Jona 1 - RUAC KUƆTH IN RƐL RƆ

Lo̱k Jona kɛ ruac Kuɔth

¹ Kɛ cäŋ kɛl cu Kuoth Nhial ruac kɛ Jona gat Ä-mi-tay, wëë i̱,

² “Jiɛc rɔ kä wër kä Ni-nɛ-be, wec in di̱i̱t, wër lue̱k ji̱kɛ, kɛ ɣöö cä nyuɔɔnkiɛn nɛn.”

³ Kä nɛ̈nɛ jɛ, cu Jona rɔ jiɛc a barɛ rɔ dhɔr mi cɔal i̱ Tar-cic, barɛ rɔ kɛ Kuɔth Nhial. Kä cuɛ wä dhɔr mi te thok yiëër mi cɔal i̱ Yapa, kä cuɛ babuur mi di̱i̱t mi wä kä Tar-cic je̱k thi̱n. Cuɛ yio̱o̱kɛ yuɔr piny kä cuɛ kɔt thi̱n kɛ ɣöö bɛ wä kä Tar-cic kɛ kɛ kɛɛl barɛ rɔɔdɛ nhiam Kuɔth Nhial.

⁴ Kä cu Kuoth Nhial thul jiɔam mi di̱i̱t kueer yie̱e̱r kä cu yi̱er tekɛ muaŋ mi di̱i̱t a cu babuur duɔth ni ɣöö bɛ tööl ni däär.

⁵ Cu gëër babuurä lo̱ckiɛn jiath ɛlɔ̱ŋ a cu ramɔ cɔl ni kuothdɛ. Kä cukɛ kuak diaal tin te rɛy babuurä yuɔr yie̱e̱r kɛ ɣöö deekɛ babuur jakä puɔl. Kä ni wen Jona cɛ wä ni piny babuurä rɛci, kä cɛ tɔ̱ɔ̱c a cɛ niɛɛn ɛyum.

⁶ Cu kuäär babuurä wä kä jɛ, kä cuɛ jɛ jiök, “Ɛŋu mi niini? Jiɛc rɔ kä läŋ kuothdu, dɔ̱ɔ̱ bi kuoth kɔn liɛc, /cɛ kɔn bi lɛ pa̱l lia̱a̱.”

⁷ Kä cu ji̱ babuurä ruac kamnikiɛn kä rɔ̱, “Bia, banɛ ben tueeth, banɛ ram in ci kɔn moc riɛk ɛ jiääk ɛmɛ je̱k.” Cukɛ tueeth kä cukɛ Jona je̱k.

⁸ Kä cukɛ jɛ thi̱ec i̱, “Ɛ ji̱n ŋa? Kä bi̱i̱ nikä? Kä labi raan ŋa? Kä no̱o̱ŋ ji̱ ŋu wanɛ mɛ? Ku jɛ nyuɔ̱th kɔ täämɛ, ɛŋa mi dëëkɔ bɛl kɛ kui̱ rikä ɛmɛ?”

⁹ Cu Jona kɛ loc i̱, “Ɛ ɣän raan kä ji̱ Ɣi-bɛ-ru, kä luɔ̱thä Kuoth Nhial ëë cak piny kɛnɛ yi̱er.”

¹⁰ Kä cuɛ ŋot kɛ mi lärɛ kɛ i̱ barɛ ni rɔɔdɛ nhial Kuɔth Nhial. Kä cu naath dual ɛlɔ̱ŋ, kä cukɛ jɛ jiök i̱, “Nɛmɛ ci lɛl ɛ, jiäkɛ ɛlɔ̱ŋ.”

¹¹ Kä mëë ci jiɔam wee kɛ mi re̱e̱pɛ rɔ, cukɛ jɛ thi̱ec i̱, “Ba̱kɔ ji̱ lɛl i̱di kɛ ɣöö dee muaŋ cuɔ̱ŋ?”

¹² Cuɛ kɛ loc i̱, “Ɛpuc nɛmɛ ɛ duerä. Naŋɛ ɣä kä bia ɣä wä yuɔr yie̱e̱r, bi muaŋ yiëër cuɔ̱ŋ, kɛ ɣöö nɛmɛ jekɛ yɛ kɛ kui̱dä.”

¹³ Kä nɛ̈nɛ jɛ, cu naath rɔ̱ dhuɔ̱l gër a bum kɛ ɣöö bikɛ babuur luɔc po̱mä, kä /ke̱nɛ rɔ nhök kɛ, kɛ ɣöö ci muaŋ yiëër wee kɛ mi reepɛ ni rɔ ɛlɔ̱ŋ.

¹⁴ Cukɛ wak kɛ jɔw mi di̱i̱t kä la̱ŋkɛ Kuoth Nhial wä kɛ i̱, “I̱di la, la̱ŋkɔ ji̱, ji̱n Kuoth Nhial. La̱ŋkɔ ji̱ /cu kɔ jakä ba̱kɔ li̱w kɛ kui̱ li̱eth wutdä ɛmɛ mi thil ɛ duer, kɛ ɣöö ci jɛ la̱t ce̱tkɛ lɔcdu.”

¹⁵ Cukɛ Jona naŋ kä cukɛ jɛ wä yuɔr yie̱e̱r, cu yi̱er muaŋdɛ cuɔ̱ŋ ni kä kɛɛl.

¹⁶ Cu naath dual kä cukɛ Kuoth Nhial luɔ̱th, kä cukɛ jɛ moc kɛ muc, kä cukɛ la̱mni lam.

¹⁷ Kä cu Kuoth Nhial ɛ rial ikä ɛn ɣöö bi re̱c mi di̱i̱t Jona roc, kä cu Jona cieŋ jic rɛ̱̈c kɛ ni̱n diɔ̱k.