Jɔ̱ɔ̱n 21 - RUAC KUƆTH IN RƐL RƆ

Nyuth Yecu rɔ jaak da̱ŋ bärɔw

¹ Kɛ kɔr kä mɛmɛ cu Yecu rɔ lɛni nyuɔ̱th ji̱ kɔaarɛ Baar Tay-bi̱i̱-riath kɛ duɔ̱ɔ̱p ɛmɛ,

² te Thay-mɔn Pi-tɔr, kɛ Tɔ-mäth min cɔalkɛ i̱ Cuɛ̈k, kɛ Na-than-el mi la raan Keena, ro̱o̱l Gɛ̈-lɛ-li, kɛ gaat Dhɛ-ba-dii, amäni jaak da̱ŋ rɛw kɔ̱kiɛn kɛɛl.

³ Cu Thay-mɔn Pi-tɔr kɛ jiök i̱, “Ɣän wa̱a̱ dɛɛp kɛ rɛc.” Cu kɛn ɛ jiök i̱, “Banɛ wä kɛɛl.” Cukɛ wä rɛy murkäbä, kä thilɛ mi cikɛn ɛ käp kɛ jɛn wäär ɛmɔ.

⁴ Bakä ɣɔaa cu Yecu cuɔ̱ŋ thok baar, kä /ken jaakɛ jɛ ŋic ɛn ɣöö ɛ jɛn Yecu.

⁵ Cu Yecu kɛ jiök i̱, “Dho̱li, ta̱yɛ kɛ rɛc?” Cukɛ jɛ loc i̱, “Ëëy.”

⁶ Cuɛ kɛ jiök i̱, “Luayɛ cambak yieer kui̱c cuëëc murkäbä, kä bia ŋɔak jek.” Cukɛ jɛ luay yieer, kä ni ɛn guäth ɛmɔ, /kenkɛ jɛ luäŋ kɛ luay rɛy murkäbä, kɛ ɣöö ŋuan rɛc ɛlɔ̱ŋ.

⁷ Cu jak in nhɔk Yecu jɛ Pi-tɔr jiök i̱, “Ɛ jɛn Kuäär.” Mëë ci Thay-mɔn Pi-tɔr ɛ liŋ i̱ ɛ jɛn Kuäär, cuɛ bi̱i̱dɛ la̱th, kɛ ɣöö tëë juutdä, kä cuɛ rɔ yuɔr rɛy baar.

⁸ Cu jaak tin kɔ̱kiɛn ben kɛ murkäb kä yɔ̱a̱ckɛ cambak mi ci thia̱ŋ kɛ rɛc, kɛ ɣöö /cikɛ nɔ̱a̱n kɛ rar, kä ɛ kam mi tekɛ mi̱ti̱ri ti kuɔ̱r.

⁹ Mëë cikɛ ben thok waath cukɛ mac miim nɛn ɛn wi̱ni, kä te rɛc wi̱i̱dɛ kɛnɛ juray.

¹⁰ Cu Yecu kɛ jiök i̱, “Nööŋɛ tha̱a̱ŋ rɛc tin pay käp.”

¹¹ Cu Pi-tɔr wä rɛy murkäbä, kä cuɛ cambak yɔ̱a̱c thok waath raar, kä cɛ thia̱a̱ŋ ɛliŋ kɛ rɛc ti kuɔ̱r wi̱cdɛ jiɛn dhieec wi̱cdɛ diɔ̱k ti di̱t. Kä cäŋɛ ni mëë ŋuankɛ, /kenkɛ cambak rɛt.

¹² Kä cu Yecu kɛ jiök i̱, “Bia, mi̱ethɛ.” Kä cuɛ thil jak mi ci rɔ jut kɛ ɣöö bɛ jɛ thiec i̱, “Ɛ ji̱n ŋa?” Ŋäc kɛn ɛ i̱ ɛ jɛn Kuäär.

¹³ Cu Yecu kɛ ben ka̱m juray amäni rɛc.

¹⁴ Ɛ jɛn gua̱a̱th in diɔ̱ɔ̱kdiɛn mëë ci Yecu jɔɔc nhiam ji̱ kɔaarɛ kɛ kɔr kä mëë ca jɛ jiɛc li̱th.

Loc Pi-tɔr nho̱kä Yecu

¹⁵ Mëë cikɛ thuɔ̱k kɛ mi̱eth, cu Yecu Thay-mɔn Pi-tɔr thiec i̱, “Thay-mɔn, gat Jɔ̱ɔ̱n, nhɔki ɣä kɛ nhök mi leny nhök nɛɛni ti̱ti̱?” Cuɛ jɛ loc i̱, “Ɣɔ̱ɔ̱n, Kuäär, ŋäci jɛ ɛn ɣöö nhɔakä ji̱.” Cuɛ jɛ jiök i̱, “Mi̱i̱thni dɛy deetkä.”

¹⁶ Cuɛ jɛ lɛni thiec kɛ thiec in rɛwdɛ i̱, “Thay-mɔn gat Jɔ̱ɔ̱n, Nhɔki ɣä?” Cuɛ jɛ loc i̱, “Ɣɔ̱ɔ̱n, Kuäär, ŋäci jɛ ɛn ɣöö nhɔakä ji̱.” Cuɛ jɛ jiök i̱, “Yien detkä.”

¹⁷ Kä cuɛ jɛ thiec kɛ thiec in diɔ̱ɔ̱kdiɛn i̱, “Thay-mɔn, gat Jɔ̱ɔ̱n, nhɔki ɣä?” Cu lɔc Pi-tɔr cu jiath, kɛ ɣöö cuɛ jɛ thiec kɛ thiec in diɔ̱ɔ̱kdiɛn i̱, “Nhɔki ɣä?” Kä cuɛ jɛ loc i̱, “Kuäärä, ŋäci ti diaal, ŋäci ɣöö nhɔakä ji̱!” Cu Yecu jɛ jiök i̱, “Mi̱i̱thni detkä.

¹⁸ Ɛpuc, ɛpuc, ɣän la̱rä jɛ ji̱, mëë ŋotdi kɛ ŋuɛɛt la moci rɔ kɛ bieyni, kä bi wä ja̱l guäth ɛ go̱o̱ri mɔ. Kä mi wi̱i̱ wä di̱t, bi tetku riny, kä bi radɔ̱diɛn lɛ̈tdu yiɛn, kä bɛ ji̱ naŋ guäth mi /ci wä thi̱n go̱r.”

¹⁹ Cuɛ mɛmɛ lat, kɛ ɣöö bɛ lia̱a̱ in bi li̱w kɛ Pi-tɔr min bɛ Kuoth puany kɛ jɛ nyoth. Kɛ kɔr kä mɛmɛ cuɛ jɛ jiök i̱, “Guuri ɣä.”

Yecu kɛnɛ jak in nhɔkɛ

²⁰ Cu Pi-tɔr rɔ ri̱t, kä cuɛ jak in nhɔk Yecu jɛ nɛn guurɛ kɛ. Ɛ jɛn ram mëë thia̱k kɛ Yecu guäth mi̱eth thiaŋ ëëdan, kä thiec ɛ i̱, “Kuäär, ɛ jɛn ŋa bi ji̱ kɔak ɔ?”

²¹ Mëë ci Pi-tɔr jɛ nɛn, cuɛ Yecu jiök i̱, “Kuäär, ɛŋu bi tuɔɔk kä wut ɛmɔ ɔ?”

²² Cu Yecu jɛ jiök i̱, “Mi göörä jɛ i̱ bɛ ŋot amäni mi wa̱a̱ wä ben, bɛ lot ni ŋu kä ji̱? Guuri ni ɣä!”

²³ Cu thok däk rɛy nath ɛn ɣöö /ci jak ɛmɔ bi li̱w. Kä /ken Yecu jɛ lar i̱ /cɛ bi li̱w. Duundɛ ɣöö cɛ wee i̱, “Mi göörä jɛ i̱ bɛ ŋot amäni mi wa̱a̱ wä ben, bɛ lot ni ŋu kä ji̱?”

²⁴ Kä ɛ jɛn jak ɛmɛ ci ti̱ti̱ lat ɔ, kä cuɛ kɛ gɔ̱r, kä ŋäc kɔn ɛn ɣöö nëndɛ ɛ thuɔ̱k.

²⁵ Kä tëëkɛ lät ti ŋuan kɔ̱kiɛn ti ci Yecu kɛ la̱t. Kä mi ca kɛn diaal gɔ̱r kɛ̈l kɛ̈ɛ̈li, diɛɛwä jɛ /ci ɣɔw dee tekɛ gua̱a̱th mi dëë buɔkni tɔ̱tɔ̱ la̱th thi̱n.