Ji̱ Röm 13 - RUAC KUƆTH IN RƐL RƆ

A ruëëc luɔ̱thkɛ

¹ A nɛy diaal luɔ̱thkɛ ruëëc nath. Kɛ ɣöö thilɛ ruëëc ti tekɛ lua̱ŋ mi /ka̱n ɛ lar ɛ Kuoth, kä lua̱ŋ ruëëcni min te thi̱n ŋun ɛ Kuoth.

² Kɛ kui̱ ɛmɔ ram mi theew ruëëc, theewɛ ni ti ci Kuoth kɛ mɛk, kä kɛn ti theewkɛ ruëëc bikɛ kuëth luɔ̱k jek.

³ Kɛ ɣöö ruëëc /ci nɛy ti la̱tkɛ gɔy dual kɛ kɛ, dual ni nɛy tin la̱tkɛ ti jiäk. Go̱o̱ri ɣöö ci bi dual kɛ ruëëc? Kä inɔ, la̱tdɛ ni mi gɔaa, kɛ ɣöö ba yɛ liak ɛ kɛn.

⁴ Kɛ ɣöö ɛ läät Kuɔth kɛ kui̱dun. Kä mi lät yɛn ni duer, bia dual, kɛ ɣöö /cɛ thɛp kän baaŋ! Jɛn ɛ läät Kuɔth min bi ŋɛ̈ny Kuɔth nöŋ ji̱ la̱t jiäkni.

⁵ Kɛ kui̱ ɛmɔ a raan luär rɔɔdɛ kua̱r, /ciɛ kui̱ ŋɛɛnyä Kuɔth duundɛ ɣöö kɛ kui̱ ŋäcä lɔaac bä.

⁶ Kɛ jɛn luɔt ɛmɛ bi yɛn tho̱lbo̱k thöp bä, kɛ ɣöö ruëëc kɛ la̱a̱t Kuɔth, lät kɛn ni jɛn la̱t ɛmɛ pa̱ny.

⁷ Ka̱mɛ kua̱r diaal tin la nyinkiɛn, a tho̱lbo̱k wä kä tin görkɛ tho̱lbo̱k, dualɛ kɛ tin ro̱ŋ kɛ dual, kä luɔ̱thɛ nɛy tin dëë luɔ̱th.

Ɛ ram ɔ nhɔk ram ɔ

⁸ /Cuarɛ tekɛ mi ŋua̱l kɛ raan, kä nhɔakɛ ni rɔ̱, kɛ ɣöö ram mi nhɔk ram mi dɔ̱ŋ cɛ pek ŋutdä kɛɛliw la̱t.

⁹ Ci ŋut ɛ lar i̱, “/Cu dho̱m, /cu raan näk, /cu kuel, /cu lɔcdu bi jakä di̱t.” Kä luëëk tin kɔ̱kiɛn matkɛ kɛ ɛ riet kɛl ɛmɛ i̱, “Nhɔk gua̱n thieekädu ce̱tkɛ min nhɔki rɔɔdu.”

¹⁰ Nhök /cɛ gua̱n thieekä a lätdɛ kä duer, kɛ ɣöö nhök ɛ jɛn pek ŋutdä kɛɛliw.

¹¹ Kä kɛ nɛmɛ bä, kɛ ɣöö ŋäc yɛnɛ ci thaak cop gua̱a̱th in bi keer kɛ yɛ ni̱n täämɛ. Kɛ ɣöö ka̱n thia̱k ni jɛn kɛ kɔn täämɛ, kä gua̱a̱th ëë tuɔknɛ ni ŋa̱th.

¹² Ci wäär thia̱k kɛ thuɔ̱k, ci bak ɣɔaa thia̱k. Ka̱mnɛ lät muɔ̱th raar, kä la̱thnɛ ko̱t buɔyä.

¹³ Yuɔpnɛ rɔ̱ agɔaa ce̱tkɛ nɛy ti te rɛy buɔyä, a thil rɔal kiɛ yɔ̱ŋ kɔaaŋni, a thil ciaŋ leerä, a thil gak kɛnɛ tiɛɛl.

¹⁴ Kä ruɔnyɛ rɔ kɛ Kuäär ni Yecu Kritho, Kä /cuarɛ go̱r ni puɔ̱ny ikä kɛ lätnidun kɛ tin go̱o̱rɛ.