Jɔ-cua 10 - RUAC KUƆTH IN RƐL RƆ

Käni wi̱i̱ni cuëëc

¹ Täämɛ mëë ci kuäär Jɛ-ru-tha-lɛm ni Ä-do-ni-dhɛ-dɛk ɛ liŋ ɛn ɣöö ci Jɔ-cua Aay ka̱n kä cɛ jɛ nor ni kɛɛl kɛ kuäärɛ ce̱tnikɛ mëë cɛ lät kä Jɛ-ri-ko kɛnɛ kuäärɛ, kä cɛ lɛni liŋ bä ɛn ɣöö ci ji̱ Gib-yon maariɛn lat kɛ ji̱ I-thɛ-rɛl kä cieŋkɛ kɛɛl,

² kɛ kui̱ ɛmɔ jɛn kɛnɛ ji̱ Jɛ-ru-tha-lɛm diaal cu ca̱riɛn nyuɔɔn ɛlɔ̱ŋ kɛ dual, kɛ ɣöö Gib-yon ɛ rɛk mi duŋ di̱i̱t kä ce̱t ta̱a̱dɛ nikɛ wec wutdä, kä di̱t ni jɛn kä Aay, kä nɛy kɛ diaal kɛ ji̱ ko̱o̱r ti bum ɛlɔ̱ŋ.

³ Nɔmɔ ɛ jɛn thar kä mëë cu kuäär Jɛ-ru-tha-lɛm jak kä ɣöö bɛ thok jäk kä O-ɣam kuäär Ɣɛb-ron, kɛnɛ Pir-am kuäär Yar-muth, kɛ Ya-pia kuäär La-kic, amäni Dɛ-bir kuäär Ɛg-lɔn, jio̱kɛ kɛ i̱,

⁴ “Biaa lua̱kɛ ɣä kɛ käp ji̱ Gib-yon ko̱r, kɛ ɣöö cikɛ maar lat kɛ Jɔ-cua kɛnɛ ji̱ I-thɛ-rɛl.”

⁵ Kɛn kua̱r tin di̱t da̱ŋ dhieec rɛy rööl Ɛ-mor, cukɛ ji̱ kööriɛn ma̱a̱t, kä cukɛ Gib-yon go̱l kä cuɛ cua käpdɛ ko̱r.

⁶ Ɛ jɛn cu ji̱ Gib-yon Jɔ-cua ku nöp ni wi̱cdɛ kä Gil-gal i̱, “/Ci kɔn kuaanyku bi jek, bër kän kɔ kä luäk kɔ, kä /cu kɔ ri̱t jɔkdu, kɛ ɣöö ci kua̱r ji̱ Ɛ-mor diaal tin ciaŋkɛ ni ro̱l päämni rɔ̱ mat kä ca kɔ ka̱p ko̱r.”

⁷ Ɛ jɛn cu puɔ̱nydɛ Jɔ-cua kɛnɛ ji̱ köörɛ diaal amäni wäthkiɛn jiɛn ni kä Gil-gal.

⁸ Kä cu Kuoth Nhial Jɔ-cua jiök i̱, “/Cu jak kä bi nɛy ɛ tɔ̱ luɔ̱th, cä ji̱ ku thuŋ ka̱m ti̱emdiɛn, thilɛ ram kɛl rɛydiɛn mi bi ji̱ luäŋ kɛ liɛp.”

⁹ Kɛ kɔr kä mëë ci Jɔ-cua wäär kɛɛliw cuath jäl, cuɛ kɛ ben mam.

¹⁰ Kä cu Kuoth Nhial kɛ nyon nhiam ji̱ I-thɛ-rɛl tin cua kɛ näk kɛ näk mi di̱i̱t kä Gib-yon, kä cukɛ kɛ joc wäkädiɛn piny wi̱i̱ pa̱a̱m kä Beth-o-ron, kä cukɛ kɛ na̱k lɛɛr amäni gua̱a̱th mi cɔal i̱ Ä-dhe-ka cu räth ni guäth mi cɔal i̱ Ma-ke-da.

¹¹ Kä ɛn guäth in barkɛ ni rɔ̱ kä ji̱ I-thɛ-rɛl min luɔ̱ŋkɛ rɔ̱ piny wi̱i̱ pa̱a̱m kä Beth-o-ron, cu Kuoth Nhial kɛ bök ni nhial kɛ guiy nhial kä cu guiy kɛ na̱k lɛɛr amäni Ä-dhe-ka. Kä cu ŋuan ni nɛy tin ci guiy kɛ thöŋ kä tin ci ji̱ I-thɛ-rɛl kɛ näk kɛ yio̱w.

¹² Kä kɛ jɛn cäŋ ëë ci Kuoth Nhial ji̱ I-thɛ-rɛl ka̱m ti̱em ji̱ Ɛ-mor, cu Jɔ-cua Kuoth Nhial lam nhiam gan I-thɛ-rɛl, kä cuɛ wee i̱, “Lö cäŋ, cuŋni ni kä Gib-yon, amäni ji̱n, Pay, cuŋni wi̱i̱ täpä A-ya-lon.”

¹³ Ɛ jɛn, cu cäŋ cu cuɔ̱ŋ ɛpi̱c, kä cu pay ja̱l päl, amäni mëë cu do̱r I-thɛ-rɛl thöŋ in te lɔɔydiɛn col kɛ ji̱ tɛ̈riɛn. Ɛ dëë kua mëë ca gɔ̱r rɛy Buɔk Ji̱ Ya-car? Cu cäŋ cuɔ̱ŋ däär, kä cuɛ dha̱l kɛ wä rɛmnikɛ kɛ cäŋ kɛl kɛɛliw.

¹⁴ Ɛ mi /ken me̱t tuɔɔk jɔalä wal, kä /ke̱rɛ rɔ lɛ nyäk kɛ tuɔɔk ɛn ɣöö cu Kuoth liŋ ni ruac ran, ɛ ni ɣöö wa̱nɛ mɛ Kuoth Nhial te̱rɛ ni ji̱ I-thɛ-rɛl ko̱riɛn.

¹⁵ Kɛ kɔrɛ cu Jɔ-cua kɛnɛ ji̱ I-thɛ-rɛl diaal luny thaar wecdiɛn in ca pua̱t kä Gil-gal.

¹⁶ Kä cu kua̱r da̱ŋ dhieec tin kɔn rɔ̱ le̱ny kä cukɛ rɔ̱ wä tɛ̱̈ɛ̱̈ kɔ̱kä mi ca guaŋ puɔ̱ɔ̱ny pa̱a̱m kä Ma-ke-da.

¹⁷ Kä cua thok nöŋ Jɔ-cua i̱, “Kɛn kua̱r da̱ŋ dhieec tɔ̱tɔ̱ ca kɛ je̱k cikɛ rɔ̱ tɛ̱̈ɛ̱̈ kɔ̱kä kä Ma-ke-da.”

¹⁸ Kä cu Jɔ-cua wee i̱, “Riëlɛ thok kɔa̱k pääm ti dho̱k, kä kuanyɛ naath ti ba kɛ guɛc thi̱n.

¹⁹ Kä yɛn /cuɔrɛ ŋot cuŋä, guɔ̱rɛ ji̱ tɛ̈run kä wiaa yuɔ̱pɛ thariɛn lɛɛr, /cuɔrɛ kɛ nhök cop rɛ̈knikiɛn kɛ ɣöö ci Kuothdun ni Kuoth Nhial kɛ la̱th te̱tnikun.”

²⁰ Kä ɛ jɛn, mëë ci Jɔ-cua kɛnɛ gaat I-thɛ-rɛl ku thuɔ̱k näkdiɛn kɛ ti̱em mi di̱i̱t kɛ kɔr kä mëë cikɛ kɛ näk ɛ, cu tin tɔt tin ci kään rɔ̱ yuɔt rɛ̈knikiɛn.

²¹ Inɔ, cu nɛy diaal luny kɛ mal pua̱a̱nydiɛn kä Jɔ-cua thaar gɔaaliɛn guäth in cikɛ pua̱t thi̱n kä Ma-ke-da. Kä cuɛ thil nɛy ti cu thokdiɛn wee bow kɛ kui̱ gan I-thɛ-rɛl, cäŋ kuɛɛ la ram kɛl.

²² Ɛ jɛn, cu Jɔ-cua ku wee i̱, “Lɛ̈pɛ thok kɔa̱k kä nöŋɛ kɛ ɣä kɛn kua̱r da̱ŋ dhieec tɔ̱tɔ̱.”

²³ Kä cukɛ jɛ la̱t inɔ, cukɛ kua̱r da̱ŋ dhieec ti̱ti̱ nöŋ jɛ. Nɛmɛ ɛ kuäär in di̱i̱t kä Jɛ-ru-tha-lɛm kɛnɛ kuäär Ɣɛb-ron kɛ kuäär Yar-muth kɛ kuäär La-kic amäni kuäär Ɛg-lɔn.

²⁴ Täämɛ mëë cikɛ kua̱r ti̱ti̱ ku nöŋ Jɔ-cua, cu Jɔ-cua ji̱ I-thɛ-rɛl diaal cɔl kä cuɛ kua̱r lathkeeri tëë ca ko̱r tɛr kɛ jɛ kɛɛl jiök i̱, “Biaa yi̱ekɛ ŋua̱k kua̱ri ti̱ti̱ piny kɛ ciökun.” Kä cukɛ jɛ la̱t.

²⁵ Kä cu Jɔ-cua kɛ jiök i̱, “/Cuɔrɛ dual, kä /cuɔrɛ rɔ̱ luär. Buɔ̱mɛ kä cuɔmɛ rɔ̱ kɛ ɣöö nɛmɛ ɛ min bi Kuoth Nhial ɛ lät kä ji̱ tɛ̈run diaal tin gɛ̈m kɛ yɛ.”

²⁶ Kä kɛ jɔakdɛ, cu Jɔ-cua kɛ näk, kä cuɛ ri̱ŋkiɛn ŋap wuɔ̱thni jiɛn da̱ŋ dhieec kä cukɛ te ŋääpä amäni kony ca̱ŋ.

²⁷ Kä ɛn guäth ɛmɔ mëë ci cäŋ kony, cu Jɔ-cua jɛ lar i̱ ɛ kɛ ka̱mkɛ piny wuɔ̱thni jiɛn, kä cukɛ kɛ yuɔr rɛy kɔ̱kä pa̱a̱m ëë cikɛ rɔ̱ tɔ̱w thi̱n, kä cukɛ jɛ kum kɛ pääm ti di̱t tin ŋot thi̱n amäni täämɛ.

²⁸ Ɛ jɛn, ɛn cäŋ ɛmɔ pa̱ny cu Jɔ-cua Ma-ke-da käp kä cuɛ jɛ däk kɛɛl amäni kuäärɛ kɛ mut. Kɛn nɛy diaal tëë te wi̱c cuɛ kɛ näk a thil rue̱y. Inɔ, cuɛ kuäär Ma-ke-da lät kä mëë cɛ lät kä kuäär Jɛ-ri-ko.

²⁹ Kɛ kɔrɛ cu Jɔ-cua kɛnɛ rɛmkɛ Ma-ke-da bäl kä cukɛ räth rɛɛk mi cɔal i̱ Lib-na kä cukɛ jɛ wä mak piny.

³⁰ Ɛn rɛk ɛmɛ bä cu Kuoth Nhial ɛ lɛni ka̱m gaat I-thɛ-rɛl, kä cukɛ jɛ tiam amäni kuäärɛ. Cukɛ jɛ däk kɛ mutdiɛn a cu rɛydiɛn thil rue̱y ran. Kä cu Jɔ-cua kuäär rɛ̈ɛ̈k ɛmɔ la̱t kɛ le̱e̱l kua̱r rɛ̈ɛ̈k Jɛ-ri-ko.

³¹ Kä cuɛ räth kä La-kic jiɛnädɛ kä Lib-na, jɛn kɛnɛ gaat I-thɛ-rɛl diaal, kä cukɛ jɛ go̱l kä cukɛ jɛ lep ko̱r.

³² Kä cu Kuoth Nhial ɛ thöp kɛ bäkɛ cäŋ in rɛwdɛ, kä cukɛ jɛ däk kɛ mutdiɛn kä cukɛ ji̱kɛ diaal la̱t ce̱tnikɛ duŋ Lib-na.

³³ Ɛn wa̱nɔ, cu kuäär Gɛ-dhɛr ni O-ram ben kɛ ɣöö bɛ La-kic ben luɔr thi̱n, kä cu Jɔ-cua röm kɛ jɛ kɛnɛ nɛɛkɛ, kä cukɛ kɛ näk a dhälni rue̱y.

³⁴ Kä cu Jɔ-cua kɛnɛ ji̱ I-thɛ-rɛl diaal jiɛn kä La-kic kä cukɛ räth Ɛg-lɔn kä cukɛ jɛ go̱l kä cukɛ jɛ lep ko̱r.

³⁵ Kä ɛn cäŋ ɛmɔ cukɛ jɛ ka̱n, kä cukɛ jɛ däk kɛ mutdiɛn kä cuɛ nɛy diaal tëë te rɛydɛ nor ɛn cäŋ ɔ ce̱tnikɛ mëë cɛ lät kä La-kic.

³⁶ Kä cu Jɔ-cua kɛnɛ ji̱ I-thɛ-rɛl diaal räth ni Ɣɛb-ron jiɛnädiɛn kä Ɛg-lɔn, kä cukɛ jɛ tɛr,

³⁷ kä cukɛ jɛ ka̱n ɛn cäŋ ɔ, kä cukɛ jɛ däk kɛ mutdiɛn, cukɛ jɛ nor kɛnɛ kuäärɛ kɛ dho̱r diaal tin te thi̱n amäni ji̱kɛ diaal. Thilɛ ram mi cu duɔth thi̱n. Cuɛ ce̱tnikɛ mëë lätdɛ kä Ɛg-lɔn mëë cuɛ nor amäni ji̱kɛ diaal.

³⁸ Ɛ jɛn, cu Jɔ-cua kɛɛl kɛ ji̱ I-thɛ-rɛl diaal luny kä Dɛ-bir kä cukɛ jɛ ben tɛr.

³⁹ Kä cukɛ jɛ ka̱n amäni kuäärɛ kɛ dho̱rkɛ diaal, kä cukɛ ji̱kɛ näk kɛ mut kä cukɛ nɛy diaal nor, thilɛ rue̱y mi cuɛ pa̱l thi̱n. Ce̱tnikɛ mëë cɛ lät kä Ɣɛb-ron kɛnɛ Lib-na kɛ kuäärɛ, cuɛ jɛ lät kä Dɛ-bir inɔ bä kɛnɛ kuäärɛ.

⁴⁰ Inɔ, cu Jɔ-cua ro̱l ka̱n kɛɛliwdɛ, cuɛ jɛ go̱k pëkni diaal, pëk päämni kɛ pëk in cɔal i̱ Nɛ-gɛb, kɛ täp wec diaal kɛnɛ thär päämnikɛ amäni kua̱rkiɛn, kä /ke̱rɛ kɛ pa̱l rue̱y, cuɛ tin diaal tin tëk rɛydiɛn nor, nikɛ mëë ci Kuoth Nhial ni Kuoth I-thɛ-rɛl ɛ lar,

⁴¹ kä Ka-dɛc-bar-ni-ya amäni Gadha amäni rɛy rööl Go-cɛn kɛɛliw wä amäni Gib-yon.

⁴² Kä cu Jɔ-cua kua̱r ti̱ti̱ diaal käp wi̱cdiɛn kɛ gua̱a̱th kɛl, kɛ ɣöö ci Kuoth Nhial ni Kuoth ji̱ I-thɛ-rɛl nɛɛkɛ lua̱k thi̱n.

⁴³ Kɛ kɔrɛ cu Jɔ-cua kɛnɛ ji̱ I-thɛ-rɛl diaal loc wi̱cdiɛn kä Gil-gal.