Je-mɛth 4 - RUAC KUƆTH IN RƐL RƆ

Määth kɛ ɣɔw

¹ Ɛŋu mi no̱ŋ ko̱o̱ri, kä ɛŋu mi no̱ŋ gak gaakni kamnikun? /Cikɛ no̱o̱ŋ di̱t lo̱cnikun kɛ ŋɔaani tin nyieeny rɛydun?

² Go̱o̱r yɛn ŋɔaani, kä thilɛ kɛ kä yɛ, inɔ näk yɛn naath. Kä go̱o̱r yɛn ŋɔaani, kä /cia kɛ jek, inɔ gak yɛn, kä lat yɛn ni ko̱o̱ri. Thilɛ min go̱o̱r yɛn ɛ, kɛ ɣöö /ken yɛn Kuoth thiec.

³ Thiëcɛ ŋɔaani kä /cia kɛ jek, kɛ ɣöö thiec yɛn kɛ duer, thiec yɛn ni tin tɛ̈thkɛ lo̱ckun.

⁴ Yɛn nɛy tin /ca ŋäth! /Ci yɛn ɛ ŋäc ɛn ɣöö maar kɛ ɣɔw lotdɛ ni ɣöö tɛri kɛ Kuoth? Kɛ kui̱ ɛmɔ ram mi go̱o̱r ɣöö ba määth ɣɔaa, jakɛ ni rɔɔdɛ kä gua̱n tɛ̈r kɛ Kuoth.

⁵ Kä carɛ jɛ ɛn ɣöö ɛ baŋ ɛn min ca gɔ̱r rɛy ruaacni Kuɔth i̱, “Jɛn yiëë in ci Kuoth ɛ jakä cieŋ rɛydan go̱o̱rɛ jɛ bi kɔn a nɛɛkɛ kärɔa?”

⁶ Kä Kuoth cɛ kɔn moc kɛ puɔ̱th min di̱t, kɛ kui̱ ɛmɔ cuɛ wee i̱, “Lo̱k Kuoth nɛy ti liakɛ rɔ, kä duundɛ ɣöö cɛ puɔ̱th ka̱m nɛy ti mua̱l mua̱a̱l.”

⁷ Kɛ kui̱ ɛmɔ lua̱rɛ rɔ̱ Kuoth. Kä cuɔ̱ŋɛ a bum kɛ gua̱n jiäkni, kä bɛ rɔ bar kä yɛ.

⁸ Thiëëkɛ rɔ̱ kä Kuoth, kä jɛn bɛ rɔ thiëëk kɛ yɛ. Lakɛ tetkun, yɛn ji̱ dueeri, kä jakɛ lo̱ckun kä gɔw, yɛn nɛy ti cär kä rɛɛw.

⁹ A lo̱ckun jiath kä pa̱rɛ kä rötdɛ. A to̱kdun la pa̱run, kä ɛ tɛ̈th lɔaacdun la bath lɔaacdun.

¹⁰ Jakɛ rɔ kä ma̱l ma̱a̱l nhiam Kua̱r, kä bɛ yɛ kap nhial.

Lui̱k kɛ kui̱ luɔ̱k Krith-cinä

¹¹ Dämaari kiɛ bɛ jɛ luk rɛy Kritho, /cuarɛ rɔ̱ lat jɔ̱ɔ̱r kamnikun. Ram mi wä mi jiääk lat kɛ kui̱ raadɔ̱diɛn, cɛ ruac a jiäk kɛ ŋut kä cɛ jɛ luk. Kä duundɛ ɣöö mi ci ŋut luk, ciɛ ji̱n läät ŋutdä, ɛ ji̱n luukdɛ.

¹² Tëëkɛ ram kɛl mi la gua̱n ŋuɔ̱tni kä gua̱n luɔ̱k. Ɛ jɛn ɛn in tekɛ lua̱ŋ kɛ ka̱n nath kiɛ däk nath. Kä ɛ ji̱n ŋa mɔ deri gua̱n thieekädu luk ɔ?

Lui̱k kɛ kui̱ liakä

¹³ Bia täämɛ, yɛn nɛy tin larkɛ jɛ i̱, “Ɛn walɛ kiɛ iruun banɛ wä cieŋ ɛmɛ kiɛ cieŋ ɛmi, kä banɛ te thi̱n kɛ ruɔ̱n kɛl, banɛ ŋɔaani wä kɔak kä banɛ yio̱w jek.”

¹⁴ Kä ŋotdɛ kui̱c yɛn min bi tuɔɔk iruun. Tëkdun ɛŋu? Ce̱t yɛn kɛ rur min la jɔc kɛ gua̱a̱th mi tɔt kä bɛ cu riaw.

¹⁵ Kä min dee yɛn ɛ lar dee yɛn wee i̱, “Mi nhɔk Kuäär ɛ, dɔ̱ŋ banɛ tëk banɛ nɛmɛ kiɛ ni mi wä la̱t.”

¹⁶ Kɛ ta̱a̱dun ɛmɔ lat yɛn ni liakdun kärɔ̱. Ɛn liak ɛmɔ kɛɛliw ɛ mi jiääk.

¹⁷ Inɔ ram mi ŋäc ɣöö derɛ cuɔ̱ɔ̱ŋ la̱t, kä /cɛ jɛ bi la̱t, ɛ duer kä jɛ.