Ji̱ Röm 4 - RUAC KUƆTH IN RƐL RƆ

Nyuɔ̱th A-bɛ-ram kɛ ŋa̱th

¹ Ɛŋu mi banɛ lar i̱ ci A-bɛ-ram, gua̱n gua̱ndɔɔŋnikɔn ɛ ŋa̱c?

² Kä mi ca A-bɛ-ram moc cuɔ̱ɔ̱ŋ kɛ lät, jɛn tëëkɛ luɔt mi derɛ liak ni rɔ, a /ci mɔ a nhiam Kuɔth.

³ Kä ɛŋu ci ruac Kuɔth in rɛl rɔ ɛ lar ɔ? “Ci A-bɛ-ram Kuoth ŋäth, kä ca jɛ nhɔk ala ciaŋ cuŋni kä jɛ.”

⁴ Täämɛ pek ko̱kä raam mi ci lät /ca jɛ dee car i̱ ɛ muc, ɛ jɛn min ba yi̱k ka̱m jɛ a la duŋdɛ.

⁵ Kä mi ɛ ram mi /ci lät, kä ŋääthɛ Kuoth in moc nɛy tin tekɛ dueer kɛ cuɔ̱ɔ̱ŋ, ɛn ŋa̱th ɛmɔ ca jɛ car i̱ ɛ ciaŋ cuŋni.

⁶ Kä inɔ bä, cu Dee-bid ruac kɛ kui̱ raam mi ci Kuoth ɛ poth kä cɛ car i̱ tekɛ ciaŋ cuŋni a thil lätkɛ mëë wëë i̱,

⁷ “Puɔ̱th akɛ nɛy tin ca dueerkiɛn päl, nɛy tin ca dueerkiɛn woc.

⁸ Puɔ̱th akɛ ram min /ci Kuäär ni Kuoth ɛ lar i̱ thilɛ jɛ duer.”

⁹ Latkɛ puɔ̱th ɛmɛ kɛ kui̱ nɛɛni tin ca cuɛl kärɔ̱, kiɛ amäni nɛy tin /ka̱n cuɛl bä? Kä la kɔn a wee i̱, “Ca ŋa̱th lar i̱ ɛ ciaŋ cuŋni kä A-bɛ-ram.”

¹⁰ Kä cuɛ tuɔɔk i̱di? Ɛ kɔr kä mëë ca cuɛl kiɛ mëë /ka̱nɛ ni cuɛl? /Ciɛ kɔrɛ, ɛ mëë ŋotdɛ /ka̱nɛ ni cuɛl.

¹¹ Jɛn cuɛ cuël jek ala nyuuth ciɛɛŋä cuŋni mëë cɛ jek kɛ ŋa̱th, a ŋotdɛ /ka̱nɛ ni cuɛl. Luɔtdɛ ɛ ɣöö bɛ jɛ jakä gua̱n nɛɛni diaal tin ŋa̱th a /ka̱n cuɛl, kä ca lar i̱ tekɛ kɛ ciaŋ cuŋni.

¹² Kä jɛn bä ɛ gua̱n nɛɛni tin ca cuɛl, kä /ciɛ nɛy tin ca cuɛl kärɔ̱, kɛ nɛy tin guɔ̱ɔ̱rkɛ ni ŋa̱th gua̱ndan ni A-bɛ-ram ëë nhiam ɛ /ka̱nɛ ni cuɛl.

Ruac Kuɔth jëkɛ jɛ kɛ ŋa̱th

¹³ Min ca lar i̱ ba ka̱m A-bɛ-ram amäni karkɛ ɛn ɣöö dee ɣɔw a duŋdɛ, /cɛ bä kä ŋut, bëë kä ciaŋ cuŋni ŋäthä.

¹⁴ Mi dee naath min ca lar ɛ Kuoth jek kɛ guuri ŋutdä, ŋa̱th cɛ la baŋ, kä min ci Kuoth ɛ lar cɛ thil luɔt.

¹⁵ Kɛ ɣöö ŋut no̱o̱ŋɛ waŋ lɔaac, kä gua̱a̱th mi thil ŋut thilɛ jɛ kac dui̱rä.

¹⁶ Kɛ kui̱ ɛmɔ ruac in ci Kuoth ɛ lar thi̱ŋɛ rɔ ŋäthä kɛ ɣöö min ca lar ba jɛ ŋun kɛ puɔ̱th baaŋ Kuɔth ka̱mkɛ jɛ kar A-bɛ-ram diaal ala muc baaŋ. Kä /ciɛ duŋ nɛɛni tin ka̱pkɛ ŋut kärɔ̱, amäni nɛy tin nyuakɛ ŋa̱th A-bɛ-ram, (kɛ ɣöö ɛ gua̱ndan kɔn diaal),

¹⁷ ce̱tkɛ min ca gɔ̱r i̱, “Cä ji̱ jakä gua̱n dööri ti ŋuan.” Ruac ɛmɔ ɛ thuɔ̱k nhiam Kuɔth A-bɛ-ram, min ŋääthɛ, min jak nɛy tin ci li̱w kä tëk, min jak mi /ken kɔn te wanɔ kä te wanɔ.

¹⁸ Cu A-bɛ-ram ŋa̱th a cäŋ ni mëë thilɛ mi dee ŋa̱th kɛ jɛ, kä cuɛ ben a gua̱n dööri ti ŋuan, ce̱tkɛ mëë ca lar i̱, “Bi karku ŋuan, ce̱tkɛ kuɛl.”

¹⁹ /Kenɛ kɔ̱a̱c rɛy ŋäthä mëë cɛ guicɛ rɔɔdɛ i̱, ce̱tdɛ kɛ ram mi ci li̱w, (kɛ ɣöö ci runkɛ a kuɔ̱r kɛl diëëthdɛ, kɛnɛ mëë cɛ Thara car i̱ ɛ rol.)

²⁰ Thilɛ diw ŋäthä mi jak jɛ kä te leek leek kɛ kui̱ kä mëë ci Kuoth ɛ lar, kä cuɛ piith bumɛ rɛy ŋäthädɛ a liakɛ Kuoth,

²¹ kä ro̱ŋɛ lɔɔcdɛ ɛn ɣöö te Kuoth kɛ lua̱ŋ kɛ la̱t kɛ mi cɛ lar.

²² Kɛ kui̱ ɛmɔ cua ŋa̱thdɛ cu lar, i̱ ɛ ciaŋ cuŋni.

²³ Kä rieet ti̱ti̱ ni ɣöö, “Ca jɛ lar i̱ ɛ gua̱n cuŋni,” /ka̱n kɛ gɔ̱r kɛ kui̱dɛ kärɔa.

²⁴ Cakɛ gɔ̱r kɛ kui̱dan bä, kɔn nɛy tin ba jɛ lar i̱ ji̱ cuŋni kɔn nɛy tin ŋa̱thkɛ Kuoth ëë jiɛc Yecu Kritho li̱th.

²⁵ Kä ca Yecu jakä li̱w kɛ kui̱ dueerikɔn, kä ca jɛ jiɛc kɛ ɣöö ba kɔn moc kɛ cuɔ̱ɔ̱ŋ.