Jiɛth 4 - RUAC KUƆTH IN RƐL RƆ

Da̱k Jɛ-ru-tha-lɛm

¹ Mi ci da̱a̱p biɛlɛ pälɛ! Ci pääm luaak Kuɔth te ni duɔ̱pni.

² Ŋuɛ̈tni Dha-yɔn ce̱tkɛ nikɛ da̱a̱p, kä täämɛ cikɛ ce̱tnikɛ mun in la ta̱thkɛ dha̱a̱ri ɛ tääth muɔ̱ɔ̱n.

³ A ca ni wec guɔɔri, mi luëëthkɛ gaatkiɛn thi̱n, kä ci nɛɛkä kiɛth ce̱tnikɛ wuɔ̱t däärdɔaar.

⁴ A ci lëëp dho̱li dɔp ni nyääriɛn nhial kɛ kui̱ rɛ̈w, lim gaat mi̱eth, kä thilɛ ram mi moockɛ.

⁵ Kä nɛy tëë ca mi gɔaa kɔn cam, li̱w ni kɛn duɔ̱pni. Kä nɛy tëë pith rɛy riäŋä, cikɛ li̱w wuɔ̱thni di̱rä jiäkni kɛ go̱r mi̱eth.

⁶ Duäc nɛɛnikä di̱t ni jɛn kä duäc Thɔ-dɔm, mëë cu da̱k kɛ gua̱a̱th mi tɔt, kä thilɛ ram mi cu jɛ luäk.

⁷ Bööthkɛ läŋ nikɛn kä pi̱w, kä buɔy nikɛn kä cak, tekɛ kɛ pua̱ny ti ya̱ni ti puath puaath.

⁸ Ci nhiamdiɛn cuɔl ɛ cuc kɛ lia̱a̱, a /ca kɛ ŋic duɔ̱pni. Kä ci guɔ̱pdiɛn ko̱t pua̱ny cɔ̱ɔ̱nikiɛn.

⁹ Gɔw ni nɛy tin na̱kɛ kɛ thɛp, kä nɛy tin li̱w kɛ buɔth, kɛn nɛy tin li̱w kɛ luaaŋ, kɛ thil kä mi camkɛ.

¹⁰ A ci män thal ni gaatkiɛn ala mi̱eth, kɛ kui̱ rikä min ci ben kä nɛɛkä.

¹¹ Ci Kuoth Nhial rɔ col kɛ gakdɛ, cɛ Dha-yɔn yuɔ̱r mac in ci jɛ waŋ ni ke̱ŋnikɛ.

¹² Kä /ci kua̱r wec muɔ̱ɔ̱n kɛnɛ nɛy tin cieŋ thi̱n ɛ ŋäth, ɛn ɣöö dee ji̱ tɛ̈r coth kä Jɛ-ru-tha-lɛm.

¹³ Ɛn nɛmɛ bëë kɛ kui̱ dui̱rä gööknikɛ, kɛnɛ bööth palädɛ, tëë wuɔ̱thkɛ riɛm nɛɛni ti thil ŋu piny rɛydɛ.

¹⁴ Ɛ jɛn kukɛ yi̱ec ɔ rɛy duɔ̱pni ce̱tkɛ nɛy ti ciöör, ca rɔ nyon kɛ riɛm a thilɛ ram mi dëë guëër.

¹⁵ Kä cu naath kɛ jiök i̱, “Wiaa! Yɛn nɛy ti cia rɔ̱ ya̱r!” “Wiaakɛ! /Cuarɛ nɛy gueer!” Inɔ cikɛ cu yi̱i̱c rɛy nath, kä cu tha̱a̱ŋ nath wee i̱, “Akɛ /ci lɛ cieŋ kɛɛl kɛ kɔn.”

¹⁶ Kä cu Kuoth Nhial kɛ riaw kä piny, a /cɛ kɛ lɛ car, /ca bööth palä lɛ luɔ̱th, kä /ca di̱t lɛ nhɔk.

¹⁷ Kä ci wäŋkɔ cuuc kɛ guec baaŋ, kɛ go̱r luäkä, kɛ ɣöö guic nɛy ni nɛy ti /ca kɔ dee luäk.

¹⁸ Ji̱ tɛ̈r guɛckɛ kɔ, ɛ /cakɔ pen ja̱l duɔ̱pnikɔ, kɛ ɣöö ci ni̱nkɔ thia̱k, ci guut ben kä kɔ.

¹⁹ Nɛy tin juɔckɛ kɔ, puɔlnikɛn kä cor nhial, juɔckɛ nɛy wuɔ̱thni päämni, kä nyuɔ̱rkɛ nɛy ikä rɛy dɔaar.

²⁰ Kä cikɛ tëkda min la kuäär in ca kuany ɛ Kuoth Nhial käp, min caar nɛy ɛ i̱, “Dëëkɔ tëk kɛ jɛ rɛy nath.”

²¹ A lɔcdu tɛth lö nya Ɛ-dɔm min cieŋ kä Udh, duuŋdɛ ɣöö bi lɛni da̱k bä, a bi ja̱l ni juutdä.

²² Kä bi duäcdu lɛni thuk lö nya Dha-yɔn, /ci Kuoth Nhial ji̱ bi lɛ päl ɛla pɛ̈c. Kä ji̱n nya Ɛ-dɔm bɛ ji̱ duäc kɛ dueerku, kä bɛ jiäku lat raar.