Ji̱ Röm 8 - RUAC KUƆTH IN RƐL RƆ

Tëk rɛy Yieekä

¹ Kɛ kui̱ ɛmɔ, thilɛ kuëth täämɛ kä nɛy tin te rɛy Kritho Yecu.

² Kɛ ɣöö ci ŋut Yieekä teekä rɛy Kritho Yecu ɣä lony kä ŋut dui̱rä kɛnɛ lia̱a̱.

³ Min /ci ŋut ɛ luäŋ kɛ lätni, kɛ ɣöö puɔ̱ny kɔ̱cɛ, ci Kuoth ɛ la̱t. Cɛ duer kuɛ̈th rɛy ri̱eŋ kɛ jäknidɛ kɛ Gatdɛ in kɛl kärɔa, mëë cu ben kɛ puɔ̱ny mi ce̱tkɛ puɔ̱ny ran in tekɛ duer, kɛ ɣöö bɛ duer woc.

⁴ Kä lät Kuoth mɛmɛ kɛ ɣöö ba gɔɔy ŋutdä cuŋä jakä ro̱ŋ rɛydan, kɔn nɛy tin /ci jäl cieŋ rɛy ri̱eŋ, tin cieŋ rɛy Yieekä.

⁵ Kɛ ɣöö nɛy tin cieŋ kɛ ciaŋ ri̱eŋ, carkɛ wuɔ̱thkiɛn kɛ nyin ri̱eŋ. Kä nɛy tin cieŋ kɛ ciaŋ Yieekä, carkɛ wuɔ̱thkiɛn kɛ nyin Yieekä.

⁶ Läth cärä wec kä nyin ri̱eŋ ɛ lia̱a̱, kä läth cärä wec kä nyin Yieekä ɛ tëk kɛnɛ mal.

⁷ Kɛ kui̱c ɛmɔ ca̱r wec ran kɛ nyin ri̱eŋ tëëkɛ gɛ̈m kɛ Kuoth, kä /cɛ rɔ käm ŋut Kuɔth, ɛpuc /cɛ jɛ luth.

⁸ Kä nɛy tin luɔ̱thkɛ ni ri̱ŋ /ci kɛn Kuoth moc kɛ tɛ̈th lɔaac.

⁹ Kä /cia te rɛy ri̱eŋ, ta̱yɛ rɛy Yieekä, kɛ ɣöö cieŋ Yiëë Kuɔth rɛydun. Ram mi /ci tekɛ Yiëë Kritho, /ciɛ raandɛ.

¹⁰ Kä mi te Kritho rɛydun, cäŋ li̱w pua̱nykun kɛ kui̱ dui̱rä, Yiëë tëkɛ kɛ kui̱ ciɛɛŋä cuŋni.

¹¹ Mi cieŋ Yiëë Kuɔth, mëë ci Yecu jiɛc li̱th rɛydun, Kuoth ëë ci Kritho Yecu jiɛc li̱th bɛ pua̱nykun tin la li̱w ka̱m tëk bä kɛ Yiëëdɛ min te rɛydun.

¹² Kä ɛnɔ, dämaari, lapnɛ ji̱ ŋuäli, /ciɛ kɛ ri̱ŋ kɛ ɣöö banɛ cieŋ kɛ ciaŋ ri̱eŋ,

¹³ kɛ ɣöö mi cieŋ yɛn kɛ ciaŋ ri̱eŋ bia li̱w. Kä mi näk yɛn lät pua̱nyni kɛ Yiëë bia tëk.

¹⁴ Kɛ ɣöö nɛy diaal tin bo̱o̱th Yiëë Kuɔth kɛ, kɛ gaat Kuɔth.

¹⁵ Kɛ ɣöö /ken yɛn yiëë kuaanyä mi dee yɛ jak kä dual jek duundɛ ɣöö /cia jek ni yiëë mi jak yɛ kä gaat Kuɔth. Mi wä kɔn wiee i̱, “Abba, Gua̱a̱ra!”

¹⁶ Ɛ jɛn Yiëë ɛmɔ la neen kɛ yiëëdan ɔ i̱ kɛ kɔn gaat Kuɔth.

¹⁷ Kä mi lapnɛ gaat, kɛ kɔn dieel dhɔaar Kuɔth pa̱ny, amäni ɣöö lapnɛ dieel dhɔaar kɛɛl kɛ Kritho, mi ruɔ̱tnɛ bɛ̈c bɛ̈ɛ̈c kɛ jɛ kɛɛl kä ba kɔn puany kɛ jɛ kɛɛl bä.

Ban te kɛ liak

¹⁸ Ɣän carä jɛ ɛn ɣöö bɛ̈c bɛ̈ɛ̈c ti täämɛ ti /cikɛ bi pa̱a̱r kɛ puɔny gɔɔyä min ba nyuɔ̱th kɔn.

¹⁹ Kɛ ɣöö ɣɔw in ca cak lipɛ nyuth gan Kuɔth kɛ di̱t lɔaacdɛ kɛɛliw,

²⁰ kɛ ɣöö ca ɣɔw in ca cak kuëŋ nɛy rikni a /ci mɔ a ruacdɛ, ɛ ruac raam ëë ci jɛ kuëŋ thi̱n kɛ ŋa̱th.

²¹ Kɛ ɣöö ba ɣɔw puɔ̱nydɛ lony a lɔr rɛy yieenä jiääkä, kä bɛ lɔar gɔɔyä puɔnyä gan Kuɔth jek.

²² Ŋäc kɔn ɛ ɛn ɣöö ɣɔw ro̱o̱tdɛ röt kɛ bɛ̈c mi ce̱tkɛ bɛ̈c däpä gatdä.

²³ Kä /ciɛ ɣɔw kärɔa amäni pua̱nykɔn tin tekɛ dɛy Yieekä tin nhiam, rötnɛ röt kɛ rɛydan guäth in liɛpnɛ ɣöö bɛ kɔn jak kä gaatkɛ, min la luel pua̱nynikɔn.

²⁴ Kɛ ŋa̱th ca kɔn kän. Täämɛ ŋa̱th duɔ̱ɔ̱rä mi nɛn raan ɛ /ciɛ ŋa̱th. Kɛ ɣöö ɛŋa ŋa̱thɔ kɛ mi cɛ nɛnɛ ɔ?

²⁵ Kä mi ŋa̱thnɛ mi /canɛ nɛn liɛpnɛ jɛ bitdä.

²⁶ Inɔ bä, luäk Yiëë kɔn kɛ kɔ̱a̱cdan, kɛ ɣöö kui̱c kɔn pal in dee pal kɛ kɔn, kä Yiëë puɔ̱nydɛ palɛ kɛ kui̱dan kɛ jɔw jiɛthä lɔaac mi leny rieet.

²⁷ Kä Kuoth in go̱r lo̱c nath, ŋäcɛ min caar Yiëë ɛ, kɛ ɣöö Yiëë la la̱ŋɛ kɛ kui̱ gan Kuɔth tin cɛ lɛy ce̱tkɛ min go̱o̱r Kuoth ɛ.

²⁸ Ŋäc kɔn ɛ rɛy kä ti diaal, i̱ lät Kuoth kɛ kui̱ gɔɔyä nɛɛni tin nhɔakɛ jɛ, tin ca cɔl ce̱tkɛ luɔtdɛ.

²⁹ Kɛ ɣöö nɛy tin cɛ ŋa̱c kɛ nhiam cɛ kɛ rialikä i̱ bikɛ ce̱tkɛ Gatdɛ, kɛ ɣöö derɛ a kɛ̱̈ɛ̱̈ rɛy gan ti ŋuan.

³⁰ Kä nɛy tin cɛ lɛ̈y gekä cɛ kɛ cɔl bä, kä nɛy tin cɛ cɔl cɛ kɛ moc cuɔ̱ɔ̱ŋ bä, kä nɛy tin cɛ moc cuɔ̱ɔ̱ŋ cɛ kɛ puany bä.

Nhök Kuɔth rɛy Yecu Kritho

³¹ Banɛ ŋu kulɛ lar kɛ kui̱ ŋɔaani ti̱ti̱? Mi te Kuoth kɛɛl kɛ kɔn, ɛŋa te gɛ̈m kɛ kɔn ɔ?

³² Jɛn Ram mi /ken Gatdɛ pa̱ny pën, kä cuɛ jɛ thöp kɛ kui̱dan, /cɛ kɔn bi ka̱m ŋɔak diaal bä kɛ jɛ kɛɛl?

³³ Ɛŋa mi bi nɛy ti ci Kuoth kɛ kuany nöŋ go̱o̱ny ɔ? Ɛ jɛn Kuoth ɛnɔ tho̱p cuɔ̱ɔ̱ŋ ɔ.

³⁴ Ɛŋa mi bikɛ kuɛth ɔ? Ɛ jɛn Kritho Yecu min ci li̱w, ɣɔ̱ɔ̱n, kä ca jiɛc li̱th, min te tetdä cuëëc Kuɔth, in läŋ pa̱ny kɛ kui̱dan?

³⁵ Ɛŋu bi kɔn da̱a̱k ɔ kɛ nhök Kritho? Bɛ a cuɔ̱c, kiɛ bɛ̈c, ciaaŋ jiääk, buɔth, ciaŋ juutdä, riɛk bɛcä teekä, kiɛ ko̱r köör?

³⁶ Ce̱tkɛ min ca gɔ̱r i̱, “Kɛ kui̱du la na̱kɛ kɔ ni ciaŋ. Kä ce̱t nɛy kɛ rɔɔm ti ba wä ŋuɔ̱t.”

³⁷ Ëëy, rɛy ŋɔaani diaal ti̱ti̱ leny kɔn nɛy tin pua̱tkɛ naath rɛy Yecu min nhɔk kɔn.

³⁸ Kɛ ɣöö ŋa̱cä jɛ ɛpuc pa̱ny ɛn ɣöö cäŋɛ lia̱a̱, kiɛ tëk, ja̱a̱k nhial, ruac kua̱ri, ŋɔaani ti te thi̱n, kɛnɛ ŋɔaani tin bi ben, kiɛ tin te lua̱ŋ,

³⁹ kiɛ mi te ni nhial, kiɛ mi te ni piny i̱, kiɛ mi dɔ̱ŋ rɛy cäkä kɛɛliw, thilɛ duɔ̱ɔ̱r mi bi kɔn da̱a̱k kä nhök Kuɔth rɛy Kritho Yecu Kuääran!