Jɔ̱ɔ̱n 5 - RUAC KUƆTH IN RƐL RƆ

Tëk ran kɛ puul Beth-dha-tha

¹ Kɛ kɔr kä nɔmɔ cuɛ tekɛ gua̱a̱th ti̱mä ji̱ Juudh, kä cu Yecu wä kä Jɛ-ru-tha-lɛm.

² Täämɛ, kä Jɛ-ru-tha-lɛm tëë kɛ pul mi thiek kɛ Thok Deet mi cɔali Beth-dha-tha kɛ thok ji̱ Ɣi-bɛ-ru, kä tëë kɛ ba̱ŋni da̱ŋ dhieec.

³ Ɛn gua̱a̱th ɛmɔ tɔ̱ɔ̱c ji̱ jua̱thni ti ŋuan thi̱n, ciöör, kɛ dua̱nyni kɛnɛ tin cɛ nuäŋ. [Kä liɛpkɛ ni wa̱l pi̱i̱ni,

⁴ kɛ ɣöö tha̱a̱ŋ gua̱thni la wä jääk Kuɔth nhial rɛy puɔl, kä la jakɛ pi̱ kä wa̱l. Kä ram mɔ ci kɔŋ wä rɛy pi̱i̱ni mɔ la gɔaa puɔ̱nydɛ kä liaw in tekɛ jɛ.]

⁵ Te ram kɛl piny thi̱n mi ci tekɛ liaw kɛ run ti jiɛn diɔ̱k wi̱cdɛ bädäk.

⁶ Mëë ci Yecu jɛ nɛn, kä cuɛ ŋa̱c i̱ cɛ jääny ɛlɔ̱ŋ, cuɛ jɛ jiök i̱, “Go̱o̱ri ɣöö ba ji̱ jakä gɔaa?”

⁷ Wut ëë tekɛ juey, cuɛ wee i̱, “Kuäär, thilɛ ram mi naŋ ɣä rɛy puɔ̱ɔ̱l, mi ci pi̱ rɔ̱ wa̱l, kä min ŋuɔtdä a wa̱a̱ bi radɔ̱diɛn ɣä cu dhɔ̱ŋ.”

⁸ Cu Yecu jɛ jiök i̱, “Jiɛc rɔ, käni ko̱lu, kä jäli.”

⁹ Kä ni ɛ ɛn täämɛ cu puɔ̱ny wutdä indaan gɔaa, cuɛ ko̱lɛ ka̱n, kä cuɛ ja̱l. Täämɛ, cuɛ la cäŋ lɔ̱ŋä ji̱ Juudh.

¹⁰ Kä cu ji̱ Juudh wut ëë cɛ puɔ̱nydɛ jakä gɔaa jiök i̱, “Wa̱lɛ ɛ cäŋ lɔ̱ŋä, /cɛ rɔ lot kɛ ciaŋ ŋuɔ̱tni Muthɛ ɛn ɣöö bi ko̱lu kap.”

¹¹ Kä cuɛ kɛ loc i̱, “Cu ram in teek ɣä, ɣä jiök i̱, ‘Käni ko̱lu, kä wër.’ ”

¹² Kä cukɛ jɛ thiec i̱, “Ɛŋa jio̱k ji̱ mɔ i̱, ‘Kap ko̱lu, kä wër jäli’?”

¹³ Täämɛ, ram in ci puɔ̱nydɛ gɔaa kui̱cɛ ram in teek jɛ, kɛ ɣöö ci Yecu jiɛɛn, kɛ ɣöö te buɔ̱n mi di̱i̱t ɛn guäth ɛmɔ.

¹⁴ Kɛ kɔrɛ cu Yecu wut indaan jek rɛy luaak Kuɔth in di̱i̱t, kä cuɛ jɛ jiök i̱, “Nɛnɛ, ci puɔ̱nydu pual! /Cu duer nyɔk, kɛ ɣöö bi thil mi jiäk mi bi tuɔɔk kä ji̱.”

¹⁵ Cu wut indaan wä, kä cuɛ wä la̱r ji̱ Juudh ɛn ɣöö ɛ Yecu ɛn nëë ci puɔ̱nydɛ jakä gɔaa.

¹⁶ Kä ɛ jɛn kui̱ kä mɛmɛ ɛn nëë cu ji̱ Juudh Yecu moc riɛk, kɛ ɣöö lätdɛ lät ti ce̱tkɛ mɛmɛ kɛ cäŋ lɔ̱ŋädiɛn.

¹⁷ Kä cu Yecu jɛ luɔ̱c kɛ i̱, “Lät Gua̱a̱r amäni täämɛ, kä la̱tdä bä.”

¹⁸ Kä ɛ jɛn kɛ kui̱ kä mɛmɛ, cu ji̱ Juudh näk Yecu go̱r ɛlɔ̱ŋ, /ci mɔ a ɣöö cuɛ ciaŋ ca̱ŋ lɔ̱ŋä ya̱r kärɔa, kä ɛ ɣöö cɔlɛ Kuoth ala Gua̱n, kä päärɛ rɔɔdɛ kɛ Kuoth.

Lua̱ŋ gatdä Kuɔth

¹⁹ Cu Yecu kɛ jiök i̱, “Ɛpuc, ɛpuc, ɣän la̱rä jɛ yɛ, thilɛ mi dee Gat Kuɔth ɛ luäŋ kɛ lätni jɛn kärɔaadɛ, ɛ ni min cɛ nɛn ɛ lät Gua̱n ɛ, kɛ ɣöö mi lät Gua̱n ɛ, ɛ jɛn min lät Gatdɛ bä.

²⁰ Kɛ ɣöö nhɔk Gua̱n in te nhial Gatdɛ, kä nyuthɛ jɛ tin diaal tin lätdɛ. Kä bɛ lät tin di̱t ni kɛn kä lät ti̱ti̱ nyuɔ̱th jɛ kä bi yɛn ga̱a̱c ɛlɔ̱ŋ.

²¹ Kä ce̱tkɛ min la jiɛɛc Gua̱a̱r in te nhial nɛy ti ci li̱w li̱th kä kämɛ kɛ tëk, bi Gatdɛ ram min nhɔkɛ ka̱m tëk bä.

²² Thilɛ ram kɛl mi luk Gua̱a̱r in te nhial ɛ, cɛ lua̱ŋ luɔ̱k kɛɛliw ka̱m Gatdɛ,

²³ ɛ ɣöö dee nɛy diaal Gat Kuɔth luɔ̱th, ce̱tkɛ min luɔ̱thkɛ Gua̱n. Jɛn mi /ci Gat Kuɔth luth, thilɛ jɛ luth kɛ Gua̱n ëë jäk jɛ.

²⁴ Ɛpuc, ɛpuc ɣän la̱rä jɛ yɛ, ram mi liŋ ruacdä kä ŋääthɛ ram ëë jäk ɣä tëëkɛ tëk mi do̱raar, /ca jɛ bi luk, cɛ lia̱a̱ bäl, a cɛ cop teekä.

²⁵ “Ɛpuc, ɛpuc, ɣän la̱rä jɛ yɛ, gua̱a̱th a bëëni, kä cɛ cop, mi bi nɛy ti ci li̱w jɔw Gatdä Kuɔth liŋ. Kä bi nɛy tin ca jɛ liŋ rɔ̱ jiɛc li̱th.

²⁶ Kɛ ɣöö ce̱tkɛ min te Gua̱a̱r in te nhial kɛ tëk puɔ̱nydɛ pa̱ny, cuɛ Gatdɛ ka̱m gua̱a̱th bä i̱ bɛ tekɛ tëk kärɔa.

²⁷ Cuɛ jɛ ka̱m lua̱ŋ i̱ bɛ naath luk, kɛ ɣöö ɛ jɛn Gat Ran.

²⁸ /Cuarɛ ga̱a̱c kɛ nɛmɛ, kɛ ɣöö gua̱a̱th a bëëni mi bi nɛy diaal ti ca kony jɔwdɛ liŋ,

²⁹ kä bikɛ rɔ̱ jiɛc kä tëkɛ, nɛy tin ca ti gɔw la̱t bikɛ rɔ̱ jiɛc kä tëkɛ, kä kɛn tin ca jiäk la̱t bikɛ rɔ̱ jiac luɔ̱k in di̱i̱t.”

Ruac nenä kɛ kui̱ Yecu

³⁰ “Thilɛ ŋu mi dëë la̱t kɛ lua̱ŋdä. Ɣän luɔ̱kä kɛ min cä liŋ, kä lukdä ɛ cuɔ̱ɔ̱ŋ, kɛ ɣöö /cä go̱r ni liakdä. Göörä ni ruac raam ëë jäk ɣä.

³¹ “Mi latdä ni ruac nenädä kärɔa, /ci ruac nenädä a thuɔ̱k.

³² Tëë ram mi dɔ̱diɛn mi lat nën kɛ kui̱dä, kä ŋa̱cä jɛ, i̱ ruac nenädɛ kɛ kui̱dä ɛ thuɔ̱k.

³³ Cia naath jäkä Jɔ̱ɔ̱n, kä cuɛ ruac nenä lat kɛ kui̱ thukä.

³⁴ /Ciɛ ɣöö nhɔakä ni nën ɛ lat raan ɛ mɛ kɛ kui̱dä, ɣän latdä ti̱ti̱, kɛ ɣöö dee yɛn kään.

³⁵ Ɛ jɛn lɛmbär in pɛt kä mɛrɛ gua̱a̱thdɛ, kä cia nhɔk ɛn ɣöö bi lo̱ckun tɛth lɛɛr ɔ rɛy buɔyädɛ.

³⁶ Duundɛ ɣöö ta̱a̱ kɛ nën mi di̱t ni jɛn kä nën in tekɛ Jɔ̱ɔ̱n. Kä la̱t in ci Gua̱a̱r ɛ ka̱m ɣä i̱ bä la̱t, kɛ kɛn lät ti la̱tdä ti pa̱ny, kä nyooth kɛn ɣöö ɛ Gua̱a̱r ɛn nɔ jäk ɣä mɔ.

³⁷ Kä cu Gua̱a̱r puɔ̱nydɛ mëë jäk ɣä nën lat kɛ kui̱dä. /Ken yɛn jɔwdɛ met liŋ, kä /ken yɛn puɔ̱nydɛ met nɛn,

³⁸ kä /ci ruacdɛ te rɛydun, kɛ ɣöö /ci yɛn ram min cɛ ja̱k, ŋäth.

³⁹ “Go̱o̱rɛ yɛn Ruac Kuɔth in Rɛl Rɔ, kɛ ɣöö caar yɛn ɛ i̱ rɛydɛ te yɛn kɛ tëk mi do̱raar, kä kɛ jɛn min lat ruac nenä kɛ kui̱dä.

⁴⁰ Kä lökɛ ɣöö bia ben kä ɣä, kɛ ɣöö bia tëk jek.

⁴¹ Ɣän /cä liak go̱r kä naath.

⁴² Kä ŋa̱cä jɛ ɛn ɣöö cia thil nhök Kuɔth rɛydun.

⁴³ Ɣän ba̱a̱ kɛ ciöt Gua̱a̱r, kä /ci yɛn ɣä nhɔk. Kä mi bä radɔ̱diɛn kɛ ciötdɛ kärɔa, kä la nhɔk yɛn jɛ.

⁴⁴ Kä dee yɛn tekɛ ŋa̱th i̱di, mi nhɔk yɛn liak kä rɔ̱, kä /ci yɛn liak in bëë kä Kuoth nhɔk?

⁴⁵ /Cuarɛ jɛ car i̱ bä yɛ gɔany nhiam Gua̱a̱r. Ɛ Muthɛ min ŋa̱thɛ, ɛn nɔ gɔɔny yɛ mɔ.

⁴⁶ Mi ŋääth yɛn Muthɛ, dee yɛn ɣä ŋäth bä, kɛ ɣöö cɛ gɔ̱a̱r kɛ kui̱dä.

⁴⁷ Kä mi /ci yɛn ruac in cɛ gɔ̱r ŋäth, dee yɛn ruac in latdä kulɛ ŋäth i̱di?”