Ji̱ Röm 14 - RUAC KUƆTH IN RƐL RƆ

/Cuarɛ nɛy kɔ̱kiɛn luk

¹ Kɛ kui̱ raam mi kɔ̱c ŋa̱thdɛ nyuɔ̱ɔ̱rɛ jɛ agɔaa, kä /ciɛ kɛ kui̱ ŋaknɔmni cärä.

² Tha̱a̱ŋ nath ŋa̱thkɛ ni min camkɛ, kä cam nɛy tin kɔ̱c camkɛ ni wal kärɔ̱.

³ A nɛy ti mi̱th /ci nɛy tin lökɛ mi̱eth lat jɔ̱ɔ̱r, kä a nɛy tin lo̱k mi̱eth /ci nɛy tin mi̱th luk, kɛ ɣöö ci Kuoth kɛ nyuɔ̱ɔ̱r agɔaa.

⁴ Ɛ ji̱n ŋa mɔ deri la̱a̱t radɔ̱diɛn luk ɔ? Bi jɛ lat Kuääriɛn mi la̱tkɛ ni cuŋ kiɛ duer. Kɛ ɣöö bi, Kuäär kɛ luäk, bɛ kɛ jak kä lät ni mi gɔaa.

⁵ Car tha̱a̱ŋ nath ɛ bi gɔaa ni cäŋ kɛl kä cäŋ in dɔ̱diɛn, kä car tha̱a̱ŋkiɛn ɛ päär ni̱n diaal. A nɛy tɔ̱ jëkɛ ca̱r lɔaacdiɛn kärɔ̱.

⁶ Nɛy tin tiɛtkɛ cäŋ, tiɛtkɛ kɛ kui̱ luthä Kua̱r ni Kuoth. Kä nɛy tin mi̱th, mi̱thɛ kɛ kui̱ luthä Kua̱r ni Kuoth, min la̱rkɛ Kuoth tɛ̈th lɔaac. Kä nɛy tin /ci mi̱th, lökɛ mi̱eth kɛ kui̱ luthä Kua̱r ni Kuoth, kä ka̱mkɛ Kuoth tɛ̈th lɔaac.

⁷ Thilɛ raan kä kɔn mi tëk kɛ tëkdɛ kärɔa, kä thilɛ raan kä kɔn mi li̱w kɛ lia̱a̱dɛ kärɔa.

⁸ Mi tëk kɔn, tëk kɔn kɛ Kuäär ni Kuoth, kä mi li̱w kɔn, li̱w kɔn kɛ Kuäär ni Kuoth. Kä inɔ, cäŋ tëk kɔn kiɛ li̱w kɔn kɛ kɔn nɛɛ Kua̱r ni Kuoth.

⁹ Kä kɛ kui̱ ɛmɔ ci Kritho li̱w, kä cɛ lɛni tëk kɛ ɣöö derɛ a Kuäär ni Kuoth nɛɛni tin ci li̱w kɛnɛ nɛy tin tëk.

¹⁰ Ɛŋu ŋoki luk wi̱i̱ ganmuɔɔr ɔ? Kä ji̱n, ɛŋu latdi gaatmuɔɔr jɔ̱ɔ̱r ɔ? Kɛ ɣöö bi kɔn diaal cuɔ̱ŋ nhiam kɔam luɔ̱k Kuɔth.

¹¹ Kɛ ɣöö ca jɛ gɔ̱r i̱, “Ce̱tkɛ min tëkä, lar Kuäär ni Kuoth ɛ, bi mua̱a̱l diaal rɔ̱ goŋ nhiamdä, kä bi lëëp diaal Kuoth liak.”

¹² Ba kɔn diaal luk nhiam Kuɔth inɔ.

/Cuarɛ nɛy ti kɔ̱ŋ jak kä dui̱r

¹³ Inɔ, /cuarnɛ ŋuɔk luɔ̱k lɛ nyɔk kamdan, kä ŋua̱ni ɣöö bi kɔn dhil ca̱r i̱ /canɛ päm kɔ̱thä kiɛ riɛk bi met la̱th dup dämandan.

¹⁴ Ŋa̱cä jɛ kä jëkä jɛ kɛ lɔcdä kɛɛliw rɛy Kua̱r ni Yecu ɛn ɣöö thilɛ mi la jiäk kärɔaadɛ, kä la jiäkɛ kɛ kui̱ cärä raam mi car jɛ i̱ jiäkɛ.

¹⁵ Mi jek gaatmuɔɔr mi bɛc kɛ mi cami, /ci lɛ ŋot kɛ ta̱a̱ rɛy nho̱kä. /Cu mi cami jakä yär ram mi ci Kritho li̱w kɛ kui̱dɛ.

¹⁶ Kä inɔ, /cu mi gɔaa kä ji̱ jakä larkɛ jɛ i̱ jiäkɛ.

¹⁷ Kɛ ɣöö ciaŋ kuäärä Kuɔth /cɛ lot ni mi̱eth kɛnɛ ma̱th, lotdɛ ni ciaŋ cuŋni kɛnɛ mal kɛ tɛ̈th lɔaac rɛy Yieekä in Gɔaa in Rɛl Rɔ.

¹⁸ Jɛn ram mi lät Kritho ikä inɛ, mocɛ Kuoth tɛ̈th lɔaac, kä nhɔakɛ jɛ ɛ naath.

¹⁹ Inɔ, kuanɛ min no̱ŋ mal kɛnɛ pi̱eth ciɛɛŋä matdä döt lɛɛr.

²⁰ /Cuarɛ la̱t Kuɔth yär kɛ kui̱ mi̱eth. Ŋɔaani diaal gɔwkɛ pa̱ny, kä ɛ duer ɛn ɣöö bi raan nɛy kɔ̱kiɛn jakä tɛth dui̱rä kɛ kui̱ kä mi camɛ.

²¹ Ɛ cuɔ̱ɔ̱ŋ ɛn ɣöö /ci ri̱ŋ bi cam, kiɛ /ci kɔaŋ bi math, kiɛ la̱t kɛ mi dɔ̱ŋ mi bi gaatmuɔɔr jakä dui̱r.

²² Ŋa̱th in tekɛ ji̱ ɛ mi te kamdu yɛnɛ Kuoth. Puɔ̱th akɛ nɛy tin /ca rɔ̱ bɛl kɛ kui̱ kä min cɛ lar i̱ ɛ cuɔ̱ɔ̱ŋ.

²³ Kä nɛy tin diɛwkɛ min camkɛ cakɛ ku thuŋ kuɛth, kɛ ɣöö /cikɛ lät kɛ ŋa̱th, kɛ ɣöö min /ci bä kä ŋa̱th ɛ duer.