I-yob 5 - RUAC KUƆTH IN RƐL RƆ

¹ “Cio̱tni ɛn täämɛ, tëë kɛ ram mi bi ji̱ loc? Kä ɛŋa kä nɛy tin rɛ̈l kɛ rɔ̱ mi deri rɔ riet jɛ?

² Kɛ thuɔ̱k diɛɛr näkɛ ram mi dɔ̱a̱r, kä tiɛɛl näkɛ ram mi kɔ̱c kɔ̱c.

³ Ɣän cä ram mi dɔ̱a̱r nɛn yiɛthɛ rɔ piny, kä cua dhɔrɛ lam nikä kɛɛl.

⁴ Kä gaatkɛ nɔ̱a̱nkɛ kɛ ka̱n, ca kɛ joc kɛ go̱o̱ny, kä thilɛ ram mi cu kɛ gaŋ.

⁵ Kä cu ji̱ buath bɛlkɛ cam, wä kɛn kɛ ka̱n ni kamni kuiini. Kä cu nɛy tin ji̱ rɛ̈w ria̱ŋdiɛn go̱r.

⁶ Kɛ ɣöö /ci riɛk la bä rɛy tupä, kä /ci riɛk bëë rɛy muɔ̱ɔ̱n.

⁷ Kä dapkɛ raan kɛ ɣöö bɛ tekɛ rik ce̱tkɛ min la mac a tɛ̈ny.

⁸ “Duŋ mi ɛ ɣän, dëë rɔ riet Kuoth, dëë ruacdä naŋ nhiamdɛ.

⁹ Jɛn la lätdɛ ti ga̱ykɛ naath ti /ca luɔtdiɛn ŋäc, ti ŋuan ti /ca dëë luäŋ kɛ kuën.

¹⁰ Jakɛ nhiaal kä dɛm wi̱i̱ muɔ̱ɔ̱n, kä mocɛ ka̱a̱k kɛ pi̱.

¹¹ Kapɛ nɛy tin mua̱l mua̱a̱l nhial, kä jakɛ nɛy tin pär kä tɛth lo̱ckiɛn.

¹² Kä nyoonɛ cär beli, kɛ ɣöö thilɛ mi ba jek ɛ kɛn.

¹³ Käpɛ nɛy tin pɛl kɛ lätkiɛn, kä wocɛ cär belä.

¹⁴ Thilɛ mi lua̱ŋkɛ kɛ cäŋ däär, cäŋɛ ni thiaŋ ce̱tdɛ nikɛ wäär cä kɛ.

¹⁵ Duundɛ ɣöö la käänɛ rɛ̈tni kä kɛ, kä käänɛ can kä nɛy tin buɔ̱m buɔ̱ɔ̱m.

¹⁶ Cɛ can moc kɛ ŋa̱th, kä ci nɛy tin thil thuɔ̱k biɛt.

¹⁷ “Puɔ̱th akɛ ram in ci Kuoth jɛ nyuɔ̱ɔ̱th. Kɛ kui̱c ɛmɔ /cu nyuuth Kuɔth in leny buɔ̱mdɛ ti diaal lo̱k.

¹⁸ Kɛ ɣöö la läthɛ buɔ̱t, kä bɛ jɛ yiɛn. Kä lätdɛ mi bɛc, kä bɛ jɛ jak kä gɔaa.

¹⁹ Bɛ ji̱ kän kä rik nikä bäkɛl, kä kɛ bärɔwdiɛn thilɛ riɛk mi bi ben kä ji̱.

²⁰ Kä bɛ ji̱ kän rɛy buath, kä bɛ ji̱ kän rɛy ko̱o̱ri.

²¹ Kä bɛ ji̱ gaŋ kä lëëp nath, kä /ci bi dual mi wä da̱k ben.

²² Bi dɔl ni to̱k rɛy buath kɛnɛ rɛy däkä, kä /ci bi dual kɛ ley dɔaar.

²³ Kɛ ɣöö bi tekɛ mat ruac yɛnɛ pääm dɔaar, kä bi tekɛ mal kɛ ley dɔaar.

²⁴ Kä biɛ ŋa̱c ɛn ɣöö mal dhɔru, kä bi kuaku jek a thilɛ mi bi te jɔ̱ɔ̱r.

²⁵ Kä biɛ ŋa̱c bä ɛn ɣöö bi kuayku ŋuan, kä bi tekɛ gaat ti ce̱tnikɛ juaac piɛny.

²⁶ Kä bi li̱w a ti̱i̱kɛ run ti ŋuan ce̱tnikɛ min la ŋɛ̈rkɛ bɛl kɛ gua̱a̱thdiɛn.

²⁷ Kɔn cakɔ nɔmɔ ɣɔ̱n, kä cakɔ jɛ jek ɛ thuɔ̱k. Kɛ kui̱c ɛmɔ liŋɛ kä lätni jɛ kɛ gɔɔydu.”