Jiɛth 1 - RUAC KUƆTH IN RƐL RƆ

Jiath lɔaac Jɛ-ru-tha-lɛm

¹ Ɛŋu ci Jɛ-ru-tha-lɛm ku duɔth nikä rɔa i̱ nɛmɛ, ɛn wec in ci thia̱ŋ kɛ naath! Jɛn ce̱tdɛ nikɛ ciek jɔkä mi ca kɔŋ luɔ̱th! Mi ci kɔŋ ruëc kä täämɛ ruackɛ jɛ ni go̱lä ala kuany.

² Cɛ wiee ɛlɔ̱ŋ kɛ wäär, a te mer ni waaŋdɛ. Kä thilɛ ram mi ci lɔcdɛ jak kä tɛth rɛy mäthnikɛ. Ca kɔak ni jɛ ɛ mäthnikɛ diaal, kä ci ka ji̱ tɛ̈rɛ.

³ Kä kɛ ciaŋ mi jiäk kɛ la̱t mi bɛc bɛc, ca Juda naŋ ɛla pɛ̈c. Ɛn täämɛ cieŋɛ rɛy dööri, kä thilɛ jɛ gua̱a̱th. Ca jɛ göl däär ɛ ji̱ tɛ̈rɛ, kä thilɛ gua̱a̱th mi lenyɛ rɔ thi̱n.

⁴ Kä duɔ̱p Dha-yɔn pärkɛ, kɛ ɣöö thilɛ nɛy ti bëë palä kɛ cäŋ lɔ̱ŋä. Kä thuk rɛ̈knikɛ diaal tekɛ lɔrä, ku bööth palädɛ lɛ ruac ca̱a̱r. Kä ci nyieekɛ lɔcdiɛn jiath, kä jɛn puɔ̱nydɛ cɛ cuuc ɛlɔ̱ŋ.

⁵ Kä ci te ni ji̱ tɛ̈rɛ kɛ buɔ̱m, kɛ ɣöö ci Kuoth Nhial jɛ jak kä cuc, kɛ ŋuan dueerikɛ. Ca gaatkɛ naŋ ala pɛ̈ɛ̈c ɛ ji̱ tɛ̈rɛ.

⁶ Kä ci ria̱ŋ Dha-yɔn jiɛɛn kɛɛliw. Ci bööthkɛ diaal ce̱tnikɛ thi̱i̱l ti thil wal, ti barkɛ rɔ̱ nhiam raam mi jooc kɛ.

⁷ Kä cu Jɛ-ru-tha-lɛm nyinkɛ, diaal tëë wal tim kɛ ni̱n rikädɛ kɛnɛ ni̱n cucädɛ, mëë ci nɛɛkɛ pɛn tetni ji̱ tɛ̈rɛ, kä thilɛ ram mi luäk jɛ. Kä cua jɛ dɔl ɛ ji̱ tɛ̈rɛ, kɛ kui̱ däkädɛ.

⁸ Jɛ-ru-tha-lɛm cɛ duer mi di̱i̱t la̱t, kɛ kui̱c ɛmɔ cɛ jiääk. Kä ca lo̱k ɛ nɛy diaal tëë luɔ̱thkɛ jɛ, kɛ ɣöö ca ŋa̱c ɛn ɣöö thilɛ ram mi luäk jɛ. Kä jɛn puɔ̱nydɛ cɛ nuään a cɛ wi̱cdɛ riet ni dɔɔr.

⁹ Kä cua jiääkdɛ nɛn, kä /kenɛ ca̱r kɛ kui̱ däkädɛ. Kɛ kui̱c ɛmɔ cuɛ da̱k ɛlɔ̱ŋ, kä thilɛ ram mi dee lɔcdɛ jak kä gɔaa. “Ɣa Kuoth Nhial nɛn riɛkdä, kɛ ɣöö ci ji̱ tɛ̈rä ɣä joc!”

¹⁰ Kä ca kuakɛ diaal tin gɔw ka̱n ɛ ji̱ tɛ̈rɛ. Kä cuɛ nɛy ti thil Kuoth nɛn wäkɛ luaak Kuɔthdɛ, guäth in ci Kuoth Nhial jɛ yac ɛn ɣöö cikɛ bi wä thi̱n.

¹¹ Ci ji̱kɛ diaal nuään kɛ go̱r kä mi camkɛ, kɔk kɛn kuakiɛn mi̱eth, kɛ ɣöö bikɛ tëk. “Guicä lö Kuoth Nhial, ca ɣä lo̱k.”

¹² “Ɛn nɛmɛ thilɛ mi lotdɛ kä yɛn nɛy ti jäl tɔ̱? Mëtdɛ jɛ guic bɛ, mi tëë kɛ ram mi ci cuuc ce̱tkɛ cuɔ̱c, rikä mi tekɛ ɣä mi, kɛ cäŋ gaak Kuɔth?

¹³ “Cɛ mac ja̱k ni nhial, cɛ räth ni rɛy cɔ̱ɔ̱nikä. Kä cɛ cambak yuɔr ciöknikä, kä cɛ ɣä luɔ̱c jɔk. Cɛ ɣä ba̱ny piny baaŋ, rɛy bɛcä mi thil pek.

¹⁴ “Kä guicɛ dueerkä, kä cɛ kɛ ruɔl guäth kɛl, kä cuɛ kɛ la̱th ŋuääkdä, kä cuɛ buɔ̱mdä cu jak kä thil. Ci Kuäär ni Kuoth ɣä ka̱m ji̱ tɛ̈rä, tin thilɛ mi dëë luäŋ kä kɛ.

¹⁵ “Ci Kuäär ni Kuoth ji̱ rɛ̈mdä diaal lo̱k, kä cuɛ cio̱li ɣä rɛm ti ba ŋuɛ̈tnikä ben näk. Cuɛ nɛɛkä nor ce̱tnikɛ bɛl ti gua̱rkɛ ɣän nya Juda.

¹⁶ “Kɛ kui̱c ɛmɔ cua̱ wiee, a bi wäŋkä thia̱ŋ kɛ mer. Kɛ ɣöö thilɛ ram mi thia̱k, mi dee lɔcdä jak kä gɔaa, mi dee ɣä com kɛ ɣöö dëë buɔ̱m. Ci gaatkä ria̱r kɛ ɣöö ca ɣä puɔ̱t ɛ gua̱n tɛ̈r.”

¹⁷ Dha-yɔn cɛ tetkɛ riny, duuŋdɛ ɣöö cuɛ thil ram mi cu jɛ luäk. Kɛ ɣöö ci Kuoth Nhial jɛ lar ɛn ɣöö bi ji̱ thieekä Je-kɔb a ji̱ tɛ̈rɛ. Cu Jɛ-ru-tha-lɛm a mi jiääk rɛydiɛn.

¹⁸ “Te Kuoth Nhial kɛ cuɔ̱ɔ̱ŋ, kɛ ɣöö cä ruacdɛ lo̱k. Kä liɛŋɛ jɛ yɛn nɛy diaal, guɛcɛ cuɔ̱cdä. Ca ŋuɛ̈tni wutni kä kɛnɛ nyieekä naŋ ala pɛ̈ɛ̈c.

¹⁹ “Kä cua̱ mäthnikä cɔl, duuŋdɛ ɣöö cukɛ mɛ̈t ni ɣä. A ci bööth palädä kɛnɛ di̱t li̱w rɛy wec, kɛ go̱r mi̱eth mi dee kɛ bum.

²⁰ “Kä nɛnɛ Kuoth Nhial ta̱a̱kɛ riɛk, ŋɛɛrɛ jicdä, kä lɔcdä jiɛthɛ rɛydä, kɛ ɣöö cä duer mi di̱i̱t la̱t. Na̱kɛ naath duɔ̱pni, kä li̱w naath rɛy duëli.

²¹ “Liŋ naath ŋëpdä, duuŋdɛ ɣöö thilɛ ram mi jak lɔcdä kä gɔaa. Ji̱ tɛ̈rä diaal ca riɛkdä liŋ, kulɛ tɛɛth ni lo̱ckiɛn kɛ min ci lät kä ɣä. No̱o̱ŋni cäŋ ëë ci lar, a bikɛ lɛ cuuc ce̱tkɛ ɣä.

²² “Lat dueerkiɛn diaal nhiamdu, kä duäckɛ ce̱tkɛ min ci ɣä duäc, kɛ kui̱ dueerikä diaal. Kɛ ɣöö cä ŋëp ɛlɔ̱ŋ kä jiɛth lɔcdä.”