I-yob 40 - RUAC KUƆTH IN RƐL RƆ

¹ Kä cu Kuoth Nhial ruac kɛ I-yob wëë i̱,

² “DEE ram mi lat dueer nɛɛni kɔ̱kiɛn gua̱thni diaal tekɛ tɛɛr, kɛ Kuoth in leny buɔ̱mdɛ ti diaal? A kuɛ loc ɛn ram min lät tɛɛr kɛ Kuoth.”

³ Kä cu I-yob Kuoth loc i̱,

⁴ “Nɛnɛ, ɛ ɣän ram mi thil luɔt, kä ɛŋu mi luɔ̱cä ji̱? Ɣän bä thokdä kum nikɛ tetkä.

⁵ Ɣän cä kɔŋ ruac kä kɛɛl, kä thilɛ mi bä loc, cä ruac nikä rɛɛw, duundɛ ɣöö thilɛ mi bä nyɔk kɛ lär.”

⁶ Kä cu Kuoth ruac luɔ̱c I-yob kɛ rɛy jiɔam i̱,

⁷ “Täämɛ ji̱n rial ni rɔ ikä ce̱tkɛ wut mi bum, bä ji̱ thiec kä bi ɣä loc.

⁸ A bi ɣä ku moc kɛ duer? Ɛ bi ɣä ku bɛl kɛ ɣöö bi rɔ moc kɛ cuɔ̱ɔ̱ŋ?

⁹ Ɛ ku tekɛ buɔ̱m mi ce̱tkɛ buɔ̱m Kuɔth, kiɛ deri ma̱a̱r kɛ jɔw mi ce̱tkɛ jɔwdɛ?

¹⁰ “Kä ji̱n rony puɔ̱nydu kɛ buɔ̱m kɛnɛ thiak, kä läthni guëthdu kɛnɛ wuɔ̱tdu.

¹¹ Kä nyoth ŋɛ̈ɛ̈nydu, kä guic ji̱ liakä kä kuethni kɛ.

¹² Guic gua̱n liakä, kä bi ɛ woc, kä woc ji̱ jiäkni gua̱thni tin tekɛ thi̱n.

¹³ Kä tɔ̱w kɛn diaal kɛɛl ni rɛy tupä. Kä yiɛnikɛ ni ro̱o̱l jɔɔkni.

¹⁴ Kɛ ɣöö ɣän bä ji̱ cu ŋa̱c, ɛn ɣöö deri rɔɔdu kän kɛ buɔ̱mdu.

¹⁵ “Kä ji̱n guic rɔw, mëë cä cak ce̱tnikɛ ca̱k ëë cä cak ni ji̱, camɛ ni juaac ce̱tkɛ yaŋ.

¹⁶ Kä guicɛ te buɔ̱mdɛ lɛtädɛ, kä te buɔ̱mdɛ jicdɛ.

¹⁷ Kä la bum juälɛ ɛ tet ce̱tnikɛ jiath ŋuër, kä cɛ cuɔ̱lcuɛɛkni ɣa̱mdɛ mat kɛɛl.

¹⁸ Kä ce̱t cɔ̱wkɛ nikɛ kamthoori yieethä min yian, kä bum cuŋ pua̱a̱nydɛ ce̱tnikɛ gääkni ladiitdä.

¹⁹ “Ɛ jɛn lät Kuothɛ kɛ nhiam ɔ. Kä dee jɛ näk ni Cääkdɛ kärɔa.

²⁰ Kä bi pääm jɛ lät kä mi̱eth gua̱a̱th in ŋar ley dɔaar diaal thi̱n.

²¹ Kä la tɔ̱ɔ̱cɛ thaar ti̱äpä mi tekɛ dhiac, kä la kum guɔ̱t ɛ piny.

²² Kä ti̱eepdɛ ɛ ti̱ep min ci jɛ kuɔ̱m piny, kä ci ruɔ̱r ɛ göl piny peknikɛ diaal.

²³ Guic ɛ bɛ, a cäŋ ci yier mak cɛ la dualɛ, la bitdɛ a cäŋ ci pi̱w kiɛɛr Jɔr-dɛn cop ni thokdɛ.

²⁴ Tëë kɛ ram mi dee jɛ käp kɛ wäŋkɛ, kiɛ ɛŋa mi dee wumdɛ käp kɛ yieeth?