Ji̱ Röm 15 - RUAC KUƆTH IN RƐL RƆ

Jakni lɔc nɛɛni tin kɔ̱ŋ kä tɛth a /ci mɔ a ji̱n

¹ Kä kɔn nɛy tin bum ŋäthä banɛ a lua̱k nɛɛni tin kɔc ŋa̱thdiɛn, kä /cuarnɛ moc ni rɔ̱ kɛ tɛ̈th lɔaac.

² A ramɔ kä kɔn jak lɔc gua̱n thieekädɛ kä tɛth kɛ kui̱ gɔɔyädiɛn, kɛ ɣöö bɛ kɛ luäk kɛ pi̱eth rɛy ŋäthä.

³ Kɛ ɣöö /ken Kritho moc ni rɔɔdɛ kɛ tɛ̈th lɔaac, kä ce̱tkɛ min ca gɔ̱r i̱, “Ci kuethni tin kuëthkɛ ni yɛ pɛn wi̱i̱dä.”

⁴ Kɛ ɣöö tëë diaal tëë ca gɔ̱r ni wal, gɔ̱a̱rkɛ kɛ kui̱ ŋi̱i̱cädan, kɛ ɣöö banɛ tekɛ ŋa̱th kɛnɛ dhieel kɛ buɔ̱m lɔaac min ci ruac Kuɔth ɛ ka̱m kɔn.

⁵ A Kuoth in bä dhieel kɛnɛ buɔ̱m lɔaac kä jɛ käm yɛ ciaaŋ malä kamnikun, ce̱tkɛ ta̱a̱ Yecu Kritho,

⁶ kɛ kui̱ kä ɣöö dee yɛn Kuoth kä Gua̱n Kua̱ran ni Yecu Kritho puany kɛ jɔw kɛl.

Thuk ti gɔw kɛ kui̱ Yecu kɛ nyin ji̱ Juudh kɛnɛ Jur

⁷ Nyuɔ̱ɔ̱rɛ rɔ̱ agɔaa, ce̱tkɛ min ci Kritho yɛ nyuɔ̱ɔ̱r agɔaa kɛ kui̱ puɔnyä Kuɔth.

⁸ Kä bä jɛ la̱r yɛ ɛn ɣöö Kritho ɛ läät kɛ kui̱ ji̱ Juudh kɛ ɣöö bɛ thuɔ̱k Kuɔth nyoth, mëë ci Kuoth ɛ la̱r gua̱ndɔɔŋni ji̱ Juudh jakä thuɔ̱k.

⁹ Kä dee Jur Kuoth puany kɛ kui̱ kɔ̱cä lɔaacdɛ. Ce̱tkɛ min ca gɔ̱r i̱, “Kɛ kui̱c ɛmɔ bä ji̱ liak rɛy Juri, kä bä ciötdu puany kɛ diit.”

¹⁰ Kä cua lɛ gɔ̱r bä i̱, “A lo̱ckun tɛth lö Jur, kɛ nɛɛkɛ kɛɛl.”

¹¹ Kä ca nyɔk kɛ gɔ̱a̱r i̱, “Liakɛ Kuäär ni Kuoth, yɛn Jur diaal, kä a nɛy diaal liakɛ jɛ.”

¹² Kä cu I-ca-yaa jɛ nyɔk kɛ lär i̱, “Bi kuɛ̈ɛ̈ Jɛthi ben, jɛn ram min jiɛc rɔ kɛ ɣöö bɛ Jur ruac, kä kɛ jɛ bi Jur tekɛ ŋa̱th.”

¹³ A Kuoth ŋäthä thiäŋ yɛ kɛ tɛ̈th lɔaac kɛnɛ mal rɛy ŋäthä, kɛ ɣöö bi ŋa̱thdun te thi̱n kɛ lua̱ŋ Yieekä in Gɔaa in Rɛl Rɔ.

Lat Puɔl kɛ min gɔ̱ɔ̱rɛ a jɔc

¹⁴ Ɣän puɔ̱nydä gaatmaari lɔcdä ro̱ŋ kɛ kui̱dun, ɛn ɣöö thiäŋ yɛn kɛ gɔɔy, kä thia̱ŋ yɛn kɛ ŋäc ŋɔaani, kä ta̱yɛ kɛ lua̱ŋ kɛ ŋi̱i̱cdun kɛ rɔ̱.

¹⁵ Kɛ tha̱a̱ŋ ŋɔaani cä yɛ gɔ̱a̱r warɛgak kɛ ɣöö bia kɛ tim kɛ kui̱ kɔ̱cä lɔaac in ca ka̱m ɣä ɛ Kuoth,

¹⁶ kɛ ɣöö bi ɣän a läät Kritho Yecu kɛ kui̱ Juri. La̱tdä ala bo̱o̱th palä mi ŋi̱i̱c thuk tin gɔw kɛ kui̱ Kuɔth, kɛ ɣöö dee Juri a muc ti nhɔk Kuoth kɛ ti ca lɛy ɛ Yiëë in Gɔaa in Rɛl Rɔ.

¹⁷ Inɔ, ɣän liakä rɔ rɛy Kritho Yecu kɛ tin cä la̱t kɛ kui̱ Kuɔth.

¹⁸ Ɣän thilɛ mi bä lat ɛ ni min ci Kritho ɛ la̱t kɛ ɣä kɛ ɣöö bä Jur jak kä ɣöö ba Kuoth luɔ̱th. Kɛn cikɛ Kuoth luɔ̱th kɛ min cä lat kä cä la̱t,

¹⁹ kɛ buɔ̱m nyuuthni kɛnɛ ti ga̱ykɛ naath kɛ lua̱ŋ Yieekä Kuɔth. Ɣän cä ruac Kuɔth lat nikä Jɛ-ru-tha-lɛm a räth nikä I-li-ri-kum cä thuk ti gɔw lat kɛ kui̱ Kritho.

²⁰ Di̱t lɔcdä, kɛ ɣöö bä thuk ti gɔw kɛ kui̱ Yecu lat gua̱thni tin /ka̱n ciöt Kritho kɔŋ liŋ thi̱n, kɛ ɣöö /cä jɛ go̱r ɛn ɣöö bä la̱tdä la̱t wi̱i̱ la̱t mi ci radɔ̱diɛn ɛ tok.

²¹ Kä ce̱tkɛ min ca gɔ̱r i̱, “Bi nɛy tin /ka̱n la̱t thuk kɛ kui̱ Yecu bikɛ jɛ nɛn. Kä bi nɛy tin /ka̱n jɛ met liŋ jɛ ŋa̱c.”

Ca̱r Puɔl kɛ gui̱lɛ kɛ Röm

²² Nɛmɛ ɛ jɛn luɔt kä min gaŋ ɣä jɔ̱ɔ̱r kɛ bendä kä yɛ gua̱thni ti ŋuan.

²³ Kä ɛn täämɛ cä thuɔ̱k kɛ la̱t ɛn gua̱thni ti̱ti̱, kä mëë göörä ben kä yɛ kɛ run ti ŋuan,

²⁴ ɛn täämɛ göörä ben kä yɛ. Ɣän bä yɛ bak kɛ wädä kä Thɛ-peen, kä bia ɣä wä luäk kɛ wädä ɛn wi̱ni, guäth in ci lɔcdä tɛ̈th lɔaac kɛ gui̱lun.

²⁵ Kä ɛn täämɛ wa̱a̱ kä Jɛ-ru-tha-lɛm wa̱a̱ nɛɛ gan Kuɔth tin cɛ lɛy luäk.

²⁶ Kɛ ɣöö ci ji̱ Ma-tha-do-nia kɛnɛ ji̱ A-ke-ya ɛ nhɔk ɛn ɣöö bikɛ muc thöp kɛ kui̱ caani tin te rɛy nɛɛni Kuoth tin te kä Jɛ-ru-tha-lɛm.

²⁷ Cu kɛn ɛ nhɔk i̱ ba la̱t, kä ɛpuc ɛ cuɔ̱ɔ̱ŋ kä kɛ. Kä kɛ ɣöö ci Jur ben nyuaakä puthä yieekä ji̱ Juudh, gɔaa ɛ bä ɛn ɣöö bi kɛn nyinkiɛn nyuak kɛ ji̱ Juudh.

²⁸ Mi wa̱a̱ nɛmɛ wä thuk inɔ, kä cä kɛ ka̱m tin ca dol, ɣän bä yɛ bak kɛ wädä kä Thɛ-peen.

²⁹ Kä ŋa̱cä jɛ ɛn ɣöö mi wa̱a̱ ben kä yɛ bä ben kɛ puɔ̱th Kritho mi ro̱ŋ.

³⁰ Dämaari, ɣän la̱ŋä yɛ kɛ kui̱ Kua̱ran ni Yecu Kritho kɛnɛ nhök Yieekä, ɛn ɣöö bia lät kɛ ɣä kɛɛl rɛy palikun kɛ Kuoth kɛ kui̱dä.

³¹ Palɛ kɛ ɣöö dëë ɣä kän kä nɛy ti thil ŋa̱th kä Ju-dia, kɛnɛ ɣöö dëë la̱tdä kä Jɛ-ru-tha-lɛm nhɔk ɛ nɛɛ Kuɔth tin cɛ lɛy ɛn wi̱ni,

³² inɔ, kɛ ruac Kuɔth dëë ben kä yɛ kɛ tɛ̈th lɔaac, a dee puɔ̱nydä wä, pɛl rɛydun.

³³ A Kuoth malä tekɛ yɛn diaal. Inɔnɔ.