Ji̱ Röm 10 - RUAC KUƆTH IN RƐL RƆ

¹ Dämaari, min go̱o̱r lɔcdä jɛ ɛlɔ̱ŋ, min la palä Kuoth ɛ jɛn ɣöö dee nɛɛkä kään.

² Ɣän dëë lar ni ɣöö cikɛ rɔ̱ ka̱m Kuoth, duundɛ ɣöö /kenkɛ rɔ̱ ka̱m Kuoth kɛ duɔ̱ɔ̱p ŋäcä mi thuɔ̱k.

³ Kɛ ɣöö kui̱c kɛn duɔ̱ɔ̱p in moc Kuoth naath cuɔ̱ɔ̱ŋ kɛ jɛ, kä cukɛ go̱r ni duɔ̱ɔ̱pdiɛn, kä /ken kɛn go̱r ni duɔ̱ɔ̱p cuŋni Kuɔth.

⁴ Kɛ ɣöö Kritho ɛ jɛn pek ŋutdä, kɛ ɣöö dee nɛy diaal tin tekɛ ŋa̱th tekɛ cuŋ.

Ka̱n ɛ duŋ nɛɛni diaal

⁵ Muthɛ cɛ gɔ̱a̱r kɛ kui̱ cuŋni tin jëkɛ kɛ ŋuɔ̱t i̱, “Ram mi wä ŋuɔ̱t ti̱ti̱ wä luɔ̱th bɛ tëk kɛ kɛ.”

⁶ Kä duundɛ ɣöö ɛ cuŋ tin jëkɛ kɛ ŋa̱th i̱, “/Cu rɔ jio̱k i̱, ‘Ɛŋa mi bi wä nhial?’ ” (kɛ ɣöö bɛ Kritho wä nööŋ piny)

⁷ kiɛ bi wee i̱, “Ɛŋa mi bi wä piny?” (kɛ ɣöö bɛ Kritho wä nööŋ raar li̱th).

⁸ Kä nɛmɛ ɛ min latdɛ i̱, “Riet thia̱kɛ kɛ yɛ, tëë thokdun, kɛnɛ lo̱ckun” (ɛ jɛn riet ŋäthä min latnɛ).

⁹ Kɛ ɣöö mi wiaa jɛ lar kɛ thokdun ɛn ɣöö Yecu ɛ Kuäär, kä ŋäth yɛn ɛ rɛy lɔaacdun ɛn ɣöö ci Kuoth ɛ jiɛc li̱th, bia kään.

¹⁰ Kɛ ɣöö muɔckɛ raan cuɔ̱ɔ̱ŋ kɛ ŋa̱th lɔaacdɛ, kä ram mi lat ŋa̱thdɛ kɛ thokdɛ bɛ kään.

¹¹ Ci ruac Kuɔth wee i̱, “Thilɛ ram mi ŋääth jɛ mi ba jakä po̱c.”

¹² Kɛ ɣöö thilɛ dääk kam ji̱ Juudh kɛnɛ ji̱ Gɛ-rith, kɛ ɣöö Kuäär ni Kuoth ɛ kɛl, kä ɛ jɛn Kuäär ni Kuoth nɛɛni diaal, kä la tho̱pɛ puɔ̱th nɛy diaal tin ŋa̱thkɛ jɛ.

¹³ Kä ci ruac Kuɔth wee i̱, “Nɛy diaal tin cɔalkɛ ciöt Kua̱r ni Kuoth bikɛ kään.”

¹⁴ Kä dee naath ɛ cɔl kɛ luäk i̱di mi /ci kɛn ɛ ŋäth? Kä dee kɛn ɛ ŋäth i̱di ɛn ram min /ken kɛn ɛ met liŋ? Kä dee kɛn ɛ liŋ i̱di, mi thilɛ ram mi ci jɛ la̱tkɛ?

¹⁵ Kä dee naath ruac lat i̱di, mi /ka̱n kɛ ja̱k? Ce̱tkɛ min ca gɔ̱r i̱, “Ku ben nɛɛni tin ŋööŋkɛ thuk ruaacni tin gɔw lɛ gɔw i̱di!”

¹⁶ Kä /ken kɛn diaal ruaacni tin gɔw luɔ̱th, kɛ ɣöö ci I-ca-yaa wee i̱, “Kuäär ni Kuoth, ɛŋa mi ci ruacda ŋäth?”

¹⁷ Kɛ ɣöö ŋa̱th bëë kä mi ca liŋ, kä mi ca liŋ bëë kɛ lat cio̱tdä Kritho.

¹⁸ Kä cua̱ thiec i̱, /ken kɛn ɛ liŋ? Ɛpuc, ca liŋ, kɛ ɣöö ca lat i̱, “Ci jɔwdiɛn wä rɛy ɣɔaa kɛɛliw, ci rieetkiɛn cop pekni ɣɔaa.”

¹⁹ Kä cua̱ rɔ nyɔk kɛ thiec, /kenɛ cop lɔc ji̱ I-thɛ-rɛl? Kɛ nhiam ci Muthɛ wee i̱, “Bä yɛ jakä tekɛ tiɛɛl kɛ kui̱ nɛɛni tin /ci tɔ̱ a do̱r, bä yɛ jakä ŋɛ̈ny kɛ kui̱ döör mi dɔ̱a̱r.”

²⁰ Inɔ cu I-ca-yaa rɔ liak wëë i̱, “Ca ɣä jek ɛ nɛy ti /ka̱n ɣä go̱r, cä rɔ nyuɔ̱th nɛy ti /ka̱n ɣä thiec.”

²¹ Kä kɛ kui̱ ji̱ I-thɛ-rɛl cuɛ wee i̱, “Kɛ cäŋ kɛɛliw cä tetkä ta̱r nɛy ti thil luth ti bum wuɔ̱thkiɛn.”