Ji̱ Röm 16 - RUAC KUƆTH IN RƐL RƆ

Ner ji̱ Yecu kä Röm

¹ La̱thä nyimandan ni Pi-bi la läät duëël Kuɔth kä Thɛn-ka-ria tetnikun,

² kɛ ɣöö dee yɛn ɛ nyuɔ̱ɔ̱r agɔaa rɛy Kua̱r kɛ ciaaŋ ji̱ Kuɔth tin cɛ lɛy. Kä lua̱kɛ jɛ kɛ ti diaal tin bɛ go̱r kä yɛ, kɛ ɣöö cɛ kɔŋ a luääk nɛɛni ti ŋuan amäni ɣän bä.

³ Nërɛ Pɛ-rith-ka kɛnɛ A-kui-lä, nɛy tee lät kɛ ɣä kɛɛl rɛy Kritho Yecu,

⁴ nɛy tëë ca rɔ̱ nöŋ riɛk kɛ kui̱ teekädä, kä /cä lär nikɛ tɛ̈th lɔaac kä rɔ̱, amäni duël Kuɔth Juri diaal.

⁵ Kä nërɛ duel Kuɔth bä in la duɔl dueeliɛn. Nërɛ nho̱o̱kdä ni Ɛp-ɛ-ni-täth mëë kɔn rɔ riet Kritho kɛ nhiam rɛy rööl E-cia.

⁶ Nërɛ Mɛri mëë ci lät a bum rɛydun.

⁷ Nërɛ An-dro-ni-kuth kɛnɛ Ju-niäth ji̱ maarädä, nɛy tëë ca kɔ yiɛn kɛɛl, kɛn kɛ jaak ti gɔw rɛy jaakni Yecu. Kɔŋ te ni kɛn rɛy Kritho kä ɣä.

⁸ Nërɛ Am-pi-la-tuth, nho̱o̱kdä rɛy Kua̱r.

⁹ Nërɛ Ur-ba-näth läät kɛɛl kɛ kɔn rɛy Kritho, amäni nho̱o̱kdä ni Tha-kith.

¹⁰ Nërɛ A-pɛl-lɛth min ca nhökdɛ rɛy Kritho ŋic. Nërɛ ji̱ dhɔaar A-rith-tɔ-bu-leth.

¹¹ Nërɛ ram in la watdä ni Ɣɛ-ro-diɔn. Nërɛ tin te rɛy Kua̱r ni Yecu, tin la ji̱ dhɔaar Nar-thi-thäth.

¹² Nërɛ ji̱ la̱t tɔ̱tɔ̱ rɛy Kua̱r ni Kuoth, Tri-pë-na, kɛnɛ Tri-po-tha. Nërɛ nho̱o̱k ni Per-thith min ci lät a bum rɛy Kua̱r ni Kuoth.

¹³ Nërɛ Ru-päth, ram min ca mɛk rɛy Kua̱r ni Kuoth, kä nërɛ man in la maar bä.

¹⁴ Nërɛ A-thin-ka-ri-tuth, Plɛ-gon, Ɣer-miith, Pa-tro-bath, Ɣer-mäth kɛnɛ gaatmani tin te kɛɛl kɛ kɛ.

¹⁵ Nërɛ Pi-lo-lo-gäth, Ju-lia, Nɛ-re-äth, kɛ nyiman, kɛ O-lim-päth kɛnɛ nɛɛ Kuɔth ti cɛ lɛy tin te kɛɛl kɛ kɛ.

¹⁶ A ramɔ neer ramɔ kɛ ci̱em nho̱kä mi rɛl rɔ. Kä duël Kuɔth Kritho diaal nërkɛ yɛ.

Pek ruac Puɔl kɛ ji̱ Röm

¹⁷ Ɣän cuɔmä yɛ dämaari, i̱ niɛkɛ rɔ̱ kɛ nɛy tin nöŋkɛ yɛ ŋaknɔmni kɛnɛ rik, tin gua̱c kɛ luɔt ŋi̱i̱cä min ca ŋi̱i̱c ni yɛ. Nɔ̱a̱nɛ rɔ̱ kɛ kɛ.

¹⁸ Kɛ ɣöö nɛy ti ce̱tkɛ ti̱ti̱, /cikɛ Kuääran ni Kritho lätikä, la̱tkɛ ni jia̱ckiɛn ikä. Kä kɛ rieet pɛlä ka̱a̱cni kaŋkɛ lo̱c nɛɛni ti ma̱ŋ ma̱a̱ŋ.

¹⁹ Ci nɛy diaal luthdun kɛ thuk ti gɔw kɛ kui̱ Yecu liŋ, kɛ kui̱c ɛmɔ tɛth lɔcdä kɛ yɛ. Kä göörä ɣöö bia pɛl kɛ kui̱ kä mi gɔaa, kä /cuarɛ ti jiäk lät.

²⁰ Inɔ, bi Kuoth malä Cɛy-tan riac piny ciöknikun. A puɔ̱th Kua̱ran ni Yecu Kritho tekɛ yɛ kɛɛl.

²¹ Ti-mo-thi min la läät kɛ ɣä kɛɛl nerɛ yɛ, amäni Lu-ciäth kɛnɛ Je-thon, kɛ Tho-thi-pa-tɛr, nɛy tin la watkä.

²² Ɣän Ter-ciäth min gɔ̱r warɛgak ɛmɛ, nërä yɛ rɛy Kua̱r ni Kuoth.

²³ Gay-äth min nyuur ɣä kɔnɛ ji̱ duëël Kuɔth, nërkɛ yɛ. Ɛ-rath-täth, yuup yio̱o̱ni wec, amäni dämandan ni Kuar-täth nërkɛ yɛ. [

²⁴ A puɔ̱th Yieekä Kua̱ran ni Yecu Kritho tekɛ yɛn diaal kɛɛl. Inɔnɔ.]

Puɔny Puɔl kɛ Kuoth

²⁵ A puɔny tekɛ Kuoth! Jɛn tëë kɛ lua̱ŋ kɛ ɣöö bɛ yɛ jakä bum rɛy ŋäthädun ce̱tnikɛ thuk ti gɔw tëë cä la̱t yɛ kɛ kui̱ Yecu Kritho. Kä ce̱tkɛ thuɔ̱ɔ̱k tëë ca nyoth tëë /ca ŋäc ni wal kɛ run tëë ci wä.

²⁶ Kä täämɛ cɛ jɔɔc, kä ca jɛ jakä ŋa̱ckɛ rɛy warɛgakni göökni, kä kɛ ruac Kuɔth in do̱raar, ca jɛ jak kä ŋa̱ckɛ ɛ döör diaal kɛ ɣöö deekɛ tekɛ ŋa̱th kɛnɛ luth.

²⁷ A puɔny tekɛ Kuoth in kɛl kärɔa kɛ Yecu Kritho amäni cäŋ kɛl! Inɔnɔ.