Ji̱ Röm 2 - RUAC KUƆTH IN RƐL RƆ

Luk Kuɔth cuŋɛ

¹ Kɛ kui̱c ɛmɔ thilɛ ji̱ cuɔ̱ɔ̱ŋ, cäŋɛ ji̱n ŋa, mi wi̱i̱ radɔ̱diɛn wä luk, kɛ ɣöö mi wi̱i̱ luk ŋok kɛ kui̱ raadɔ̱diɛn kuethi ni rɔ, kɛ ɣöö ji̱n luuk lätdi ŋɔak ti ce̱tkɛ kɛ pa̱ny.

² Ŋa̱cnɛ jɛ ɛn ɣöö luk Kuɔth ɛ cuɔ̱ɔ̱ŋ mi lukɛ nɛy ti la̱tkɛ ti ce̱tkɛ ti̱ti̱.

³ Kä ji̱n ram ɔ luk nɛy tin la̱tkɛ tɔ̱tɔ̱, kä ji̱n puɔ̱nydu lätdi kɛ ɛ ji̱n i̱, bi kään kä luk Kuɔth?

⁴ Kiɛ dɔ̱ŋ bi gɔɔydɛ min di̱i̱t kɛnɛ ruɔ̱tdɛ, amäni li̱ep bitädɛ lo̱k? Kui̱c ji̱n ɛn ɣöö Kuoth gɔaa lɔcdɛ kɛ ɣöö bɛ ji̱ böth kä ɣöö bi rɔ ri̱t kä dueerku?

⁵ Kä kɛ buɔ̱m wecdu, kä ɛnɔ jaki ni duäcdu kä bɛ di̱t ɛlɔ̱ŋ kɛ cäŋ luɔ̱k, in bi jɔɔc kɛ cäŋ gaak luɔ̱k Kuɔth in cuŋ.

⁶ Kɛ ɣöö jɛn bɛ ramɔ culikä ce̱tkɛ pek lätnikɛ.

⁷ Kä nɛy tin la̱tkɛ ni gɔy kä görkɛ ni buay kɛnɛ luth, a thil pek, bi Kuoth kɛ ka̱m tëk mi do̱raar.

⁸ Kä kɛ kui̱ nɛɛni tin görkɛ ni rɔ̱, kä /cikɛ thuɔ̱k luth, tin luɔ̱thkɛ ni ciaŋ dueeri, bi Kuoth kɛ wuɔ̱c gakdɛ kɛnɛ waŋ lɔaacdɛ.

⁹ Bɛ tekɛ cuɔ̱c kɛnɛ jiath lɔaac kɛ kui̱ nɛɛni diaal tin la̱tkɛ jiäk, bɛ la ji̱ Juudh kɛ nhiam amäni Jur bä.

¹⁰ Kä duundɛ ɣöö bi Kuoth buay, kɛnɛ luth, kɛ mal ka̱m nɛy diaal tin la̱tkɛ gɔy, kä ji̱ Juudh kɛ nhiam kɛnɛ Jur bä.

¹¹ Kɛ ɣöö Kuoth bi nɛy diaal luk a päär.

¹² Jur diaal tin ci duer a thil ŋut Muthɛ bikɛ li̱w a thil ŋut bä. Kä ji̱ Juudh diaal tin ci duer a tekɛ rɛy ŋutdä ba kɛ luk kɛ ŋut.

¹³ Kä /ciɛ li̱eŋ ŋutdä ɛ ni̱n moc naath kɛ cuɔ̱ɔ̱ŋ nhiam Kuɔth, duundɛ ɣöö ɛ lätni kä min ci ŋuɔ̱t ɛ lat.

¹⁴ Kä Jur thilɛ kɛ ŋut kä latkɛ tin go̱o̱r ŋutkɛ kɛ ta̱a̱diɛn, kɛn nɛy tɔ̱tɔ̱ kɛ ŋut kä rɔ̱, a cäŋ thilɛ kɛ ŋut.

¹⁵ Nyooth ciaaŋdiɛn ɣöö min go̱o̱r ŋutdɛ ca jɛ gɔ̱r rɛy lo̱cnikiɛn. Kä ŋäc lo̱cnikiɛn nyoothɛ jɛ ɛn ɣöö nɔmɔ ɛ thuɔ̱k, min gɔɔny cärkiɛn kɛ kɛ tha̱a̱ŋ gua̱thni, kä gaŋkɛ kɛ kɛ dueerkiɛn.

¹⁶ Kɛn ti̱ti̱ diaal bikɛ tuɔɔk kɛ cäŋ in wä Kuoth tɛ̱̈ɛ̱̈ni cäri nath wä luk kɛ Kritho Yecu, ce̱tkɛ min ca lat ɛ thuk tin gɔw kɛ kui̱ Yecu tin latdä.

Ji̱ Juudh kɛnɛ ŋut

¹⁷ Kä ji̱n, mi cɔɔli rɔ, i̱ raan ji̱ Juudh, kä ŋääthi ni ŋut, kä liaki rɔ kɛ thiëëkdu kɛ Kuoth,

¹⁸ kä ŋäci min go̱o̱r Kuoth ɛ i̱ deri la̱t, kä ŋäc mi gɔaa kɛ ɣöö ŋäci ŋut.

¹⁹ Go̱o̱ri jɛ kɛ lɔcdu ɛn ɣöö bi ji̱n a bo̱o̱th cɔaar, kä ɛ ji̱n buay kä nɛy tin te rɛy muɔ̱th?

²⁰ Ɛ ji̱n ko̱o̱c dɔa̱a̱ri, kä ŋi̱i̱c gan, a ti rɛy ŋutdä kä ŋäci ŋɔaani diaal kɛnɛ thuɔ̱k kɛɛliw?

²¹ Ji̱n ram mi ŋi̱i̱c nɛy kɔ̱kiɛn, /ci rɔ bi ku ŋi̱eec? Gua̱a̱thɔ latdi jiääk kuëlɔ, ji̱n la kueli?

²² Ji̱n ram min laar jɛ i̱, /ci raan dee dhɔm, la dho̱mi? Ji̱n ram min lat kuth jiɛn jɔ̱ɔ̱r, ji̱n la lueek kuthni a maci?

²³ Ji̱n ram min liak rɔ kɛ ŋut, thilɛ ji̱ luth kɛ yäri ciɛɛŋä ŋutdä Kuɔth?

²⁴ Ce̱tdɛ kɛ min ca gɔ̱r i̱, “Yaak naath ciöt Kuɔth kɛ kui̱dun yɛn ji̱ Juudh rɛy Juri.”

²⁵ Cuël ɛpuc tëëkɛ gɔɔy, mi luthi ŋut, kä mi to̱li ŋut ci ciaaŋ cuelädu thil luɔt.

²⁶ Kä mi ɛ ram mi /ka̱n cuɛl kääp ŋuɔ̱t tɔ̱, /ca thil cuelädɛ dee lar i̱ ɛ cuël?

²⁷ Inɔ, bi nɛy tin /ka̱n cuɛl kä ka̱pkɛ ŋut yɛ kuɛth, yɛn nɛy tin tekɛ ŋut mi ca gɔ̱r kä ca cuɛl, kä tölɛ ŋut.

²⁸ Kɛ ɣöö /ci raan dee a raan Juudh mi thuɔ̱k kɛ jɔacdɛ, kiɛ kɛ cuël mi thuɔ̱k mi la duŋ pua̱a̱ny.

²⁹ Kä raan Juudh in thuɔ̱k, ɛ raan Juudh kɛ rɛydɛ min ca cuɛl lɔɔcdɛ, kä nɔmɔ ɛ la̱t yieekä Kuɔth, a /ciɛ la̱t ŋutdä min ca gɔ̱r ɛn ram ɛmɔ. /Ci liakdɛ bä kä naath, bëë kä Kuoth.