Jiɛth 5 - RUAC KUƆTH IN RƐL RƆ

La̱ŋ kɛ kui̱ pälikä

¹ Kuoth Nhial liŋ min ci tuɔɔk kä kɔ, nɛn riɛkda.

² Ca kuak kɔ ka̱n ɛ jur, dho̱rkɔ cakɛ ka̱n ɛ nɛy kɔ̱kiɛn.

³ A ci nɛy a rɛ̈tni ti thil gua̱ni, ci maari ce̱tnikɛ män jɔɔkni.

⁴ Kɔk nɛy pi̱w tin mathkɔ kä kɔk nɛy jiɛnkɔ.

⁵ Ciaŋkɛ nɛy a jiäk ɛ kɛn, cakɔ cuuc kä /cakɔ nho̱k lɔ̱a̱ŋ.

⁶ Cakɔ ruac kɛ I-jëp kɛnɛ A-thi-ri-ya, kɛ ɣöö bakɔ mi̱eth mi ro̱ŋ jek.

⁷ Ci gua̱a̱rikɔ duer, kä cikɛ wä, kä ruut nɛy ni dueerkiɛn.

⁸ Ɛ ruackɛ nɛy ɛ kuaany, a thilɛ ram mi dëëkɔ kän kä kɛ.

⁹ Jek nɛy mi̱eth ɛ bɛc, kɛ ɣöö na̱kɛ naath rɛy dɔaar.

¹⁰ A ci guɔ̱pda le̱th ɛ le̱th ce̱tnikɛ mac tha̱t kɛ kui̱ buath.

¹¹ Ka̱nkɛ mänkɔ pääm Dha-yɔn, kä ka̱nkɛ nyier rɛy wec Juda.

¹² Ŋapkɛ ruëëc kɛ tetkiɛn, kä /ca nɛy tin di̱t luth.

¹³ Kä jakɛ ŋuɛ̈tni wutni kä gua̱rkɛ bɛl, kä jakɛ dhɔɔl kä kapkɛ jiɛn ti thiak thiaak.

¹⁴ A cɛ thil ram mi di̱i̱t rɛy wec, kä /ci ŋuɛ̈tni thuɔmni lɛ puɔ̱t.

¹⁵ A cɛ cu thil tɛ̈th lɔaac kä kɔ, ci ŋara rɔ cu loc ni jiath lɔaac.

¹⁶ Ci kum kuäärä cu pɛ̈ɛ̈n wi̱i̱da, riɛk akɛ kɔn, kɛ ɣöö canɛ duer!

¹⁷ Kɛ kui̱ kä nɛmɛ ci lɔcdä jiath, kɛ kui̱ kä ti̱ti̱ /ci wäŋkɔ guic agɔaa kɛ mer.

¹⁸ Kɛ ɣöö ci päm Dha-yɔn duɔth baaŋ, a ciɛŋɛ ni guɔɔr.

¹⁹ Duundɛ ɣöö ji̱n Kuoth Nhial, bi ri̱c diaal ruac amäni cäŋ kɛl.

²⁰ Kä ɛŋu ku kɔ lɛ pa̱l ruëëc ɔ? Ɛŋu päli kɔ ruëëc ɛlɔ̱ŋ i̱ nɔ mɔ?

²¹ Locnikɔ puɔ̱ɔ̱nydu lö Kuoth Nhial a bakɔ luny kä ji̱ ce̱tkɛ ta̱a̱ ëë wal!

²² Kiɛ ci kɔ lo̱k ɛ ŋuy? a ku gakdu thil pek kɛ kɔ?