Jona 3 - RUAC KUƆTH IN RƐL RƆ

Nhök Jona kɛ ruac Kuɔth

¹ Kä cu Kuoth Nhial Jona nyɔk kɛ jio̱k i̱,

² “Jiɛyni, wër kä Ni-nɛ-be, wec in di̱i̱t, kä wër ŋi̱i̱cni naath kɛ ruac ja̱k ëë cä la̱r ji̱.”

³ Kä cu Jona rɔ jiɛc wëë kä Ni-nɛ-be ce̱tkɛ min ca la̱t jɛ ɛ Kuoth Nhial. Ni-nɛ-be ɛ wec mi di̱i̱t ɛlɔ̱ŋ, kɛ ɣöö ja̱lkɛ jɛ kɛ ni̱n da̱ŋ diɔ̱k.

⁴ Mëë ci Jona ni̱en kɛl thuk jäl, cuɛ köök, kä ruacɛ i̱, “Ni-nɛ-be bɛ da̱k kɛ kɔr ni̱ni ti jiɛn ŋuaan.”

⁵ Cu ji̱ Ni-nɛ-be riet Kuɔth ŋäth, kä cukɛ jɛ gok i̱ bi nɛy diaal mi̱th thɛk, kä bikɛ rɔ̱ moc kɛ bieyni cuali, nɛy tin di̱t a mäni nyintiɛtnikiɛn, mi nyooth ni ɣöö cikɛ rɔ̱ ri̱t kä jiäkiɛn.

⁶ Amäni kuäär in di̱i̱t kä Ni-nɛ-be, cuɛ kɔm kuäärädɛ ba̱ny piny, kä cuɛ bi̱i̱ kuäärädɛ woc, cuɛ bieyni cuali la̱th, kä cuɛ nyuur rɛy tupä, mi nyooth ni ɣöö ci lɔcdɛ jiath.

⁷ Cu kuäär kɛnɛ nɛɛkɛ guɔ̱k i̱ bikɛ riet jäkä ji̱ Ni-nɛ-be wäkɛ i̱, “Ca lar ɛ kuäär kɛ kui̱ ji̱ Ni-nɛ-be diaal ɛn ɣöö, thilɛ ram kɛl mi bi duɔ̱ɔ̱r cak cam, nɛy diaal kɛnɛ ɣɔk diaal kɛ dët diaal, /cukɛ jakä mi̱thkɛ kiɛ mäthkɛ.

⁸ Bi nɛy diaal kɛnɛ le̱y ciëŋ diaal bieyni cuali dhil la̱th. Bi nɛy diaal Kuoth dhil pal kɛ pe̱k lo̱cnikiɛn, kä bi raan rɔ dhil ri̱t kä jiäkɛ kɛnɛ nyuɔɔnkɛ.

⁹ Kä dɔ̱ŋ bi Kuoth wi̱cdɛ nyɔk kɛ ca̱r, kä bɛ ŋɛ̈ɛ̈nydɛ ka̱p cuɔ̱ŋ, ɛ /canɛ bi lɛ li̱w.”

¹⁰ Mëë ci Kuoth lätkiɛn nɛn ɛn ɣöö cikɛ rɔ̱ ri̱t jiäknikiɛn, cuɛ mëë jiääk ëë cɛ ca̱p kɛ päl.