Ji̱ Röm 6 - RUAC KUƆTH IN RƐL RƆ

Tëk kɔn kɛ matdan kɛ Yecu

¹ Banɛ ŋu kulɛ lar? Banɛ lɛ ŋot kɛ wä nhiam rɛy dui̱rä, kɛ ɣöö bi puɔ̱th baaŋ Kuɔth rɔ rep?

² /Cɛ dee a jɛn! Ci ciaaŋ dui̱rädan ëë wal li̱w, ɛŋu banɛ lɛ ŋot kɛ ciaaŋ rɛy dui̱rä mɔ?

³ Kä /ci yɛn ɛ ŋäc ɛn ɣöö kɔn nɛy diaal tin ca lak kɛ matdan kɛ Kritho Yecu ca kɔn lak kɛ matdan rɛy li̱ethdɛ?

⁴ Kɛ kui̱ ɛmɔ ca kɔn kony kɛ jɛ kɛɛl kɛ lakdan li̱th, kɛ ɣöö ce̱tkɛ mëë ca Kritho jiɛc li̱th ɛ buɔ̱m Gua̱n, amäni kɔn bä dënɛ cieŋ rɛy teekä mi pay tuɔɔk.

⁵ Kɛ ɣöö mi ca kɔn mat kɛ jɛ kɛɛl rɛy li̱eth mi ce̱tkɛ lia̱a̱dɛ, ba kɔn diaal mat kɛ jɛ kɛɛl rɛy jiecä li̱eth mi ce̱tkɛ jiëcdɛ.

⁶ Ŋäc kɔn ɛ ɛn ɣöö ca puɔ̱nydan ëë wal pua̱t jɔk jiaath in ri̱ew kɛ jɛ kɛɛl, kɛ ɣöö ba puɔ̱ny mi ci thia̱a̱ŋ kɛ dueer däk, kä /canɛ bilɛ ŋot ala kuany dui̱rä.

⁷ Kɛ ɣöö ram mi ci li̱w cɛ lɔar kä dueer.

⁸ Kä mi canɛ li̱w kɛ Kritho kɛɛl, banɛ ŋa̱th ɛn ɣöö banɛ tëk kɛ jɛ kɛɛl bä.

⁹ Kɛ ɣöö ŋäc kɔn ɛ i̱ mi ca Kritho jiɛc li̱th, /cɛ rɔ bi nyɔk lia̱a̱, kä /ci lia̱a̱ bi lɛ tekɛ lua̱ŋ kɛ jɛ.

¹⁰ Lia̱a̱ ëë li̱w kɛ jɛ, ci duer thil lua̱ŋ kɛ jɛ, kä ɛ jɛn lia̱a̱ ɛ kɛlɔ. Kä tëk in tëk kɛ jɛ tëkɛ kɛ Kuoth.

¹¹ Kä amäni yɛn bä carɛ rɔ i̱ ci ciaaŋ dui̱rädun ëë wal li̱w, kä tëk yɛn kɛ Kuoth rɛy Yecu Kritho.

¹² Kɛ kui̱c ɛmɔ a duer /ci pua̱nykun tiam, kɛ ɣöö bikɛ yɛ jakä tekɛ luth kɛ tin go̱o̱r pua̱nykun kɛ.

¹³ /Cuarɛ cuɔ̱ɔ̱ŋ pua̱nynikun käm duer kɛ kui̱ kä mi jiääk, kä ka̱mɛ rɔ̱ Kuoth ce̱tkɛ nɛy ti ca luɔ̱c jɔk li̱th, no̱o̱ŋdiɛn teekä, kä ka̱mɛ cuŋ pua̱nynikun Kuoth kɛ kui̱ cuŋni.

¹⁴ Kɛ ɣöö bi duer thil lua̱ŋ kɛ yɛ, kɛ ɣöö /cia te rɛy ŋutdä, ta̱yɛ rɛy puthä baaŋ Kuɔth.

Kuaany ti la̱tkɛ cuŋ

¹⁵ Ɛŋu dɔ̱ŋ? Banɛ duer, kɛ ɣöö /ci kɔn te rɛy ŋutdä kä ta̱nɛ rɛy puthä baaŋ Kuɔth? /Cɛ der a jɛn!

¹⁶ /Ci yɛn ɛ ŋäc ɛn ɣöö mi ci rɔ̱ ka̱m raan, ce̱tkɛ kuany mi tekɛ luth, ɛ ji̱n kuany raam min luthi, mi ɛ ji̱n kuany dui̱rä in bo̱th naath li̱th, kiɛ ɛ ji̱n kuany luthä in bo̱th naath cuŋni?

¹⁷ Kä a tɛ̈th lɔaac tekɛ Kuoth, kɛ ɣöö ci yɛn kɔŋ a kuaany dui̱rä, cia thuɔ̱k luɔ̱th kɛ lɔcdun kɛ ŋi̱i̱c in cia jek.

¹⁸ Kä mëë ca yɛ jakä lɔr kä duer, ci yɛn a kuaany cuŋni.

¹⁹ Ɣän ruacä ce̱tkɛ raan kɛ kui̱ kuaayä cärädun. Kɛ ɣöö nɔ ce̱tkɛ mëë cia cuŋ pua̱nynikun ka̱m ciaŋ jiäkni, kɛnɛ ciaaŋ dui̱rä mi di̱i̱t, inɔ bä täämɛ ka̱mɛ cuŋ pua̱nynikun ciaŋ cuŋni kɛ kui̱ lätni kä ti gɔw.

²⁰ Mëë lapɛ kuaany dui̱rä, cu yɛn lɔar kä ciaŋ cuŋni.

²¹ Kä cia ŋu kulɛ jek, kä ŋɔak tin muɔckɛ yɛ pöc täämɛ? Pek ŋɔaani tɔ̱tɔ̱ ɛ lia̱a̱.

²² Kä täämɛ mëë ca yɛ jakä lɔr dui̱rä, kä ci yɛn a kuaany Kuɔth, kä min cia jek ɛ tëk kä Kuoth. Kä guutdɛ, ɛ tëk mi do̱raar.

²³ Kɛ ɣöö pek la̱t duerä ɛ lia̱a̱, kä muc Kuɔth baaŋ ɛ tëk mi do̱raar rɛy Kritho Yecu Kuääran.