Jona 4 - RUAC KUƆTH IN RƐL RƆ

Jiääk lɔaac Jona kɛnɛ kɔ̱a̱c lɔaac Kuɔth

¹ Cuɛ Jona lɔcdɛ waŋ ɛlɔ̱ŋ kɛ kui̱ kä ɣöö /ken Kuoth ji̱ Ni-nɛ-be moc kɛ riɛk.

² Kä cuɛ Kuoth Nhial jiök i̱, “Kuoth Nhial, nɛmɛ, /ciɛ jɛn ëë laarä ni mëë ta̱a̱ dhɔra ɛn ɣöö bi ji̱n la̱t niɛ nɛmɛ? Ɛ jɛn ɛ nëë barä ni rɔɔdä kä Tar-cic, kɛ ɣöö ŋa̱cä jɛ ɛn ɣöö ɛ ji̱n Kuoth nho̱kä kɛnɛ kɔ̱a̱c lɔaac, Kuoth mi tekɛ dhi̱eel gua̱thni diaal, kä gua̱thni diaal nhökdu thilɛ jɛ pe̱k, kä /ci gal kɛ mi luuci ca̱ru piny kä mi ci lar ɛn ɣöö bi naath moc kɛ riɛk.

³ Täämɛ, Kuoth Nhial, ku ɣä jakä li̱ewä. Ŋua̱n ni lia̱a̱dä kä tëkdä.”

⁴ Cu Kuoth Nhial ɛ jiök i̱, “Ti̱i̱ kɛ cuɔ̱ɔ̱ŋ mi derɛ waŋ ni lɔcdu?”

⁵ Cu Jona wä raar wec kui̱c cuëëc. Cuɛ rɔ lät kä bilɛ mi cuɛ nyuur ti̱pädɛ, liipɛ min bi tuɔɔk kɛ kui̱ Ni-nɛ-be.

⁶ Kä cu Kuoth ni Kuoth Nhial wäl mi cɔal i̱ wääny jakä ciɛk mi mooc Jona kɛ ti̱ep kɛ ɣöö bɛ lɔcdɛ jakä tɛth. Cu Jona lɔcdɛ tɛɛth ɛlɔ̱ŋ kɛ jɛn wääny.

⁷ Kä mëë ruɔ̱n bakä ɣɔaa cu Kuoth lɔ̱a̱t jakä bɛ wääny cam, kä cuɛ cu rɔl.

⁸ Kɛ thɔal ɣɔaa cu Kuoth jiɔam mi le̱th le̱th jakä bäk ni cuëëc ɣɔaa. Kä cu Jona duɔth ni muɔndɛ kɛ jɛn le̱th ca̱ŋ in ci wi̱cdɛ bo̱r. Kä cuɛ go̱r ni mi cɛ li̱w, kä cuɛ wee i̱, “Ŋua̱n ni lia̱a̱dä kä ta̱a̱dä te̱e̱kä.”

⁹ Kä cu Kuoth ɛ jiök i̱, “Ti̱i̱ kɛ cuɔ̱ɔ̱ŋ mi derɛ waŋ ni lɔcdu kɛ kui̱ wa̱nyä?” Cu Jona jɛ loc i̱, “Kɛ thuɔ̱k, ta̱a̱ kɛ cuɔ̱ɔ̱ŋ ɛpuc, amäni mi dëë li̱w.”

¹⁰ Cu Kuoth Nhial jɛ jiök i̱, “Jiɛth lɔcdu kɛ wääny mi ciɛk kɛ cäŋ kɛl kä cu thil kɛ bakdɛ. Thilɛ mi ci lät kä jɛ, kä /ke̱ni jɛ jakä pithɛ.

¹¹ Kä derɛ a jiath lɔaac mi ni̱n di ɛ nin dee jiath kɛ lɔcdä kɛ kui̱ ji̱ wec in di̱i̱t ni Ni-nɛ-be? Guic ɛ, te rɛydɛ kɛ gaat ti thilɛ mi ŋa̱ckɛ ɛ kɛn, ti lënykɛ bathdɔɔri ti kuɔ̱r kɛl wi̱cdɛ jiɛn da̱ŋ rɛw, kɛnɛ le̱y diaal tin te thi̱n bä.”