I-yob 8 - RUAC KUƆTH IN RƐL RƆ

Ruac Bil-dad

¹ Kä cu Bil-dad raan Cuwa ɛ loc i̱,

² “Ɛ bi ku amäni nɛy bi kɛn ti̱ti̱ lat ɔ? Ruacdu ɛmi thil luɔt.

³ Ɛ ku Kuoth thuɔ̱k a wooc? Kiɛ la cuɔ̱ɔ̱ŋ woocɛ?

⁴ Mëë ci gaatku jɛ lät kä duer, cɛ kɛ lät kä dueriɛn.

⁵ Mi wi̱i̱ Kuoth Nhial wä go̱r kä bi rɔ riet jɛ,

⁶ mi gɔaa i̱ kä thilɛ ji̱ duer, cäŋɛ niɛ täämɛ bɛ rɔ jiɛc kɛ kui̱du, kä bɛ ji̱ luɔ̱c tin la cuŋku.

⁷ Ɛ bi kuɛ̈ɛ̈ ni nyinku tëë nhiam, kä tɔ̱ bi Kuoth kɛ ka̱m ji̱ tɔ̱.

⁸ “Ji̱n guic ri̱c tëë ci wä, car mɔ ca ŋa̱c ɛ gua̱ni mɔ.

⁹ Kä dapkɛ kɔn thiekä mɛmɛ thilɛ mi ŋa̱c nɛ, kä ni̱n kɔn wi̱i̱ muɔ̱ɔ̱n ce̱tkɛ kɛ ti̱eep.

¹⁰ Kä kɛn /ca ji̱ dëë nyuɔ̱ɔ̱th, ci mëë ci kɛn ɛ ŋa̱c dëë liŋ?

¹¹ “Ci päth met do̱ny guäth mi /ci mɔ a rɛy waŋ? Kä ci guɔ̱t met do̱ny guäth mi thil pi̱w?

¹² Mi ci pi̱w do̱n, la kɔŋ a li̱w ni kɛn kä juaac tin kɔ̱ŋ.

¹³ Ɛn nɔmɔ ɛ jɛn ta̱a̱ nɛɛni diaal tin ca Kuoth pa̱l ruëëc, ŋa̱th nɛɛni ti thil Kuoth bɛ thuɔ̱k.

¹⁴ Min cɛ ŋa̱thdɛ la̱th thi̱n ɛ lath, min ŋääthɛ ɛ duel rääkä.

¹⁵ Mi cɛ rɔ thi̱ŋ kɛ duelɛ, /cɛ dëë te cuŋä, kä mi cɛ rɔ käp kɛ jɛ /cɛ jɛ dee rɔm.

¹⁶ Ce̱tdɛ kɛ jol mi wackɛ kɛ pi̱ rɛy ca̱ŋ, mi ci lääk rɛy kakä wal.

¹⁷ Mi ci ciökɛ yiath piny kam päämni, kä cieŋɛ rɛy päämni.

¹⁸ Kä mi ca jɛ däk guäthdɛ, bi gua̱a̱th ɛmɔ jɛ gak wëë i̱, ‘/Ka̱n ji̱ met nɛn.’

¹⁹ Kä nɔmɔ ɛ jɛn tɛ̈th lɔaacdɛ, kä bi juaac ti kɔ̱ŋ cu do̱ny guäthdɛ.

²⁰ “Kä kɛ thuɔ̱k /ci Kuoth ram mi thil bɛ̈ɛ̈l lo̱k, kä /cɛ ram mi jiääk luäk.

²¹ Kä bɛ ji̱ jak kä dɔli to̱k, kä bɛ ji̱ moc kɛ tɛ̈th lɔaac.

²² Kä bi ji̱ tɛ̈ru pöc, kä bi duël ji̱ dueeri thil.”