I-yob 6 - RUAC KUƆTH IN RƐL RƆ

Luɔc I-yob kɛ jɛ

¹ Kä cu I-yob jɛ loc i̱,

² “Mi ca rikä kɛnɛ cuɔ̱cdä thɛm!

³ Kɛ thuɔ̱k, dee thiak ni kɛn kä liɛt yiëër. Kɛ kui̱c ɛmɔ ruacdä ɛ baŋ.

⁴ Kɛ ɣöö bääri Kuɔth in bum ni jɛn kä ti diaal a puɔ̱ɔ̱nydä. A ci yiëëdä lueŋdiɛn math, tin luɔ̱thkɛ kä Kuoth cikɛ ben kä ɣä.

⁵ Ci muul met wiee mi tëë rɛy wal, kiɛ ci yaŋ met wiee mi läk ɛ?

⁶ Duundɛ ɣöö ɛŋa mi dee mi̱eth mi bäl bäl cam a thil milɛ, kä ɛ cuɔm ŋukä te rɛy kä bua̱r?

⁷ /Ci lɔcdä mi̱eth mi ce̱tkɛ nɔ go̱o̱r, kɛ ɣöö mi̱eth mi ce̱tkɛ nɔ la mocɛ ɣä juey.

⁸ “Kä duŋ mi cä kulɛ thiec dee Kuoth ɣä kulɛ ka̱m min göörä,

⁹ inɔ dee Kuoth ɣä kulɛ däk, a bɛ ɣä woc rɛy nath!

¹⁰ DEE nɔmɔ ku la wi̱cdä a dee cak tɛɛth ni lɔcdä ɛn rɛy rikä nɔmɔ, kɛ ɣöö /ka̱n ruac Kuɔth met gak.

¹¹ Ɛ buɔ̱m in mi̱th tekɛ ɣä mɔ, min dëë kulɛ ŋäth? Kä ɛ guut in mi̱th dëë kulɛ lip ɔ?

¹² Ɛ ku ɣän buɔ̱m ce̱tkɛ päm, kiɛ puɔ̱nydä ɛ yiëëth?

¹³ Kɛ thuɔ̱k thilɛ ɣä buɔ̱m mi dëë kän ni rɔ, kä thilɛ duɔ̱ɔ̱p mi dëë luäk rɔ.

¹⁴ “Kä ram mi tekɛ riɛk ce̱tkɛ nɛ go̱o̱rɛ ni mäthni ti gɔw, a cäŋ cɛ luth Kuɔth pa̱l ruëëc.

¹⁵ Kä yɛn gaat maar /cä yɛ ŋäth ce̱t yɛn nikɛ löli pi̱i̱ni nhial, tin la kööt mi thilɛ nhiaal.

¹⁶ Kɛn löli la thiäŋ kɛ pi̱ ti kɔ̱a̱c kɔa̱a̱c.

¹⁷ Kä mɔ ci ɣɔw leth ɔ, la kɛ cua̱ thil.

¹⁸ Kä la päl ja̱a̱l duɔ̱pdiɛn, ba pi̱ ben go̱r rɛy dɔaar kä bikɛ cu li̱w.

¹⁹ La go̱o̱r ja̱a̱l tin bä kä Teemɔ pi̱, nɛy tin bä kä Cɛba görkɛ pi̱ kɛ ŋa̱th.

²⁰ Bi lo̱ckiɛn cu jiääk kɛ ɣöö ŋa̱th kɛn, la cup kɛ kɛ jiath lɔaac ɛn wi̱ni.

²¹ Kä yɛn bä ɛn täämɛ cia nyoth ɛn ɣöö /ci yɛn ɣä bi luäk, cia mi bɛc nɛn kä cia cu dual.

²² Kä ɣän, cä yɛ thiec i̱, ‘Muɔcɛ ɣä kɛ muc’? Kiɛ cä yɛ jiök i̱, ‘Thöpɛ duŋ ko̱kä kɛ kui̱dä kä nyinkun’?

²³ Kiɛ cä yɛ jiök i̱, ‘Ka̱nɛ ɣä tetdä gua̱n tɛ̈r’? Kiɛ, ‘Luɛ̈lɛ ɣä kä nɛy tin ciaŋkɛ naath a jiäk’?

²⁴ “Nyuthni ɣä duerä, bä jɛ liŋ. Nyuthni ɣä min cä dui̱r.

²⁵ Ruac thukä bɛc ɛ! Kä ɛŋu mi go̱o̱ri i̱ bi lat?

²⁶ Lotdi ni ɣöö bi ruac in cä lat rialikä, kiɛ go̱o̱ri ni ɣöö bi wiee däkädä nɛmɛ a ruac baaŋ?

²⁷ Ji̱n yori ni gaakni kɛ kui̱ raam mi thil gua̱n, kä kɔki ni määthdu kɛ yio̱w.

²⁸ “Täämɛ guic ɣä agɔaa, ɣän /cä ji̱ bi la̱t kac.

²⁹ A ji̱ kua̱ ka̱p cuɔ̱ŋ, /cu lɛ wä ɛlɔ̱ŋ, cu ɣä bɛl ta̱a̱ kɛ cuɔ̱ɔ̱ŋ.

³⁰ Ɣän lɛ̈n lɛ te duer mi cä la̱t? Ɣän /cä mi la duer dee lar.