Ji̱ Röm 5 - RUAC KUƆTH IN RƐL RƆ

Ta̱nɛ kɛ cuɔ̱ɔ̱ŋ kɛɛl kɛ Kuoth

¹ Kɛ kui̱c ɛmɔ, ca kɔn moc cuɔ̱ɔ̱ŋ kɛ ŋa̱th, ta̱nɛ kɛ mal kɛ Kuoth rɛy Kua̱ran ni Yecu Kritho.

² Ci Yecu kɔn nööŋ rɛy ŋäcä nho̱kä Kuɔth min te kɔn thi̱n. Kä liaknɛ rɔ̱ rɛy ŋäthädan kɛ nyuak gɔɔyä Kuɔth.

³ Min di̱t ni jɛn, ɛ tɛ̈th lɔaacdan rɛy cucädan kɛ ɣöö ŋa̱cnɛ jɛ cuɔ̱c no̱o̱ŋɛ ruɔ̱t,

⁴ kä ruɔ̱t no̱o̱ŋɛ ciaŋ wutdä, kä ciaŋ wutdä no̱o̱ŋɛ ŋa̱th kɛ mi bi ben.

⁵ Kä ŋa̱th kɛ mi bi ben /cɛ kɔn moc bath lɔaac, kɛ ɣöö nhök Kuɔth ca tiɛth rɛy lo̱cnikɔn Yiëë in Gɔaa in Rɛl Rɔ min ca ka̱m kɔn.

Li̱w Kritho kɛ ji̱ dueeri

⁶ Ni mëë ŋot kɔn a thil lua̱ŋ, ɛn gua̱a̱th ɛmɔ pa̱ny ci Kritho li̱w kɛ kui̱ ji̱ dueeri.

⁷ Bumɛ ɛlɔ̱ŋ ɛn ɣöö bi raan li̱w kɛ kui̱ raam mi gua̱n cuŋni. Cäŋ inɔ bä dɔ̱ŋ dee raan ɛ go̱r i̱ bɛ li̱w kɛ kui̱ raam mi gɔaa.

⁸ Kä ci Kuoth kɔn nyuɔ̱thɛ nhökdɛ kɛ ɣöö mëë ŋuɔtnɛ ala ji̱ dueer cu Yecu li̱w kɛ kui̱dan.

⁹ Kä täämɛ ca kɔn moc cuɔ̱ɔ̱ŋ kɛ lia̱a̱dɛ, kä min di̱t ni jɛn, ba kɔn kän kä waŋ lɔaac Kuɔth kɛ Yecu.

¹⁰ Kɛ ɣöö mëë ŋot kɔn ala ji̱ tɛ̈r Kuɔth, ca kɔn luɔc maarä kɛ lia̱a̱ Gatdɛ. Kä min di̱t ni jɛn ɛn täämɛ, ɛ ɣöö kɔn luɔc maar, kä ba kɔn kän kɛ tëkdɛ.

¹¹ /Ciɛ jɛn kärɔa inɔ, liaknɛ rɔ̱ kɛ min ci Kuoth ɛ la̱t rɛy Kua̱ran ni Yecu Kritho, min ci kɔn luɔc maarä kɛ Kuoth.

A-dam kɛnɛ Kritho

¹² Kɛ kui̱ ɛmɔ ce̱tkɛ min ci duer ben rɛy ɣɔaa kɛ ram kɛl, kä lia̱a̱ bëë kɛ duer, kä inɔ ci lia̱a̱ däk kä nɛy diaal, kɛ ɣöö ci nɛy diaal duer.

¹³ Ɛpuc te duer rɛy ɣɔaa ni mëë /ka̱n ŋut ni ŋun, kä /ca duer kuɛn mi thilɛ ŋut.

¹⁴ Kä cu lia̱a̱ ji̱ ɣɔaa yiɛn ni kä A-dam a bä kä Muthɛ, kä cu mäni nɛy ti /ken duer kɛ duɔ̱ɔ̱p dui̱rä A-dam, mëë /kenɛ ruac Kuɔth luɔ̱th. Kä ɛn A-dam ɛ cät raam in bi ben.

¹⁵ Kä muc Kuɔth baaŋ /cɛ cäät kɛ A-dam in ci duer. Kä kɛ ɣöö ci nɛy ti ŋuan li̱w kɛ duer raam kɛl, kulɛ di̱t ni nhök Kuɔth kɛnɛ muc baaŋ rɛy nho̱kä raam kɛl ni Yecu Kritho min cɛ thöp kɛ kui̱ nɛɛni diaal.

¹⁶ Kä muc Kuɔth baaŋ /cɛ ce̱tkɛ duer raam kɛl. Kɛ ɣöö luk mi bä kɔɔr dui̱rä kɛl nööŋɛ kuëth, kä muc baaŋ mi guur dueer ti ŋuan mocɛ naath cuɔ̱ɔ̱ŋ.

¹⁷ Kɛ duer raam kɛl, cu lia̱a̱ nɛy diaal yiɛn kɛ kui̱ raam kɛl. Kä ku min ca la̱t ɛ ram kɛl ni Yecu Kritho di̱tdɛ lɛ ni̱n i̱di! Kä nɛy diaal tin ca puɔ̱th baaŋ Kuɔth jek kä tekɛ rɛy cuŋni kɛ jɛ kɛɛl, bikɛ ruëc kɛ Yecu kɛɛl rɛy teekä.

¹⁸ Kɛ kui̱c ɛmɔ ce̱tkɛ min ci duer raam kɛl nɛy diaal böth kuethä, inɔ bä, bi la̱t ciɛɛŋä cuŋni raam kɛl nɛy diaal lony kä bɛ kɛ moc tëk.

¹⁹ Kɛ thil luthä raam kɛl, ca nɛy ti ŋuan jakä ji̱ dueeri, inɔ bä ba nɛy ti ŋuan jakä ji̱ cuŋni kɛ luth raam kɛl.

²⁰ Duundɛ ɣöö bä ŋut kɛ ɣöö bi dueer rɔ̱ rep, kä kɛ gua̱a̱th in ci duer rɔ ku rep, bi puɔ̱th baaŋ rɔ rep ɛlɔ̱ŋ.

²¹ Kä inɔ bä, ce̱tkɛ min ci duer yien rɛy li̱eth, inɔ bä bi puɔ̱th baaŋ ruëc rɛy cuŋni kɛ tëk in do̱raar rɛy Yecu Kritho Kuääran.