ro̱l ji̱ Awi kɛɛliw kui̱c cueec. Ɛn pëk in te kam waaŋ in cɔal i̱ Ci-ɣor kui̱c känyä ca̱ŋ rööl I-jëp kɛnɛ rɛk mi cɔal i̱ Ɛk-ron kui̱c caam, mɛmɛ ɛ ro̱l in ciölkɛ ji̱ Kɛ-naan. Kua̱r Pi-li-thɛt da̱ŋ dhieec tëë ruec thi̱n kɛ kua̱r rɛ̈kni ti cɔaalkɛ i̱ Gadha, kɛ Ac-dod, kɛ Ac-kɛ-lon, kɛ Gɛ̈th, amäni Ɛk-ron.

⁴ Luɔtdɛ ɣöö pëk rööl Kɛ-naan kɛɛliw kɛ Maara min mɔ rɛk ji̱ Dhi-don wëë yiath ni Ä-pek rɛy rööl ji̱ Ɛ-mor, ŋotdɛ piny,

⁵ a känɛ ni rööl Gi-bɛl kɛnɛ ro̱l Lɛ-ba-nɔn kɛɛliw kui̱c käny cäŋ, känɛ ni rɛɛk Baal-gad piny pa̱a̱m Ɛr-mon wä amäni cothdu rɛɛk Mith-rɛ-poth-ma-yim. Kɛ kɛn ji̱ Dhi-don diaal.

⁶ “Kä kɛn tin cieŋ wi̱i̱ pääm kä Lɛ-ba-nɔn a wä kä Mith-rɛ-poth-ma-yim, amäni kɛn ji̱ Dhi-don diaal. Ɛ ni ɣän puɔ̱nydä bikɛ joc ɔ nhiam gan I-thɛ-rɛl. Kä täämɛ nikɛ ruacdä, bi mun rööl ɛmɛ däk kä gaat I-thɛ-rɛl kɛ gaak ɛ ba duundiɛn.

⁷ Kä täämɛ ɛn mun puɔ̱nydɛ däkni jɛ kamä dööri gan I-thɛ-rɛl da̱ŋ bäŋuan kɛnɛ tha̱a̱ŋ döör Ma-na-thɛ.”

Ro̱l ëë ca da̱k kui̱c känyä ca̱ŋ Jɔr-dɛn

⁸ Täämɛ yuɔ̱p in dɔ̱ŋ kä do̱r Ma-na-thɛ, kɛn cikɛ kui̱cdiɛn dan kɛɛl kɛ döör Rɛ-u-ben kɛnɛ Gad, jɛn mun ëë ci Muthɛ in la kuany Kuɔth Nhial ɛ ka̱m kɛ kui̱c kiɛɛr Jɔr-dɛn kä käny cäŋ.

⁹ Jɛn känɛ ni rɛɛk Ä-ro-er in te wi̱i̱ tuɔ̱ɔ̱ŋ täpä yiëër in cɔal i̱ Ar-non, kɛnɛ rɛk in te däär paan dhɔaar ɛmɔ, amäni jɛn pan Me-dɛ-ba in carcaar, wëë yiath ni rɛɛk in cɔal i̱ Di-bon,

¹⁰ amäni rɛ̈k diaal tin ruackɛ ɛ kuäär ji̱ Ɛ-mor ni Thi-yon mëë ruec kä Ɛc-bon, amäni rɛy rööl ji̱ A-mon.

¹¹ Amäni ro̱l Gil-yad, kɛnɛ röl ji̱ Gɛ-cur diaal kɛnɛ ji̱ Maaka, dhɔr pa̱a̱m Ɛr-mon kɛɛliw, kɛ ro̱l Ba-can ni kɛɛliw wëë pi̱em ni rɛɛk Thal-ka.

¹² Bɛ reet kɛ dhɔr kua̱r ni Ög in mɔ Ba-can. Kuäär ɛmɔ ɛ jɛn rue̱y kɛl ëë mɔ duɔth kä ji̱ Rɛpa, kä cuɛ ruëc rɛ̈kni Ac-ta-roth kɛnɛ Ɛ-dhɛ-ri. Kɛn nɛy ti̱ti̱ diaal cu Muthɛ kɛ tiam kä cuɛ kɛ juɔc raar.

¹³ Kä ɛ ni ji̱ Gɛ-cur kɛnɛ ji̱ Maaka kärɔ̱ kɛn tëë cu gaat I-thɛ-rɛl kɛ päl, kä cu raan Gɛ-cur kɛnɛ raan Maaka cu ciɛŋ rɛy gan I-thɛ-rɛl amäni cäŋ ɛ wa̱lɛ mi.

¹⁴ Kä täämɛ rɛy döör gan I-thɛ-rɛl, cu do̱r Lii-bay thil kui̱c mi ca thöp jɛ ɛ Muthɛ kɛ ɣöö muc tin la wa̱ŋkɛ Kuoth Nhial ni Kuoth ji̱ I-thɛ-rɛl ɛ jɛn kui̱cdiɛn nikɛ mëë cɛ la̱t Muthɛ.

Kui̱c ëë yiɛɛth rɔ kɛ Rɛ-u-ben

¹⁵ Täämɛ cu Muthɛ pëk ɛmɛ ka̱m do̱r ji̱ Rɛ-u-ben nikɛ pëk ciëëŋnikiɛn.

¹⁶ Ɛ jɛn dhɔr ëë känɛ ni rɛɛk Ä-ro-er in te wi̱i̱ tuɔ̱ɔ̱ŋ täpä yiëër in cɔal i̱ Ar-non amäni rɛk in te däär paan kueer ɛmɔ, kɛ mun paan Me-dɛ-ba in carcaar,

¹⁷ kɛ Ɛc-bon kɛnɛ rɛ̈kɛ diaal tin te rɛy dhɔaarɛ min thör, kɛ Di-bon, kɛnɛ Ba-moth-baal, kɛ Beth-ba-lɛ-mon,

¹⁸ kɛ Yaadh kɛnɛ Kɛ-dhe-moth, kɛ Me-paath,

¹⁹ kɛ Kir-ya-tha-yim, kɛnɛ Thi-bɛ-ma, kɛ Dhɛ-rɛth-ca̱r in te wi̱i̱ pa̱a̱m rɛy paan,

²⁰ amäni Beth-pɛ-yor, kɛ täp Pi̱dh-ga, kɛnɛ Beth-yɛ-ci-moth.

²¹ Tɔ̱tɔ̱ kɛ kɛn rɛ̈k paan diaal, amäni wec kua̱r ji̱ Ɛ-mor ni Thi-yon kɛɛliw mëë ruec kä Ɛc-bon. Jɛn cu Muthɛ ɛ tiam kɛɛl amäni gaatkɛ tëë ciaŋkɛ ro̱l, kä tɔ̱ kua̱r ji̱ Mid-yan, kɛ Ɛwi kɛnɛ Rɛ-kɛm kɛ Dhur kɛnɛ Ɣur kɛ Rɛbä.

²² Kä rɛy nɛɛni tëë ci gaat I-thɛ-rɛl kɛ näk ko̱o̱r ɛ ram mi cɔal i̱ Bil-am gat Bɛ-or mi la maar ti bi ben.

²³ Kä cu pëk këth gan Rɛ-u-ben cua kir Jɔr-dɛn kä kony cäŋ. Nɛmɛ ɛ jɛn kui̱c ëë ci rɔ yiɛth kɛ ji̱ Rɛ-u-ben, nikɛ pëk thukni duëlikiɛn kɛnɛ rɛ̈kiɛn amäni dho̱rkiɛn.

Kui̱c ëë yiɛɛth rɔ kɛ Gad

²⁴ Ɛn wa̱nɔ bä, cu Muthɛ döör gan Gad moc tha̱a̱ŋ muɔ̱ɔ̱n kɛ kui̱ thukni duëlikiɛn.

²⁵ Kä cu ke̱y rööliɛn rɔ lɔth ni kä Ya-dhɛr, kɛnɛ rɛ̈k diaal tin te rɛy rööl Gil-yad, kɛ tha̱a̱ŋ muɔ̱ɔ̱n rööl ji̱ A-mon wëë pi̱em ni rɛɛk Ä-ro-er in te nhiam Rɛ̈-baa

²⁶ bɛ lɛ ka̱n ni kä Ɛc-bon wëë pi̱em ni Ra-math-midh-pɛ, kɛnɛ Bɛ-to-nim, kä bɛ nyɔk kɛ käni ni kä Ma-na-yim wä amäni ke̱y Dɛ-bir,

²⁷ kä rɛy paan bɛ mat ni rɛ̈k Beth-a-ram, kɛnɛ Beth-nim-ra, kɛ Cu-koth, kɛnɛ Dha-pon, kɛ duɔth rööl kua̱r Ɛc-bon ni Thi-yon, min lɔth ni taŋ yiëër Jɔr-dɛn wëë pi̱em ni Bar Gɛ̈-lɛ-li kɛnɛ nhiam kiɛɛr Jɔr-dɛn lotdä käny cäŋ.

²⁸ Nɛmɛ ɛ jɛn kui̱c in ci rɔ yiɛth kɛ ji̱ Gad nikɛ pëk thukni duëlikiɛn, nikɛ rɛ̈kɛ kɛ dho̱rkiɛn.

Kui̱c ëë yiɛɛth rɔ kɛ tha̱a̱ŋ döör Ma-na-thɛ

²⁹ Ɛn Muthɛ bä cɛ tha̱a̱ŋ döör gan Ma-na-thɛ ka̱m kui̱cdiɛn nikɛ pëk thukni duëlikiɛn.

³⁰ Kä mun rööliɛn cuɛ jɛ ka̱n ni kä Ma-na-yim, rɛy rööl kua̱r Ba-can ni Ög kɛɛliw, kɛɛl kɛ dho̱r ti jiɛn bäkɛl tin te rɛydɛ tëë ca ka̱n ɛ wut mi cɔal i̱ Ya-ir,

³¹ amäni tha̱a̱ŋ rööl Gil-yad, kɛɛl kɛ Ac-ta-roth kɛnɛ Ɛ-dhɛ-ri tin la rɛ̈k kuäärä kua̱r ni Ög. Ca tɔ̱tɔ̱ ka̱m ji̱ Ma-kir in la gat Ma-na-thɛ kɛ kui̱ tha̱a̱ŋ gan Ma-kir nikɛ pëk thukni duëlikiɛn.

³² Ti̱ti̱ kɛ kɛn tëë ci Muthɛ kɛ da̱k mëë ŋotdɛ tëë rɛy paan rööl Mo-ab kä käny cäŋ Jɛ-ri-ko kui̱c kiɛɛr Jɔr-dɛn.

³³ Ɛ ni do̱r gan Lii-bay kärɔ̱ tin thil pëk mi ca ka̱m kɛ, kɛ ɣöö Kuoth Nhial in la Kuoth ji̱ I-thɛ-rɛl ɛ jɛn kui̱cdiɛn nikɛ mëë cɛ la̱r kɛ.