Je-mɛth 3 - RUAC KUƆTH IN RƐL RƆ

Guɔ̱k lɛ̈p

¹ Dämaari, a nɛy ti ŋuan kä yɛ /ci a ŋi̱eec, kɛ ɣöö ŋa̱cɛ jɛ ɛn ɣöö ba kɔn nɛy tin ŋi̱eeckɛ naath luk a bum ɛlɔ̱ŋ.

² Kɛ ɣöö kɔn diaal la̱tnɛ dueer ti ŋuan. Kɛ ɣöö nɛy diaal tin /ca duer lät rɛy ruacdiɛn kɛ kɛn nɛy ti gɔaa a thil diw, kä tekɛ kɛ lua̱ŋ kɛ yiën pua̱nydiɛn kɛɛliw.

³ Mi la̱thnɛ gäk yieethä thukni jio̱o̱kni tuɔ̱ruɔ̱k kɛ ɣöö bikɛ kɔn luɔ̱th, ri̱tkɔn pua̱nykiɛn bä.

⁴ Kiɛ guɛcɛ murkäbni, a cäŋ ni min di̱tkɛ ɛlɔ̱ŋ, la lɔakɛ kɛ ɛ jiɔam ti buɔ̱m buɔ̱ɔ̱m, kä ŋotkɛ rietkɛ kɛ ɛ ri̱i̱tni ti tɔatni, guäth ɔ go̱o̱r geer ɛ mɔ kɛ lɔcdɛ.

⁵ Kä ɛnɔ bä kä lɛp jɛn ɛ cuɔ̱ŋ pua̱ny mi tɔt, kä liakɛ rɔ kɛ ti di̱t. Kua rup mi di̱t i̱di kua waŋ ɛ mac mi tɔt ɛ!

⁶ Ce̱t lɛp ran kɛ mac. Lɛp ca la̱th rɛy cuŋni pua̱a̱nydan ala ro̱l nyuɔɔni, jɛn jakɛ puɔ̱ny kɛɛliw kä bi tekɛ nyuɔɔn, jakɛ ciaŋ ran mi gɔaa kɛɛliw kä waŋɛ, kä waŋɛ jɛ kɛ mac mi bä ni jɔɔkni.

⁷ Dëë ley diaal, kɛnɛ diit diaal, kɛ muɔɔl piɛny kɛnɛ rɛc yiëër diaal jakä muɔ̱l, kä cakɛ muɔ̱l ɛ raan.

⁸ Kä thilɛ ram mi dee lɛp muɔ̱l, ɛ gua̱n jiäkni mi /ci cuc, kä cɛ thia̱a̱ŋ kɛ lueŋ li̱eth.

⁹ Kä kɛ lɛp liaknɛ Kuäär ni Yecu kɛnɛ Gua̱a̱r in te nhial, kä lamnɛ naath tin ca cak kɛ cät Kuɔth.

¹⁰ Kä kɛ jɛn thok ɔ kɛl ɔ bä puɔ̱th kɛnɛ lam raar thi̱n. Dämaari, /cɛ rɔ lot inɔ.

¹¹ Dee pi̱ ti gɔw kɛnɛ ti wac waac lo̱ny raar jiɛw ɔ kɛl ɔ?

¹² Dee jiath ŋɔa̱a̱p kuer kɛ dɛy Ɔ-lipä, dämaari, kiɛ dee buɔ̱c kuer kɛ dɛy ŋɔa̱a̱p? Ɛpuc, /ci pi̱ ti wac waac rɔ dee loc ni pi̱ ti gɔw.

Pɛl mi bä nhial

¹³ Ɛŋa mi pɛl mi jek luɔt ŋɔaani rɛydun? Nyuɔthɛ jɛ rɛy teekädun in gɔaa ɛn ɣöö lätkun la̱tdɛ kɛ kɛ gɔɔy rɛy pɛlä.

¹⁴ Kä mi ta̱yɛ kɛ tiɛɛl nyi̱ri kɛnɛ dääk nath rɛy lo̱cnikun, /cuarɛ rɔ liak thi̱n, kä /cuarɛ min la thuɔ̱k yär.

¹⁵ Pɛl ɛmɛ /ciɛ pɛl mi bä nhial, ɛ pɛl piɛny, mi /ci mɔ a duŋ yieekä, kä ɛ duŋ gua̱n jiäkni.

¹⁶ Kɛ ɣöö gua̱a̱th in te tiɛɛl thi̱n kɛnɛ dääk nath bɛ tekɛ nyuɔɔn kam nath kɛnɛ lät jiäkni diaal.

¹⁷ Kä pɛl in bëë nhial ɛ mi wic wic kɛ nhiam, kä tëëkɛ mal bä, gɔaaɛ, kä liŋɛ lui̱k, kä cɛ thia̱a̱ŋ kɛ kɔ̱a̱c lɔaac kɛnɛ lät ti gɔw, kä thilɛ jɛ li̱eny kiɛ mɛɛt.

¹⁸ Tekɛ gɔy cuŋni ti ba jek ɛ rëëc tëë ci pi̱eth kɛ mal.