Jiɛth 2 - RUAC KUƆTH IN RƐL RƆ

Duäc Kuɔth Nhial kɛ Jɛ-ru-tha-lɛm

¹ Kä ci Kuäär ni Kuoth nya Dha-yɔn kulɛ ciɛŋ a bɛc i̱di! Cɛ kuak I-thɛ-rɛl yuɔr piny ni nhial, /kenɛ kɔm ciöknikɛ car kɛ cäŋ gaakdɛ.

² A thil pälikä ci Kuäär ji̱ dhɔaar Je-kɔb thuk, kɛ gakdɛ cɛ ti̱ec nya Juda tin buɔ̱m buɔ̱ɔ̱m da̱k piny. Cɛ kuäärɛ kɛnɛ bööthkɛ jak kä thil luth.

³ Cɛ buɔ̱m I-thɛ-rɛl woc kɛɛliw, cɛ buɔ̱mdɛ ka̱n kä kɛ kɛ ko̱riɛn kɛ ji̱ tɛ̈r. Cuɛ Je-kɔb waŋ ce̱tnikɛ mac, in la pɛt ti diaal tin te gekädɛ.

⁴ Cɛ nɛy luɔ̱c thok bäärädɛ ce̱tkɛ gua̱n tɛ̈r, cɛ nɛy diaal tin nhɔakɛ näk. Cɛ gakdɛ wuɔc kɛmɛkä nya Dha-yɔn, ce̱tkɛ mac mi pɛt juaac.

⁵ Ci Kuäär ni Kuoth I-thɛ-rɛl däk, ce̱tkɛ gua̱n tɛ̈r. Cɛ ti̱ec kuäärä kɛnɛ ti̱ec, tin buɔ̱m buɔ̱ɔ̱m diaal da̱k piny. Kä cɛ rep ni pa̱r kɛnɛ jiath lɔaac nya Juda.

⁶ Cɛ duelɛ da̱k piny ce̱tnikɛ kak wal, cɛ gua̱a̱th palädɛ däk. Ci Kuoth Nhial Dha-yɔn gua̱th lɔ̱ŋä nöŋ guut. Ci kuäär kɛnɛ bo̱o̱th palä gakdɛ jek.

⁷ Ci kuäär yi̱kdɛ lo̱k, kä cɛ luaakdɛ ba̱ny piny. Cɛ pa̱nynikiɛn jak kä da̱kɛ ɛ ji̱ tɛ̈r. Rɔali kɛn rɛy luaak Kuɔth Nhial, ce̱tkɛ min la la̱tkɛ kɛ cäŋ ŋarä.

⁸ Ci Kuoth Nhial jɛ lar i̱ bɛ päny Jɛ-ru-tha-lɛm däk, cɛ moc nikɛ kue̱l, /kenɛ lɔcdɛ luär kɛ däkdɛ. Biɛɛni kɛnɛ pa̱nyni cikɛ da̱k kɛɛl.

⁹ Ci thiekni Jɛ-ru-tha-lɛm dɔp piny, kä ci Kuoth do̱o̱pnikɛ puɔ̱t. Ci kuäärɛ kɛnɛ bööthkɛ a pɛ̈ɛ̈c rɛy dööri ti̱ kɔ̱ŋ, a cikɛ thil ŋuɔ̱t, kä cɛ thil nyuuth mi lɛ̈ɛ̈ jek ɛ göökɛ, kä Kuoth Nhial.

¹⁰ Ci di̱t kɛnɛ nyier Dha-yɔn nyuur bitkɛ ɛ til, ca la̱th ni bieyni cuali pär kɛn. Kä ci nyier Jɛ-ru-tha-lɛm guɔ̱l ni wuɔ̱thkiɛn piny.

¹¹ Ci wäŋkä tith kɛ wiee, kä ŋɛɛrɛ jicdä. Ci lɔcdä käny ni raar kɛ ɣöö ci nɛɛkä duɔ̱p. Kɛ ɣöö gaat kɛnɛ dho̱li cuckɛ duɔ̱pni rɛy wec.

¹² Wieekɛ kä jio̱k kɛn mani i̱, “Kuän ani kɛnɛ kɔaŋ?” Bɛc pua̱nykiɛn ce̱tkɛ nɛy ti tekɛ buɔ̱ɔ̱t duɔ̱pni rɛy wec, li̱w kɛn kɛ luaaŋ yi̱k mani.

¹³ Ɛŋu mi dëë la̱r ji̱, kä dëë pa̱a̱r kɛ ji̱ lö Jɛ-ru-tha-lɛm? Ɛŋu mi dee lɔcdu jak kä gɔaa lö nya Dha-yɔn? Kä buɔ̱tdu cɛ di̱t ce̱tdɛ nikɛ bäpdiit, thilɛ ram mi bi ji̱ luäŋ kɛ luäk.

¹⁴ Nën göökniku ɛ kac thilɛ jɛ luɔt, /ka̱n dueerku lat raar tin jakɛ ji̱ kä pɛ̈c. Ca la̱t ni ji̱ nyuuthni kacä tin kua ji̱ lɛ bath.

¹⁵ Kä nɛy diaal tin ci wä kɛ duɔ̱ɔ̱p Jɛ-ru-tha-lɛm, pa̱tkɛ jɛ tet kɛ da̱kdɛ. Kä tiŋ kɛn wuɔ̱thkiɛn kä dɔalkɛ jɛ wä kɛ i̱, “Ɛn nɛmɛ ɛ jɛn wec in cɔalkɛ i̱ nhɔakɛ, min la gɔɔy wec muɔ̱ɔ̱n?”

¹⁶ Ci ji̱ tɛ̈ru diaal rɔ̱ riet ji̱ yɔaŋkɛ ji̱ kä duɔ̱th kɛ ji̱ duɔɔth wä kɛ i̱, “Cakɔ jɛ däk! Nɛmɛ ɛ jɛn cäŋ ëë liɛpkɔ, cakɔ tëk, a cakɔ jɛ nɛn!”

¹⁷ Ci Kuoth Nhial mëë cɛ car la̱t, cɛ ruacdɛ cuɔ̱p, mëë cɛ lat ni wal, cɛ yɛ yiäk a thil nhök. Cɛ ji̱ tɛ̈run la̱th wi̱i̱dun, cɛ kɛ ka̱m liak kɛnɛ buɔ̱m.

¹⁸ A lo̱ckun palkɛ Kuäär ni Kuoth! Lö Jɛ-ru-tha-lɛm! A merku lo̱ny ce̱tnikɛ kir kɛ cäŋdäär kɛnɛ wäär! A puɔ̱nydu cuc kɛ wiee!

¹⁹ Jiɛc rɔ kä wieeni kɛ wäär nikɛ gua̱a̱th in took ga̱a̱ŋ wa̱r ɛ ni guec! Kämni lɔcdu raar kɛɛliw ce̱tkɛ pi̱w nhiam Kua̱r ni Kuoth! Täri jɛ tetku, kɛ kui̱ teekä ganku, tin ci cuuc kɛ buɔth duɔ̱pni diaal.

²⁰ Guicɛ lö Kuoth Nhial! Kɛ ŋaani ciɛŋi i̱ nɔ tɔ̱? A bi män ku cam ni gaatkiɛn tin ca rɔm? Kä ba bo̱o̱th palä kɛnɛ gök ku näk rɛy luaak Kua̱r ni Kuoth?

²¹ Ŋuɛ̈tni kɛ dɔŋ cikɛ li̱w duɔ̱pni. Ŋuɛ̈tni wutnikä kɛnɛ nyier cakɛ näk kɛ thɛp. Cikɛ näk kɛ cäŋ gaakdu, cikɛ näk a thil pälikä.

²² Ci ɣä ciöl ji̱ tɛ̈rä tuɔ̱ŋni diaal, ce̱tkɛ nɛy ti cɔɔli kɛ cäŋ ŋarä. Kɛ cäŋ gaak Kuɔth Nhial, cuɛ thil ram mi cu rɔ bar kiɛ cu tëk. Kɛn nɛy tëë cä rɔm kä cä pith, cakɛ thuk ɛ gua̱n tɛ̈rä.