I-yob 9 - RUAC KUƆTH IN RƐL RƆ

Luɔc I-yob

¹ Kä cu I-yob jɛ loc i̱,

² “Ɣän ŋa̱cä jɛ ɛn ɣöö ɛ thuɔ̱k pa̱ny. Kä dëë raan cuɔ̱ŋ jek i̱di nhiam Kuɔth?

³ Kä mi ci raan wee latdɛ tɛɛr kɛ jɛ, /ci raan kɛl dëë luäŋ kɛ luɔ̱c mi cɛ jɛ thiec nikä bathdɔɔr.

⁴ Jɛn Kuoth pɛlɛ kä bumɛ, thilɛ ram mi dëë cuɔ̱ŋ nhiamdɛ.

⁵ Woocɛ pääm gua̱thnikiɛn a kui̱c kɛn ɛ, kä la wulɛ kɛ mi cɛ gaak.

⁶ Kä la lathɛ piny, la lathɛ jɛ amäni cuut piɛny.

⁷ La penɛ cäŋ lɛ̈p kɛnɛ ciɛr.

⁸ Ɛ jɛn kärɔa cak nhial ɔ, kä ɛ jɛn jäl muaŋ yiëër rɔ.

⁹ Kä ɛ jɛn cak ciɛr ɔ kɛnɛ li̱p pay ciëŋ, kɛnɛ Kuɛl kɛ ciɛr pi̱thä.

¹⁰ Cɛ ti di̱t ti ga̱ykɛ naath la̱t, ti ŋuan ti thil pek.

¹¹ Mëë cɛ ben kɛ gëkdä /ka̱n jɛ nɛn, mi wëë kɛ /cä jɛ ŋäc.

¹² Kä mi cɛ duɔ̱ɔ̱r naŋ, ɛŋa dëë jɛ pën jɛ mɔ? Kä ɛŋa dëë jɛ jiök ɔ i̱, ‘Ɛŋu lät i̱ mɔ?’

¹³ “/Ci Kuoth gakdɛ däk jɔk, la dual lua̱a̱k Ra-ɣab kɛ jɛ.

¹⁴ Kä ɣän dëë jɛ loc i̱di? Dëë rieet ti ruac kɛ ɣä kɛ jɛ jek nikä?

¹⁵ A cäŋɛ mi thilɛ ɣä duerɛ /cä jɛ dëë luäŋ kɛ mi luɔcä jɛ. Ɣän bä thiec ni jɛ kɛ pälikä.

¹⁶ A cäŋɛ mi bä jɛ cɔl kä bɛ ɣä nhɔk, /cä jɛ bi ŋäth i̱ cɛ ɣä liŋ.

¹⁷ Jɛn derɛ dup ni ɣä kɛ thul, a bɛ moc ni ɣä buɔ̱ɔ̱t a thil luɔt.

¹⁸ /Cɛ ɣä bi jak kä ɣöö jëkä yieykä, bɛ jak ni rikä kä ŋuan.

¹⁹ Mi ɛ kui̱ bumä, bum ni jɛn! Kä mi ɛ kui̱ thukä, ɛŋa mi bi cuɔ̱ŋ kɛɛl kɛ ɣä?

²⁰ Kä cäŋ ta̱a̱ kɛ cuɔ̱ŋ, bi ruacdä ɣä yiɛn. A cäŋ thilɛ ɣä bɛ̈ɛ̈l, bɛ jɛ lar i̱ ta̱a̱ kɛ duer.

²¹ A cäŋɛ ni mi thilɛ ɣä bɛ̈l ɛ, thilɛ ɣä diɛɛr kɛ rɔ, ɣän cä tëkdä lo̱k.

²² Kɛ ɣöö päär kɛn diaal, ɛ jɛn cä cu wee, cɛ ram mi thil bɛ̈l kɛnɛ gua̱n dueeri däk kɛɛl.

²³ Mɔ ci ram mi thil dueer rɔ pär kɛ lia̱a̱ ɔ, la dɔl Kuoth jɛ.

²⁴ Mi te ɣɔw tetdä raam mi gua̱n dueeri, la bathɛ kua̱r luɔ̱ɔ̱kni. Kä mi /ci jɛ lät Kuoth, ɛŋa ku jɛ lɛ la̱t ɔ?

²⁵ “Kä ni̱nkä pɛ̈thni kɛn kä ram mi wur, la kɛ cua̱ thuk a thil gɔɔy.

²⁶ La kɛ cua̱ wä ce̱tnikɛ bi̱lɛ gutdä, wäkɛ kɛ pɛ̈th ce̱tkɛ cuɔɔr mi ban ley.

²⁷ Kä mi cä wee i̱, ‘Pa̱lä riɛkdä ruëëc, a bä timdä päl, kɛ ɣöö bä to̱k dɔl.’

²⁸ La reepɛ ni dualä kɛ rikä, kɛ ɣöö ŋa̱cä jɛ ɛn ɣöö /ci Kuoth ɣä bi päl baaŋ.

²⁹ Kä min ca ɣä ku thuŋ jek duer, ɛŋu bi lɛ kueer kɛ ɣä mɔ?

³⁰ A cäŋ cä rɔ puɔk nikɛ thabuuny kä cä tetkä lak ɛlɔ̱ŋ,

³¹ ŋotdɛ derɛ ɣä yuɔr rɛy puɔ̱l jiäkni, ni bieynikä dëë ɣä cany.

³² Kä jɛn /ciɛ raan mi ce̱tkɛ ɣä a dëë ruacdɛ ku lɛ loc, kiɛ dëë kɔ kulɛ luk kɔnɛ jɛ.

³³ Kä thilɛ ram mi bi ben kamda, mi dëë kɔn da̱ŋ rɛw luk.

³⁴ A jɛ wooc kɛɛtdɛ kä ɣä, kä a jɛ /ci ɣä lɛ jak kä dual.

³⁵ Bä ku lɛ ruac kɛ jɛ a thil dual, kɛ ɣöö ŋa̱cä ta̱a̱dä.