Je-mɛth 2 - RUAC KUƆTH IN RƐL RƆ

Luek kɛ li̱eny nath

¹ Dämaari, ce̱tkɛ ji̱ ŋäthä rɛy Kua̱ran in buɔy ni Yecu Kritho, /cuarɛ jɛ car ɛn ɣöö tëëkɛ ram mi gɔaa ni jɛn kä ram in dɔ̱ŋ.

² Kɛ ɣöö, mi tëë wut mi tekɛ ciik yiɛtni ti da̱a̱pni kɛnɛ bieyni ti gɔw mi ci ben dolädun, kä ci wut mi can mi tekɛ bieyni ti ci lɔth ben bä,

³ kä mi bia luɔ̱th ni wut in tekɛ bieyni ti gɔw, a wä yɛn i̱, “Kɛ puɔ̱ny kɔ̱a̱cdu, nyuuri wi̱i̱ kɔam ɛmɛ,” kä jiökɛ ram in can i̱, “Cuŋni wi̱nɛ mi,” kiɛ “Nyuuri piny ciöknikä.”

⁴ Kä /ken yɛn rɔ̱ ku thuŋ koc kamnikun, kä ci yɛn a kua̱r luɔ̱k ti carkɛ ni ti jiäk?

⁵ Yɛn, dämaari ti nhɔakä, liɛŋɛ jɛ. /Ken Kuoth nɛy ti can wi̱i̱ muɔ̱ɔ̱n ɛmɛ mɛk kɛ ɣöö bikɛ ria̱ŋ kɛ ŋa̱th, kä bikɛ a dieel kuäärä min ci Kuoth ɛ lar i̱ bɛ ka̱m nɛy tin nhɔakɛ jɛ?

⁶ /Ken yɛn can luɔ̱th! /Cikɛ kɛn nɛy tin ria̱ŋ ria̱a̱ŋ kɛn tin ciaŋkɛ yɛ a jiäk? Kä /cikɛ kɛn tin yɔ̱a̱ckɛ yɛ luɔ̱ɔ̱kni tɔ̱?

⁷ /Cikɛ kɛn nɛy tin kuëthkɛ ciöt in gɔaa min cɔalkɛ ni yɛ?

⁸ Mi ka̱pɛ ciaŋ ŋuɔ̱t kua̱r kɛɛliw kɛ thuɔ̱k la̱tdɛ ni gɔɔy, ce̱tkɛ min ca gɔ̱r i̱, “Bi gua̱n thieekädu nhɔk, ce̱tkɛ min nhɔki rɔɔdu.”

⁹ Mi nyuɔthɛ jɛ ɛn ɣöö koc yɛn naath, lät yɛn ni duer, kä bi ŋut yɛ lat ɛn ɣöö lapɛ ji̱ dueeri.

¹⁰ Kɛ ɣöö ram mi kääp ŋuɔ̱t kɛɛliw, kä bɛ tekɛ kɛl mi bɛ ya̱r, cɛ ŋut to̱l kɛɛliw.

¹¹ Kä ɛ jɛn ram min ci jɛ lar i̱, “/Cu dho̱m,” cɛ jɛ lar bä i̱, “/Cu raan näk.” Mi /keni dhɔm, kä ci raan näk, ci ji̱n a gua̱n dui̱rä mi ci ŋuɔ̱t to̱l.

¹² Ruacɛ, kä la̱tdɛ ce̱tkɛ nɛy ti ba luk kɛ ciaŋ ŋuɔ̱t in jak naath kä lɔr.

¹³ Kɛ ɣöö bi luk thil kɔ̱a̱c lɔaac kɛ kui̱ raam mi /ken kɔ̱a̱c lɔaac nyoth, kä kɔ̱a̱c lɔaac tiamɛ luk piny.

Ŋa̱th kɛnɛ la̱t

¹⁴ Dämaari, bi gɔɔydɛ a ŋu, mi laar raan ɛ i̱ tëëkɛ ŋa̱th kä thilɛ jɛ la̱t? Dee ŋa̱th ɛmɔ jɛ kän?

¹⁵ Mi tëë dämuɔɔr kiɛ nyimuɔɔr mi te juutdä kä dak mi̱ethdɛ min camɛ ni ciaŋ,

¹⁶ kä bi ram kɛl kä yɛ kɛ jiök i̱, “Wër kɛ mal, kum rɔ kä riäŋ rɔ,” kä /ka̱n jɛ moc ŋɔaani kɛ kui̱ pua̱ny, bi gɔɔydɛ a ŋu?

¹⁷ Kä ɛnɔ ŋa̱th kärɔaadɛ mi thil la̱t cɛ li̱w.

¹⁸ Kä bi ram kɛl wee i̱, “Ji̱n ti̱i̱ kɛ ŋa̱th, kä ta̱a̱ kɛ lät.” Nyuthni ɣä ŋa̱thdu a /ci lätku te thi̱n, kä bä ji̱ nyuɔ̱th ŋa̱thdä kɛ lätkä.

¹⁹ Mi ŋääthi jɛ ɛn ɣöö Kuoth ɛ kɛl, ci lät agɔaa. A cäŋɛ ni kuth tin jiäk ŋääth kɛn ɛ, kä lathɛ kɛ kɛ dual.

²⁰ Ji̱n dɔ̱a̱r ɛmɛ, go̱o̱ri jɛ ɛn ɣöö ba ji̱ nyuɔ̱th ɣöö ŋa̱th mi thil la̱t ɛ baŋ?

²¹ /Ken A-bɛ-ram in la gua̱ndɔɔŋdan cuɔ̱ɔ̱ŋ jek kɛ kui̱ lätni, mëë cɛ gatdɛ ni Ay-dhɛk ka̱m Kuoth wi̱i̱ yi̱kä ala muc.

²² Nɛni jɛ bä ɛn ɣöö ci ŋa̱th lät ɛlɔ̱ŋ kɛnɛ lätkɛ kɛɛl, kä cu ŋa̱th cu a thuɔ̱k kɛ lät.

²³ Kä ŋäci jɛ ɛn ɣöö cu ruac Kuɔth in ca gɔ̱r a thuɔk, min wee i̱, “Ci A-bɛ-ram Kuoth ŋäth, kä cua jɛ nhɔk kä jɛ ala ciaŋ cuŋni,” kä cua jɛ cɔl i̱, “määth Kuɔth”.

²⁴ Nɛ̈nɛ jɛ ɛn ɣöö jek raan cuɔ̱ɔ̱ŋ kɛ kui̱ lätni a /ci mɔ a kɛ kui̱ ŋäthä kärɔa.

²⁵ Kä ɛnɔ bä, /ken Ra-ɣab min la ciek mi riär cuɔ̱ɔ̱ŋ jek kɛ kui̱ lätnikɛ, mëë cɛ ja̱a̱k nyuɔ̱ɔ̱r cieŋdɛ, kä cuɛ kɛ jakä wä kɛ duɔ̱ɔ̱p mi dɔ̱ŋ?

²⁶ Kɛ ɣöö ɛn nɔmɔ ce̱tdɛ kɛ puɔ̱ny mi thil yiëë mi ci li̱w, inɔ ŋa̱th mi thil lät ɛ mi ci li̱w bä.