I-yob 41 - RUAC KUƆTH IN RƐL RƆ

¹ “Deri nyaŋ bäpdiit in di̱i̱t luäŋ kɛ ka̱p kɛ yieeth rɛc, kiɛ deri lɛpdɛ luäŋ kɛ yiën kɛ dep?

² Ji̱n deri wum nyaaŋ ɛ mɔ rop kɛ dep, kiɛ deri jio̱mdɛ gɔn kɛ yieeth?

³ Jɛn /cɛ ji̱ dee thiec kɛ wädɛ, kä /cɛ bi lip ni ji̱ kɛ riet, kɛ ɣöö bɛ wä.

⁴ Kä jɛn /cɛ mat ruac bi lat kɛ ji̱, kä /cɛ bi lar ɛn ɣöö bɛ lät kɛ ji̱ kɛɛl amäni cäŋ kɛl.

⁵ Kä /ci jɛ dëë buɔth kɛ dep, kɛ ɣöö bi nyier la̱tdu jɛ nɛn.

⁶ Kä /ci dëëp rɛc ruac ko̱kädɛ dëë lat, kä ci kɛ jɛ dëë dääk kä köök.

⁷ Kä /ci köör puɔ̱nydɛ dëë luäŋ kɛ yiëth, kä /ci wi̱cdɛ dëë luäŋ kɛ bith ma̱y.

⁸ Thiap puɔ̱nydɛ bɛ kɛ tetdu, ci ko̱r mi ce̱tkɛ nɛ bi nyɔk kɛ päl ruëëc amäni cäŋ kɛl.

⁹ Kä nɛn ɛ, ram mi ci nyaŋ ɛ mɔ nɛn la ga̱a̱c ni jɛn, la ŋɛɛrɛ puɔnydɛ a bɛ tɛɛth.

¹⁰ Kä thilɛ ram mi dee cuɔ̱ŋ ɛn nhiam nyaaŋ ɛ mɔ, kuɛla ŋa dee wä ruac nikɛ Kuoth ɔ?

¹¹ Kä ɛŋa mi ci ɣä moc kɛ ŋua̱l mi dëë pi̱ek jɛ? Kä ŋɔak diaal tin te rɛy ɣɔaa.

¹² “Ɣän bä yɛ la̱r ta̱a̱ ciökni nyaaŋ, kɛnɛ ŋɔak diaal tin gɔw tin cɛ la̱t, kɛ ciaŋ puthä min tëë jɛ.

¹³ Kä thilɛ ram mi dëë kuackɛ luäŋ kɛ wuɔ̱c, kä thilɛ ram mi dëë gɔak jɔakdɛ luäŋ kɛ yiëth.

¹⁴ Kä thilɛ ram mi dëë jɛ jakä bɛ thokdɛ lɛp. Kɛ ɣöö lɛc thuɔkdɛ jakɛ naath kä dual.

¹⁵ Kä ca jɔkdɛ la̱t kɛ bëër köötni, ti ca rɔ mat kɛl ce̱tnikɛ mi ca gur.

¹⁶ Ci mɔ rɔ thiëëk kɛ min dɔ̱ŋ a cäŋɛ ni jiɔam /cɛ coth kɛ kamkiɛn.

¹⁷ Cikɛ rɔ̱ nuat ni kɛl, a /ca kɛ dëë luäŋ kɛ dääk.

¹⁸ Kä thiamdɛ ɛ yiel maac, kä la bo̱l nyinkɛ ce̱tnikɛ käny ca̱ŋ.

¹⁹ Kä thokdɛ tëë kɛ lew maac, kä bä ruɛlkɛ raar ce̱tnikɛ löny.

²⁰ Kä päl tol raar nikɛ wumkɛ, ce̱tnikɛ dhaar mi ca tharɛ pët mac rɔɔny mi pua̱a̱r pi̱kɛ.

²¹ Kä yiëëdɛ la dɔpɛ mim, kä päl bo̱l maac raar kɛ thokdɛ.

²² Kä tëë kɛ ŋuäk mi bum bum, kä nɛy tin ro̱m kɛ jɛ ŋɛ̈ɛ̈r kɛn kɛ dual.

²³ Kä buɔ̱m pua̱a̱nydɛ ce̱tdɛ kɛ yiëëth, kä gua̱th tin kɔ̱c puɔ̱nydɛ ce̱t kɛn kɛ ladiit.

²⁴ Kä lɔcdɛ thilɛ jɛ luär, bumɛ tet ce̱tnikɛ päm gua̱r bɛɛl.

²⁵ Mɔ cɛ rɔ jiac cuɔ̱ŋɔ, a cäŋɛ nɛy tin bumni kɛn la dual kɛ, kä bikɛ rɔ̱ cu bar.

²⁶ Kä cäŋ ci kɛn ɛ yiath kɛ mutni /ca puɔ̱nydɛ luäŋ, kä /ci köör kɛnɛ bääri puɔ̱nydɛ luäŋ kɛ wuth.

²⁷ Ce̱t ladiitni kɛ rɔny puɔ̱ɔ̱nydɛ, kä ce̱t yiëëth in yian kɛ jiath kä jɛ.

²⁸ Kä /cɛ rɔɔdɛ bar kɛ bääri, kä ce̱t dööl nikɛ kɔ̱w kä jɛ.

²⁹ Kä ce̱t kɛtni nikɛ ɣör kä jɛ, kä /cɛ yio̱w cɔl ni duɔ̱ɔ̱r.

³⁰ Kä ce̱t bapdɛ nikɛ tha̱a̱lieer, kä ce̱t pöör ja̱lɛ ni kɛ pöör puɔ̱r thääkni.

³¹ Kä mi cɛ rɔ wäl kä bäpdiit ce̱t pi̱kɛ nikɛ pi̱ ti ci pua̱a̱r, kä ku biɛny yiëër lɛ pa̱a̱r nikɛ liɛth mi ci pua̱a̱r.

³² Kä dho̱o̱c pi̱i̱ni ja̱lɛ rɛy yiëër, buɔyɛ ce̱tdɛ nikɛ muaŋ.

³³ Kä thilɛ mi dëë pa̱a̱r kɛ jɛ wi̱i̱ muɔ̱ɔ̱n, ɛ ley mi thil dual.

³⁴ Kä guicɛ ley diaal ni piny, amäni buɔ̱m buɔ̱ɔ̱mkiɛn, kä ɛ kuäär leyni diaal.”