Jɔ̱ɔ̱n 3 - RUAC KUƆTH IN RƐL RƆ

Yecu kɛnɛ Ni-kɔ-di̱i̱-mäth

¹ Mëëdan tëëkɛ raan ji̱ Pa-ri-thii mi cɔal i̱ Ni-kɔ-di̱i̱-mäth mi la kuäär ji̱ Juudh.

² Cuɛ ben kä Yecu kɛ wäär, cuɛ wee i̱, “Ŋi̱i̱c, ŋa̱ckɔ jɛ ɛn ɣöö ɛ ji̱n ŋi̱i̱c mi bëë ni kä Kuoth, kɛ ɣöö thilɛ ram mi dee lätdi ga̱ykɛ naath ti lätdi ti la̱t, ɛ ni mi te Kuoth kɛɛl kɛ jɛ.”

³ Cu Yecu jɛ loc i̱, “Ɛpuc, ɛpuc ɣän la̱rä jɛ ji̱, mi /ca raan bi nyɔk kɛ di̱eth, /cɛ dee cop cieŋ kuäärä Kuɔth.”

⁴ Cu Ni-kɔ-di̱i̱-mäth jɛ jiök i̱, “Dëë raan lɛ nyɔk kɛ di̱eth i̱di kä cɛ kɔŋ di̱t? Derɛ rɔɔdɛ nyɔk kɛ loc jic man, a dëë lɛ nyɔk kɛ da̱p?”

⁵ Cu Yecu jɛ loc i̱, “Ɛpuc, ɛpuc ɣän la̱rä jɛ ji̱, mi /ka̱n raan di̱eth kɛ pi̱ kɛnɛ Yiëë, /cɛ dee wä cieŋ kuäärä Kuɔth.

⁶ Ram mi ca di̱eth kɛ ri̱ŋ ɛ jɛn ri̱ŋ, kä ram mi ca di̱eth kɛ Yiëë ɛ jɛn yiëë.

⁷ /Cu ga̱a̱c kɛ ɣöö cä wee i̱, ‘Ba yɛ dhil nyɔk kɛ di̱eth.’

⁸ Jiɔam la putdɛ kui̱c in go̱o̱rɛ, kä la liŋi wuɔ̱wdɛ, kä kui̱ci gua̱a̱th in bëë kɛ jɛ kä kui̱ci gua̱a̱th in wee kɛ jɛ. Tëë thi̱n inɔ kä nɛy diaal tin diëthkɛ kɛ Yiëë.”

⁹ Cu Ni-kɔ-di̱i̱-mäth jɛ loc i̱, “Dee ŋɔak tɔ̱tɔ̱ a thuɔ̱ɔ̱k i̱di?”

¹⁰ Cu Yecu ɛ luɔ̱c jɛ, “Ɛ ji̱n ŋi̱i̱c ji̱ I-thɛ-rɛl kä ŋotdi kui̱ci luɔt kä ti̱ti̱?

¹¹ “Ɛpuc, ɛpuc ɣän la̱rä jɛ ji̱, latkɔ ni min ŋa̱ckɔ, kä larkɔ ni min cakɔ nɛn, kä /ken yɛn nënda nhɔk.

¹² Mi cä yɛ la̱r nyin piɛny kä /ci yɛn kɛ ŋäth, dee yɛn nyin ciëŋ nhial kulɛ ŋäth i̱di, a cäŋ la̱tdä kɛ yɛ?

¹³ Thilɛ ram mi ci wä nhial, ɛ ni jɛn min bëë piny nhial, in la Gat Ran.

¹⁴ Kä ce̱tnikɛ mëë ci Muthɛ thɔ̱l kap nhial därdɔaar, inɔ bä, ba Gat Ran kap nhial ni

¹⁵ kɛ ɣöö ram mi wä jɛ ŋäth bɛ tekɛ tëk mi thil pek.

¹⁶ “Kɛ ɣöö nhɔk Kuoth nɛy diaal ɛlɔ̱ŋ, cuɛ Gatdɛ kɛl ni kärɔa muɔc, kɛ ɣöö ram mi wä jɛ ŋäth, /cɛ bi li̱w, bɛ tekɛ tëk mi thil pek.

¹⁷ “Kɛ ɣöö /ken Kuoth Gatdɛ jäkä piny kɛ ɣöö bɛ ɣɔw ben kuɛth ɛ ɣöö bi ɣɔw kään kɛ jɛ.

¹⁸ /Ca nɛy tin ŋääth jɛ kuɛth, kä nɛy tin /ca jɛ ŋäth cakɛ ku thuŋ kuɛ̈th li̱th, kɛ ɣöö /kenkɛ ciöt Gatdä Kuɔth in kɛl kärɔa ŋäth.

¹⁹ Kä mɛmɛ ɛ jɛn kuëth luɔ̱k, kɛ ɣöö ci buay ben rɛy ɣɔaa, kä cu naath nhɔk ni muth kä buay kɛ ɣöö jiäk lätkiɛn.

²⁰ Ram mi lät ti jiäk nyirɛ buay, kä /cɛ bä kä buay amäni mi dee lätkɛ yi̱k jɔɔc nhiam nath.

²¹ Kä nɛy tin la̱tkɛ thuɔ̱k bäkɛ kä buay, kɛ ɣöö dee lätkiɛn kɛ jɔɔc a gɔaa ɛn ɣöö lätkɛn kɛ nhiam Kuɔth.”

Yecu kɛnɛ Jɔ̱ɔ̱n in la lääk

²² Kɛ kɔr kä nɔmɔ cu Yecu kɛnɛ ji̱ kɔaarɛ wä ro̱o̱l Juda, cuɛ tekɛ kɛ kɛɛl, kä cuɛ naath lak.

²³ Kä Jɔ̱ɔ̱n bä, lakɛ naath kä I-non mi thieek kɛ Tha-lim kɛ ɣöö ŋuani pi̱kɛ ɛn wani mi, cu naath ben, kä cuakɛ lak.

²⁴ Kɛ ɣöö ŋot Jɔ̱ɔ̱n /ka̱nɛ ni yiɛn.

²⁵ Cu ŋaknɔm cu tuɔɔk kam ji̱ kɔaar Jɔ̱ɔ̱n kɛ raan ji̱ Juudh kɛ kui̱ ciɛŋä gɔɔyädiɛn.

²⁶ Cukɛ ben kä Jɔ̱ɔ̱n, kä cukɛ wee i̱, “Ŋi̱i̱c, jɛn ram indaan, mëë tekɛ ji̱ kɛɛl kui̱c Jɔr-dɛn, kä ci ruac lat kɛ kui̱dɛ, jɛn ɛn lakɛ naath, kä wä nɛy diaal kä jɛ.”

²⁷ Cu Jɔ̱ɔ̱n ɛ loc, “Thilɛ mi dee raan ɛ jek, ɛ ni mi ca ka̱m jɛ ni nhial.

²⁸ Yɛn pua̱nykun kɛ yɛn nëënkä, mëë cä wee i̱, ‘/Ciɛ ɣän Kritho, duundɛ ɣöö ca ɣä jäk kä nhiamdɛ.’

²⁹ Ram mi tekɛ kaw ɛ jɛn cɔ nyaal. Määth cɔa nyaal min te cuŋä kä liŋɛ jɔwdɛ, tɛth lɔcdɛ ɛlɔ̱ŋ kɛ jɔw cɔa nyaal. Kɛ kui̱c ɛmɔ täämɛ, ci tɛ̈th lɔaacdä ɛmɛ ro̱ŋ.

³⁰ Jɛn bɛ dhil di̱t, kä bä lɛ kuɛ̈ɛ̈.”

Jɛn Ram mi bëë nhial

³¹ Ram mi bëë nhial di̱t ni jɛn kä ti diaal. Kä jɛn min la raan piɛny, ɛ raan muɔ̱ɔ̱n, kä ruacɛ kɛ nyin wec muɔ̱ɔ̱n. Jɛn min bëë cieŋ nhial lenyɛ ti diaal.

³² Jɛn latdɛ ruacdɛ kɛ min cɛ nɛn kä cɛ liŋ, kä thilɛ ram min ci nëndɛ nhɔk.

³³ Ram mi wä nëndɛ nhɔk latdɛ jɛ kɛ pek lɔaacdɛ ɛn ɣöö Kuoth ɛ thuɔ̱k.

³⁴ Kä jɛn ram in ci Kuoth ɛ ja̱k, lätdɛ ruac Kuɔth kɛ ɣöö käm Kuoth jɛ Yiëë kɛɛliw a thil pek.

³⁵ Kɛ ɣöö nhɔk Gua̱a̱r in te nhial Gatdɛ, cɛ ŋɔak diaal kuëŋ tetädɛ.

³⁶ Ram mi ŋääth Gat Kuɔth tëëkɛ tëk mi thil pek kä ram mi lo̱k ruac Gatdä Kuɔth /cɛ tëk bi nɛn te waŋ lɔaac Kuɔth kɛ jɛ.