I-yob 7 - RUAC KUƆTH IN RƐL RƆ

¹ “Kä tëk ran cɛ bɛc ɛlɔ̱ŋ wi̱i̱ muɔ̱ɔ̱n, cɛ ce̱tnikɛ tëk raam mi läät mi kɔakɛ ni jɛ kɛ yio̱w?

² Ce̱tdɛ nikɛ kuany mi liip ti̱eep kɛnɛ ram mi liip yio̱w ko̱kädɛ.

³ Inɔ päth ti jiäk kɛnɛ wääri ti bɛ̈c bɛ̈ɛ̈c kɛ ti ca ka̱m ɣä.

⁴ Kä mɔ cä tɔ̱ɔ̱c ɔ, la ca̱rä i̱, ‘Ɣän bä rɔ jiɛc i̱ nɛy?’ Kä wäär la bärɛ, bä cu diɛɛr amäni bak ɣɔaa.

⁵ Kä puɔ̱nydä cɛ thia̱a̱ŋ kɛ kɔ̱a̱m kɛnɛ gɔak, kä ci guɔ̱pdä ba̱k kɛ buɔ̱t.

⁶ Ni̱nkä pɛ̈th ni kɛn kä ta̱k biey, la kɛ cua̱ thuk a thil gɔɔy.

⁷ “Kä timɛ lö Kuoth ɛn ɣöö tëkdä ɛ yiëëdä. Kä /ci waŋdä gɔɔy bi nyɔk kɛ nën.

⁸ Kä ram mi guic ɣä ɛn täämɛ /cɛ ɣä bi nyɔk kɛ nën. Bi ɣä guic duundɛ ɣöö bä bath waaŋdu.

⁹ Ce̱tkɛ min la riaw pua̱r, ɛ jɛn ce̱tkɛ ram mi ci wä jɔɔkni mɔ /cɛ la lunyɛ raar.

¹⁰ /Cɛ rɔ dëë nyɔk kɛ luny dhɔrɛ, kä /ci gua̱a̱thdɛ jɛ dëë lɛ met ŋa̱c.

¹¹ “Kɛ kui̱c ɛmɔ ɣän /cä bi biɛt. Ɣän bä ruac rɛy cucä yieekädä. Ɣän bä bɛ̈c teekädä lat.

¹² Ɣän lapä yier kiɛ ley yiëër mi di̱i̱t, mɔ ku ɣä jak kä gaŋkɛ mɔ?

¹³ Kä ɣän mɔ cä tɔ̱ɔ̱c ɔ mɔ cä wä wi̱i̱ dhaŋä mɔ kɛ ɣöö bä ku lɔ̱ɔ̱ŋ,

¹⁴ la ɣä cua̱ no̱ŋi la̱a̱k bi ɣä cu jak kä dual kɛ la̱a̱k ti jiäk.

¹⁵ Kɛ kui̱c ɛmɔ la ka̱nä ni lia̱a̱ kä tëk pua̱a̱ny ɛ bɛc bɛc ɛmɛ.

¹⁶ Ɣän cä tëkdä lo̱k. Kɛ ɣöö /cä bi tëk amäni cäŋ kɛl. Pälä, ɣän kärɔa. Tëkdä cɛ thil luɔt.

¹⁷ Ɛŋu mi di̱i̱t mi tekɛ ram mëë cak ji̱n ɔ, mɔ ci jɛ tit ɛlɔ̱ŋ ɔ,

¹⁸ la gui̱li jɛ kɛ runwaŋ ni ciaŋ, kä la ɣɔ̱ni jɛ ni ciaŋ?

¹⁹ A bi ku mäni nɛy bi guecdä päl ɔ, ci ɣä dëë päl kärɔa kɛ ɣöö dëë ruɛykä lɛ bät?

²⁰ Kä ɣän mi cä duer, ɛŋu mi cä lät kä ji̱ lö gui̱i̱c nath? Ɛŋu la jaci ni ɣä mɔ? Kä ɛŋu ci ɣän a riɛk kä ji̱ mɔ?

²¹ Ɛŋu /ci jiäkä tin cä la̱t kɛnɛ dueerkä päl ɔ? Kɛ ɣöö bä li̱w niɛ täämɛ, bi ɣä go̱r, kä /ci ɣä bi jek.”