Ji̱ Röm 1 - RUAC KUƆTH IN RƐL RƆ

¹ Ɛ ɣän Puɔl, läät Yecu Kritho, kä ca cɔl kɛ ɣöö bɛ a jak, mi ca lɛ̈y go̱lä kɛ kui̱ thukni ti gɔw kɛ kui̱ Kuɔth.

² Ci Kuoth kɛ lar ni wal kɛn thuk tin gɔw kɛ kui̱ Yecu kɛ thok gööknikɛ ce̱tnikɛ min cakɛ gɔ̱r kä Ruac Kuɔth in Rɛl Rɔ.

³ Kɛ kɛn thuk ti gɔw kɛ kui̱ Yecu Gatdɛ, min la kuɛ̈ɛ̈ Dee-bid kɛ dieth.

⁴ Kä kɛ ɣöö ca jɛ jiɛc li̱th, ca jɛ lat ɛn ɣöö ɛ Gat Kuɔth kɛ yiëë in rɛl rɔ rɛy bumä mi di̱i̱t. Kä ɛ jɛn Yecu Kritho Kuääran.

⁵ Kä kɛ Yecu Kritho Kuääran, ci Kuoth ɣä ka̱m cuɔ̱ɔ̱ŋ kɛ ɣöö bi ɣän a jääk kɛ ɣöö bä jur diaal nööŋ rɛy luthä ŋäthä kɛ kui̱ cio̱tädɛ.

⁶ Kä yɛn tin cieŋ kä Röm ca yɛ cɔl bä kɛ ɣöö bi yɛn a nɛy Yecu Kritho.

⁷ Kä ɣän gɔ̱a̱rä yɛ mɛmɛ yɛn nɛɛ Kuoth diaal tin te kä Röm, tin nhɔkɛ kä cɛ cɔl kɛ ɣöö bikɛ a nɛɛkɛ. A puɔ̱th kɛnɛ mal Kuɔth in la Gua̱a̱ra kɛnɛ Kuäär ni Yecu Kritho tekɛ yɛ.

Pal tɛthä lɔaac

⁸ Kɛ nhiam, la̱rä Kuothdä tɛ̈th lɔaac rɛy Yecu Kritho kɛ kui̱dun yɛn diaal, kɛ ɣöö ca ŋa̱thdun lat rɛy ɣɔaa kɛɛliw.

⁹ Kɛ ɣöö Kuoth in la̱tdä ikä kɛ yiëëdä kɛ latdä kɛ thuk ti gɔw kɛ kui̱ Gatdɛ, jɛn ɛ neendä kɛ ɣöö la yɛ a tiɛɛmä gua̱thni diaal rɛy palikä a thil pa̱k.

¹⁰ Thiëcä, i̱ mi nhɔk Kuoth ɛ kɛ jɔak dɔ̱ŋ bɛ tekɛ gua̱a̱th mi bä kɛ ɣä kä yɛ.

¹¹ Kɛ ɣöö ɣän göörä jɛ ɛlɔ̱ŋ i̱ dëë yɛ nɛn, kɛ ɣöö dëë muc yieekä nyuak kɛɛl kɛ yɛ kä dëë yɛ bum.

¹² Kä luɔtdä ni ɣöö banɛ rɔ̱ com kɛɛl kɛ ciaŋ ŋäthädan, ŋa̱thdun kɛnɛ ŋa̱thdä.

¹³ Ɣän göörä ɣöö bi yɛn ɛ ŋa̱c, dämaari kä nyiemaari, ɛn ɣöö cä ɣɔ̱n gua̱thni ti ŋuan, i̱ bä ben kä yɛ, duundɛ ɣöö tëëkɛ mi pen ɣä ben. Ɣän göörä ɣöö bä naath jakä ŋa̱th rɛydun ce̱tkɛ min cä la̱t rɛy Juri tin kɔ̱ŋ.

¹⁴ Ɣän ta̱a̱ kɛ la̱t kɛ kui̱ ji̱ Gɛ-rith kɛnɛ Jur ti kueckɛ ciɛŋ ti com, kɛnɛ kui̱ nɛɛni ti pɛl kɛnɛ nɛy ti dɔa̱a̱r.

¹⁵ Ɛ jɛn görä ɣöö dëë yɛ wä la̱t thuk ti gɔw kɛ kui̱ Yecu, ɔ yɛn nɛy tin te kä Röm.

Buɔ̱m thukni tin gɔw kɛ kui̱ Yecu

¹⁶ Kɛ ɣöö ɣän liakä rɔ kɛ kui̱ thukni tin gɔw kɛ kui̱ Yecu, kɛ ɣöö ɛ buɔ̱m Kuɔth kɛ kui̱ känä nɛɛni diaal tin ŋa̱th, kɛ kui̱ ji̱ Juudh kɛ nhiam cu mäni ji̱ Gɛ-rith bä.

¹⁷ Kɛ ɣöö ci thuk tin gɔw ɛ nyoth ɛn ɣöö ci Kuɔth naath la̱th rɛy cuŋni kɛ jɛ kɛɛl. Cɛ jɛ la̱t kɛ ŋa̱th ni tukä cu mäni guutdɛ, ce̱tkɛ min ca gɔ̱r i̱, “Jɛn ram in tekɛ cuɔ̱ɔ̱ŋ bɛ tëk kɛ ŋa̱th.”

Duer ji̱ ɣɔaa

¹⁸ Kɛ ɣöö ci waŋ lɔaac Kuɔth jɔɔc nhial kɛ kui̱ dui̱rä kɛnɛ jiäk nath tin ci ciaŋ dueerikiɛn thuɔ̱k nhiat piny.

¹⁹ Kɛ ɣöö min dëë ŋa̱c kɛ kui̱ Kuɔth ca la̱t kɛ, kɛ ɣöö ci Kuoth ɛ nyuɔ̱th kɛ.

²⁰ Ni mëë ku Kuoth ɣɔw cak, ta̱a̱dɛ min ci jɔc, ala buɔ̱mdɛ min do̱raar kɛnɛ ciaaŋdɛ min rɛl rɔ, kɛn cikɛ jɔɔc kä tin cɛ la̱t. Kɛ kui̱c ɛmɔ kɛn nɛy ti̱ti̱ cikɛ thil cuɔ̱ɔ̱ŋ ɛn ɣöö deekɛ wee kueckɛ jɛ.

²¹ Kɛn ŋäc kɛn Kuoth kä /ken kɛn ɛ luɔ̱th ce̱tkɛ Kuoth kiɛ ka̱m tɛ̈th lɔaac. Kä cu ca̱riɛn cua̱ mi thil luɔt, kä cu ca̱r baaŋädiɛn cua ni muth.

²² Ruac kɛn i̱ pɛlkɛ, duundɛ ɣöö cu dɔ̱r ni kɛn,

²³ kä cukɛ pal Kuɔth in tëk päl wa pal ni ti ca la̱t ce̱tkɛ naath, kɛ diit, kɛ ley, kɛnɛ muɔɔl piɛny tin la li̱w.

²⁴ Kɛ kui̱c ɛmɔ cu Kuoth kɛ cu pa̱l ɣöö la̱tkɛ tin go̱o̱r lo̱ckiɛn ɛ, kä cukɛ cu la̱t ni nyin po̱cä kɛ rɔ̱.

²⁵ Cikɛ thuɔ̱k kɛ kui̱ Kuɔth luɛl kɛ kac, kä kɛn palkɛ ni mi ca cak kä lät kɛnɛ ikä, a /ci mɔ a Kuoth in cak ti diaal, min dëë liak ni jɛ amäni cäŋ kɛl! Inɔnɔ.

²⁶ Kɛ kui̱ kä mɛmɛ ci Kuoth kɛ cu pa̱l ciaaŋ po̱cädiɛn ɛ jiääk ɛmɔ. Ci mänkiɛn ciaŋ tɔ̱ɔ̱cä cɔɔnikiɛn luɛl kɛ tɔ̱ɔ̱c mään ti kɔ̱kiɛn.

²⁷ Kɛ jɛn duɔ̱ɔ̱p ɛmɔ bä ci wutni ciaaŋdiɛn kɛ män päl, cukɛ wä go̱r ni pua̱nykiɛn kɛ rɔ̱. Lät wutni ni lät po̱cä kɛ wutni ti kɔ̱kiɛn, kɛ kui̱c ɛmɔ cikɛ rɔ̱ nöŋ duäc kɛ kui̱ dueerikiɛn.

²⁸ Kä kɛ kui̱ kä ɣöö cikɛ thuɔ̱k lo̱k kɛ kui̱ Kuɔth, ci Kuoth kɛ pa̱l ca̱r mi baŋ kɛ ɣöö bikɛ la̱t ni tin /ca dee la̱t.

²⁹ Cikɛ cu thia̱a̱ŋ kɛ ciaŋ dueeri diaal kɛ jiäk, kɛ di̱t lɔaac, kɛnɛ nyi̱r. Thiäŋkɛ kɛ tiɛɛl, kɛ luc nath, gak, kac, kaŋ, kɛ ji̱ guɛɛri,

³⁰ ti ji̱ luɔm, nɛy ti nyiɛr kɛ Kuoth, kɛ jiääk thuɔk, ji̱ liakä, nɛy ti lar liakdiɛn, ji̱ ca̱a̱p jiäkni, nɛy ti thil luth kɛ diëëthkiɛn,

³¹ nɛy ti dɔa̱a̱r, ti /ca ŋäth, ti thil lo̱c, nɛy ti rɛ̈ŋ.

³² Ŋäc kɛn ŋut Kuɔth ɛn ɣöö bi nɛy ti la̱tkɛ ti jiäk ti ce̱tkɛ ti̱ti̱ li̱w. Kä /cikɛ lät ni ti̱ti̱ kä rɔ, kä nhɔakɛ nɛy tin la̱tkɛ ti̱ti̱ bä.