Jɔ-cua 11 - RUAC KUƆTH IN RƐL RƆ

Ti̱em Jɔ-cua kɛ Ya-bin kɛnɛ ji̱ kɔaarɛ

¹ Kä nɛ̈nɛ jɛ, mëë ci Ya-bin kuäär Ɣa-dhor theŋ, cuɛ Yo-bab kuäär Ma-dhön la̱r lär kɛnɛ kuäär Cim-rɔn kɛ kuäär Ak-cap,

² amäni kua̱r tëë te caam päämni kɛnɛ tëë te kä Ä-ra-ba cueec Gɛ̈-lɛ-li, kɛnɛ tin te peek rööl in ta̱p, kɛnɛ tin te kä kony cäŋ kä Na-poth-dor,

³ cu amäni kua̱r rɛ̈kni Kɛ-naan tin te kä käny cäŋ kɛnɛ kony cäŋ, kɛnɛ nɛy diaal ti̱ti̱ tin ciaŋkɛ ni dhɔr päämni, ji̱ Ɛ-mor, kɛ ji̱ Ɣɛ̈th, kɛ ji̱ Pɛ-rii-dhi, kɛ ji̱ Yɛ-buth amäni ji̱ Iwi thaar pa̱a̱m Ɛr-mon rɛy rööl Midh-pa.

⁴ Kä cukɛ ben raar kɛn diaal amäni rɛmkiɛn /ciɛ nath bä kä päär pëkdiɛn kɛ nyin lidä thuɔk yiëër. Kɛn tekɛ kɛ jio̱o̱k tuɔ̱ruɔ̱kni ti ŋuan kɛnɛ thurbiɛɛli ti yɔ̱a̱ckɛ ɛ jio̱o̱k tuɔ̱ruɔ̱k.

⁵ Kä cu kua̱r ti̱ti̱ diaal rɔ̱ mat kɛɛl kä cukɛ ben pua̱t guäth kɛl mi cɔal i̱ gua̱a̱th lo̱o̱lä Me-rom kɛ ɣöö bikɛ ben nyiëëny kɛ ji̱ I-thɛ-rɛl.

⁶ Kä cu Kuoth Nhial Jɔ-cua jiök i̱, “/Cu kɛ luth, kɛ ɣöö iruun kɛ jɛn thaak ɛmɛ pa̱ny, ɣän bäkɛ näk nhiam ji̱ I-thɛ-rɛl. Yɛn bia jio̱o̱k tuɔ̱ruɔ̱knikiɛn duäny ciökni kä bia thurbiɛɛlikiɛn waŋ.”

⁷ Ɛ jɛn cu Jɔ-cua kɛnɛ nɛɛkɛ diaal kɛ ku mam piny guäth lo̱o̱lä Me-rom.

⁸ Kä cu Kuoth Nhial kɛ ka̱m ji̱ I-thɛ-rɛl, kä cukɛ kɛ näk kä cukɛ kɛ juɔc ni rɛɛk Dhi-don in di̱i̱t amäni Mith-rɛ-poth-ma-yim kɛnɛ pan Midh-pee kä käny cäŋ. Kä cuɛ kɛ näk a /ke̱rɛ kɛ pa̱l duɔth.

⁹ Kä cu Jɔ-cua lät nikɛ mëë ci Kuoth Nhial ɛ la̱r jɛ, cuɛ ciök jio̱o̱kni tuɔ̱ruɔ̱knikiɛn dua̱a̱ny kä cuɛ thurbiɛɛlikiɛn waŋ.

¹⁰ Kɛn ni̱ni tɔ̱tɔ̱ cu Jɔ-cua rɔ rieet jɔk kä cuɛ Ɣa-dhor ben ka̱n kä cuɛ kuäärɛ näk, kɛ ɣöö Ɣa-dhor ɛ jɛn ëë mat wuɔ̱th wi̱i̱ni ti̱ti̱ diaal.

¹¹ Kä cu ji̱ I-thɛ-rɛl ji̱kɛ diaal riam kɛ mut, cua kɛ dup, thilɛ ram kɛl mi cua duɔ̱th yiëë, kä cu Jɔ-cua ɛ cua̱th.

¹² Kä cuɛ rɛ̈k kua̱ri ti̱ti̱ diaal amäni kua̱rkiɛn kɛɛl tiam kä cuɛ kɛ näk kɛn diaal. Cuɛ kɛ nor nikɛ mëë ci Kuoth Nhial ɛ la̱r jɛ kɛ thok kuanyädɛ ni Muthɛ.

¹³ Cuɛ rɛ̈k diaal tëë cuŋ wuɔ̱thni biɛɛni päl ɛ ni Ɣa-dhor kärɔa ɛ nëë cuɛ cua̱th.

¹⁴ Kä cu gaat I-thɛ-rɛl kuak rɛ̈kni tɔ̱tɔ̱ ka̱p rɔ̱ amäni ɣɔ̱kiɛn, ɛ ni min cɔal i̱ raan kɛɛliw cukɛ näk kɛ mut amäni mëë cuɛ thil ram mi ŋot kɛ tɛ̈k.

¹⁵ Tëë diaal tëë ci Kuoth Nhial kɛ la̱t kuanydɛ ni Muthɛ, cu Muthɛ kɛ lɛni la̱th ji̱th Jɔ-cua, kä Jɔ-cua puɔ̱nydɛ cuɛ kɛ liŋ. Cuɛ tëë diaal tëë ca gik kä Muthɛ ɛ Kuoth Nhial la̱t nikɛ ta̱a̱ in görkɛ ɛ Kuoth.

Pëk rööl ëë ci Jɔ-cua ɛ käp

¹⁶ Ɛ jɛ inɔ, cu Jɔ-cua wec ku ka̱n kɛɛliwdɛ, dhɔr päämni, kɛ Nɛ-gɛb kɛɛliw, amäni mun Go-cɛn kɛɛliw, kɛnɛ dhɔr täpä, kɛ pan Ä-ra-ba, kɛnɛ ro̱l päämni ji̱ I-thɛ-rɛl amäni täpkɛ,

¹⁷ ni kä päm in cɔal i̱ A-lak in wä kui̱c rööl Ɛ-dɔm wëë yiath ni Baal-gad rɛy täpä Lɛ-ba-nɔn carä piɛny pa̱a̱m Ɛr-mon. Kä cuɛ kua̱rkiɛn diaal ka̱p cuɛ pɛn näkdiɛn.

¹⁸ Jɛn cuɛ ko̱r tɛr kɛ kɛn kua̱r ti̱ti̱ kɛ pëk ni̱ni ti ŋuan.

¹⁹ Thilɛ rɛk mi maar kɛ ji̱ I-thɛ-rɛl ɛ ni ji̱ Iwi tin cieŋ kä Gib-yon. Duɔthkiɛn diaal tɔ̱ cukɛ kɛ puɔ̱t ni ko̱o̱r,

²⁰ kɛ ɣöö ɛ ca̱p Kuɔth Nhial ɛ nëë jak lo̱ckiɛn kä bum ɛ tet ɛn ɣöö bikɛ ji̱ I-thɛ-rɛl ben mak kɛ ko̱r, kɛ ɣöö Kuoth Nhial go̱o̱rɛ ni ɣöö ba kɛ däk ɛwic, kä thilɛ pälikä mi bi kɛn ɛ je̱k kä ɛni ɣöö ba kɛ näk, nikɛ mëë cɛ la̱t Muthɛ.

²¹ Ɛ jɛ inɔ, cu Jɔ-cua ku ben kä cuɛ ji̱ Ä-nak ben töl raar röli päämnikiɛn, kä Ɣɛb-ron, kɛ Dɛ-bir, kɛ Ä-nab, kɛnɛ röl päämni Juda diaal amäni wi̱c päämni I-thɛ-rɛl diaal. Cu Jɔ-cua kɛ nor kɛɛl amäni rɛ̈kiɛn.

²² Thilɛ ram kɛl kä ji̱ Ä-nak mi cu duɔth ro̱o̱l I-thɛ-rɛl ɛ ni tëë tɔt tëë duɔth kä Gadha, kɛ Gɛ̈th, kɛ Ac-dod.

²³ Inɔ, cu Jɔ-cua ro̱l käp ni kɛɛliwdɛ nikɛ dup diaal tëë ci Kuoth Nhial kɛ gik kä Muthɛ. Kä cu Jɔ-cua ɛ ka̱m gaat I-thɛ-rɛl ala mun gua̱ndɔɔŋnikiɛn kä cuɛ jɛ däk kä kɛ nikɛ gua̱th tin yiathkɛ rɔ̱ kɛ döörkiɛn diaal. Kä cu wec cu lɔ̱ɔ̱ŋ ko̱o̱r.