Ji̱ Röm 3 - RUAC KUƆTH IN RƐL RƆ

¹ Ɛ gɔɔy in mi̱th tekɛ ji̱ Juudh ɔ? Kiɛ ɛ gɔɔy ŋukä tekɛ cuël ɔ?

² Ɛ mi di̱i̱t gua̱thni diaal! Kɛ nhiam ci Kuoth ruacdɛ ka̱m ji̱ Juudh.

³ Kä ɛŋu mi dee tuɔɔk mi /ken tha̱a̱ŋ ji̱ Juudh ŋa̱th? Derɛ lot ni ɣöö bi Kuoth thil ŋa̱th?

⁴ /Cɛ der a jɛn! Kuoth bɛ dhil ŋot ala thuɔ̱k, a cäŋ ni mɔ ci nɛy diaal a ji̱ ka̱a̱cni ɔ, ce̱tkɛ min ci Ruac Kuɔth ɛ lar i̱, “Ba ji̱ moc cuɔ̱ɔ̱ŋ kɛ ruacdu, kä bi tekɛ cuɔ̱ɔ̱ŋ mi wa ji̱ luk.”

⁵ Kä mi ciaaŋ jiääkdan nyoothɛ ɣöö lät Kuoth ni cuŋ, banɛ ŋu kulɛ lar? Dënɛ wëë thilɛ Kuoth cuɔ̱ɔ̱ŋ kɛ duäcdɛ kɛ kɔn? (Ɣän ruacä ce̱tkɛ raan.)

⁶ /Cɛ der a jɛn! Kä mi /ci Kuoth lät ni cuɔ̱ɔ̱ŋ, derɛ ɣɔw kulɛ luk i̱di?

⁷ Kä mi kacdä nyoothɛ thuɔ̱k Kuɔth kɛnɛ puɔnyädɛ, kuɛ la ŋu kua ɣä lɛ luk ɔ, ce̱tkɛ gua̱n duerä?

⁸ Kä ɛŋu /canɛ jɛ larɔ i̱, “La̱tnɛ jiäk kɛ ɣöö dee gɔɔy kulɛ ben? Kɛ thuɔ̱k ci tha̱a̱ŋ nath ɣä kuëth, kä ca ɣä gɔny i̱ cä mi ce̱tkɛ nɔmɔ lar. Kɛn bakɛ duäc kɛ duäc in ro̱ŋ kɛ kɛ.”

Thilɛ ram mi tekɛ cuɔ̱ɔ̱ŋ

⁹ Ɛŋu dɔ̱ŋ? Gɔw ni kɔn ji̱ Juudh kä nɛy tin kɔ̱ŋ? Ëëy, /ciɛ jɛn, kɛ ɣöö cä kɛ ku thuŋ lat ɛn ɣöö te nɛy diaal rɛy bumä dui̱rä, mat ji̱ Juudh kɛnɛ Jur.

¹⁰ Ce̱tkɛ ti ca gɔ̱r i̱, “Thilɛ gua̱n cuŋni, Ëëy, thilɛ raan.

¹¹ Thilɛ ram mi ŋäc ŋɔak. Thilɛ ram mi go̱o̱r Kuoth.

¹² Ci kɛn diaal rɔ̱ riet gekä, cikɛ wä dui̱rä kɛɛl. Thilɛ ram mi lät gɔy. Thilɛ a cäŋɛ kɛl.”

¹³ “Ce̱t rölkiɛn kɛ kɔ̱a̱k ti ɣöŋ. Latkɛ ni kaŋ nath kɛ lëëpkiɛn.” “Te lueŋ dɛŋciɛkni thokdiɛn.”

¹⁴ “Thiäŋ thukiɛn kɛ kuethni amäni rieet ti jiäk.”

¹⁵ “Puɔl ciökiɛn kɛ wuth riɛm piny,

¹⁶ te ni da̱k kɛnɛ jiath lɔaac dupnikiɛn,

¹⁷ kä kui̱c kɛn ciaŋ malä.”

¹⁸ “Thil waŋdiɛn dual kɛ Kuoth.”

¹⁹ Täämɛ ŋäc kɔnɛ ɛn ɣöö nɔmɔ mi wä ŋut ɛ lar, la̱tkɛ jɛ kä nɛy tɔ̱ te rɛy ŋuɔ̱t tɔ̱, kɛ ɣöö thilɛ ram mi dee wee kui̱cɛ, kä derɛ te wi̱i̱ ɣɔaa kɛɛliw kɛ kuën lätnikiɛn nhiam Kuɔth.

²⁰ Kä thilɛ ram mi ba moc cuɔ̱ɔ̱ŋ kɛ lät ŋutdä, kɛ ɣöö rɛy ŋutdä bä ŋäc dui̱rä thi̱n.

Bä ciaŋ cuŋni kɛ ŋa̱th

²¹ Kä täämɛ ci duɔ̱ɔ̱p Kuɔth in mocɛ raan cuɔ̱ɔ̱ŋ kɛɛl kɛ jɛ jɔɔc, a /ci mɔ a ŋut. A cäŋ ni mëë ci ŋut kɛnɛ göök nëndiɛn lat kɛ kui̱dɛ.

²² Ɛ jɛn ciaŋ cuŋni Kuɔth min bä kɛ ŋa̱th kɛ Yecu Kritho kɛ kui̱ nɛɛni diaal tin ŋa̱th. Kɛ ɣöö thilɛ dääk,

²³ ci kɛn diaal duer, kä pɛnkɛ a ciɛk kä gɔɔy puɔnyä Kuɔth.

²⁴ Cɛ kɛ moc cuɔ̱ɔ̱ŋ kɛ puɔ̱th baaŋdɛ ala muc baaŋ kɛ luëliɛn dueeri kɛ Kritho Yecu.

²⁵ Ci Kuoth ɛ thöp ala duɔ̱ɔ̱p mi ba päl dueer nath kɛ lia̱a̱dɛ kɛ ŋa̱th nath kɛ jɛ. Nɛmɛ nyoothɛ ni ɣöö Kuoth gua̱thni diaal la lätdɛ ni cuŋ, ce̱tkɛ puɔ̱th baaŋdɛ mëë pälɛ ɣöö bɛ naath duäc kɛ kui̱ dueerikiɛn.

²⁶ Kä tho̱pɛ jɛ kɛ ɣöö ba nyoth ɛn täämɛ i̱ te ni jɛn kɛ cuɔ̱ɔ̱ŋ, kä mocɛ ram in tekɛ ŋa̱th kɛ Yecu kɛ cuɔ̱ɔ̱ŋ.

²⁷ Kä banɛ rɔ liak kɛ ŋu? Thilɛ ŋu! Kä bɛ ku la kui̱ ŋukä? Bɛ ku la ɣöö luth kɔn ŋut? Ëëy, ɛ ɣöö ŋa̱thnɛ.

²⁸ Kä ka̱pnɛ jɛ ɛn ɣöö ba raan moc cuɔ̱ɔ̱ŋ kɛ ŋa̱th go̱lä kä lät ŋutdä.

²⁹ Caari jɛ i̱ ɛ Kuoth ji̱ Juudh kärɔ̱? A /ciɛ Kuoth Juri bä? Ɣɔ̱ɔ̱n, ɛ Kuoth Juri bä,

³⁰ kɛ ɣöö Kuoth ɛ kɛl, kä bɛ nɛy tin ca cuɛl moc cuɔ̱ɔ̱ŋ kɛ kui̱ ŋäthädiɛn, amäni nɛy tin /ka̱n cuɛl kɛ kui̱ ŋäthädiɛn.

³¹ La kɔn ŋut a yär kɛ kui̱ ŋäthä ɛmɛ? /Cɛ der a jɛn! Kä inɔ, la kɔn ŋut a jak kä ɣöö ba thuɔ̱k.