Jɔ-cua 1 - RUAC KUƆTH IN RƐL RƆ

¹ Kɛ kɔr liɛth kuanyä Kuɔth Nhial ni Muthɛ, cu Kuoth Nhial ruac kɛ gat wutdä mi cɔal i̱ Nun ni Jɔ-cua mëë mɔ läät Muthɛ, kä cuɛ jɛ jiök i̱,

² “Ci kuanydä ni Muthɛ thil. Täämɛ, ji̱n, ku kir Jɔr-dɛn ŋok yɛnɛ nɛy ti̱ti̱ diaal, wiaa ni muun in wa̱a̱ ka̱m kɛ kɛn gaat I-thɛ-rɛl.

³ Kä ce̱tnikɛ mëë te kamäda kɔnɛ Muthɛ, cä mun in bia wä thi̱n ka̱m yɛ ni kɛɛliw.

⁴ Kä bɛ ke̱y muɔ̱ɔ̱ndun lɔth niɛ piny paan ɛmɛ a wä ni nhial muun päämni Lɛ-ba-nɔn, bɛ lɛ ka̱n ni kiir in di̱i̱t ni Yu-pɛ-ree-tidh kä käny cäŋ bɛ löth kɛ rɛy rööl ji̱ Ɣɛ̈th, bɛ ben yiath ni Bar in Bo̱r in te kam wi̱i̱ni kä kony cäŋ.

⁵ Ji̱n Jɔ-cua, thilɛ gat ran mi bi ji̱ luäŋ kɛ gëw runi te̱e̱kädu diaal, kɛ ɣöö ce̱tnikɛ mëë ta̱a̱ kɛ Muthɛ kɛɛl, ɣän bä te kɛɛl kɛ ji̱ bä, /cä ji̱ bi me̱t bäny piny.

⁶ A bum ni ji̱n, kä /cu dual kɛ ɣöö bi nɛy ɛ ti böth muun ëë cä guɔ̱k gua̱ndɔɔŋnikiɛn i̱ bi a duundiɛn.

⁷ A bum ni ji̱n, kä /cu dual kä ŋäcni jɛ ɛn ɣöö bi ŋuɔ̱t diaal la̱t ce̱tnikɛ mëë ca kɛ la̱t ji̱ ɛ kuanydä ni Muthɛ. Kä /cu tekɛ mi bi wäny kiɛ bi guäc rɛy kä tin diaal tin cɛ la̱t ji̱, kɛ ɣöö deri cu ja̱l kɛ cio̱o̱k mi gɔaa gua̱thni diaal.

⁸ Ɛn warɛgak ŋuɔ̱tni ɛmɛ a /ci luɛ̈ɛ̈r thokdu, kä la car rɛydɛ kɛ cäŋ kɛnɛ wäär, kɛ ɣöö bi la tiidi ni tin diaal tin ca gɔ̱a̱r rɛydɛ. Kɛ kui̱ ɛmɔ dëë lätku cu cuɔ̱ŋ.

⁹ Ɛ niɛ min cä la̱r ji̱ i̱ kämni lɔcdu buɔ̱m, kä /cu bath, kɛ ɣöö bä te kɛɛl kɛ ji̱ gua̱thni diaal ɣän Kuothdu ni Kuoth Nhial.”

Li̱eŋ laatni Jɔ-cua

¹⁰ Kɛ kɔr kä min ci Jɔ-cua ruac in ci Kuoth ɛ la̱t jɛ liŋ, cuɛ ruac kɛ kua̱r lätni ji̱ I-thɛ-rɛl wee i̱,

¹¹ “Wiaa rɛy wec kä wiaa jiökɛ naath i̱, ‘Rialɛ mi̱thkun ikä, kɛ ɣöö bia ro̱l in wä Kuothdan ni Kuoth Nhial ɛ ka̱m yɛ ala duundun wä ka̱n.’ ”

¹² Kä cuɛ ruac kɛ do̱r kuayni Rɛ-u-ben kɛnɛ do̱r kuayni Gad kɛ tha̱a̱ŋ döör kuanyni Ma-na-thɛ kä cuɛ kɛ jiök i̱,

¹³ “Tiɛtdɛ mëë ci kuany Kuɔth ni Muthɛ ɛ la̱r yɛ i̱ bi Kuothdun ni Kuoth Nhial yɛ dhil ka̱m mun ɛmɛ ala wecdun.

¹⁴ Kɛ kui̱ ɛmɔ, bi mänkun kɛnɛ nyintiɛtnikun kɛ ɣɔ̱kun duɔth wi̱c ɛmɛ min ci Muthɛ ɛ ka̱m yɛ kui̱c Jɔr-dɛn, kä bi nɛy tin buɔ̱m buɔ̱ɔ̱m kä yɛ yio̱o̱kiɛn ka̱n kä bikɛ kac kui̱c kɛɛl kɛ dämuɔɔrikun kä bikɛ wä ko̱o̱r kɛɛl kɛ kɛ,

¹⁵ amäni mi wä Kuoth dämuɔɔri wä nyuɔ̱ɔ̱r ɛn wani, ce̱tkɛ mi tia̱ mi, a bikɛ mun in käm Kuothdun ni Kuoth Nhial ɛ kɛ, ka̱n ala duundiɛn. Kä kɛ jɔak dërɛ cu luny muundun in ci Muthɛ in la kuany Kuɔth ɛ ka̱m yɛ kui̱c Jɔr-dɛn ɛmɛ lotdä käny ca̱ŋ, kä bia jɛ cu ben ka̱n.”

¹⁶ Kä cu döör ɛ tɔ̱ ɛ loc i̱, “Kɔn bakɔ tin ci la̱t kɔ la̱t ni kɛn diaal, kä bakɔ wä gua̱thni diaal tin bi kɔ jäk kä thi̱n.

¹⁷ Kɔn bakɔ thokdu liŋ bä, ce̱tnikɛ mëë cakɔ thok Muthɛ liŋ rɛy kä ti diaal. Min te ni jɛn thi̱n, a Kuothdu ni Kuoth Nhial luäk ji̱ thi̱n ce̱tnikɛ mëë cɛ Muthɛ luäk.

¹⁸ Ram in /ci ruaacniku bi liŋ, kä /ci bi la̱t ni min ci la̱r jɛ, jɛn ba näk. A bum ni lɔcdu.”